Utoqqarnut ualikkut sammisaqartitsineq

Borgmesterip, Asii Chemnitz Narup, Paamiunut maannakkut tikeraarneranut atatillugu pingasunngornermi ualikkut utoqqaat sammisaqartinneqarput.  Ualeq aallarnerlugu ineqartut peqatigalugit kaffisoqatigiittoqarlunilu kaagisoqatigiittoqarpoq.

Ineqartut amerlanerit borgmesterimik tikeraartumik oqaloqatiginninniarlutik takkupput.

Tamatuma kingorna tussiaqatigiittoqarlunilu Paamiormiuni maligassiuilluarsimasunut marlunnut ukioq manna toqukkut qimagussimasunut kransiliisoqarpoq. Aappaa tassaavoq ataqqinaammik innuttaasoq Thomas Abrahamsen juunip 22-anni 90-inik ukioqarluni toqukkut qimaguttoq. Aappaalu tassaavoq Karen Hegelund, aggustip qulingani 83-inik ukioqarluni toqukkut qimaguttoq.

Kransiliineq Paamiuni utoqqaat peqatigiiffianit aaqqissuuneqarpoq, kingornalu peqatigiiffiit illuanni kaffillerlutik.