Paamiuni innuttaasunut ataatsimiititsineq ornigarneqarluartoq

Kommuneqarfik Sermersuumi borgmesteri Asii Chemnitz Narup pingasunngorneq septembarip 27-anni Paamiuni katersortarfimmi innuttaasunik ataatsimiititsivoq.

IA, Demokraatit aamma Atassut apriilimi suleqatigiinnissamik isumaqatigiissutaat qulequtaritinneqarpoq.

”Qinigaaffiup ukiuani siullermi kommunip illoqarfiini tamani qinersisartut tamaasa naapikkusuppakka, tassanilu suleqatigiit anguniagaannik oqaluttuukkusuppakka. Qularinngilara meeqqanut tunngasut pitsanngoriaateqarnissaat illoqarfinni tamani malugineqarsinnaassasoq, tamannami pingaartinnerpaavarput”, oqarpoq Asii Chemnitz Narup.

Innuttaasut 80-it missaanniittut katersortarfimmukarsimapput, apeqquteqarusuttullu amerlasimallutik. Apeqqutigineqartut assigiinngisitaarsimapput, tassa illoqarfimmi taxaniit illoqarfimmi tv-qarnermut aammalu innuttaasunut kiffartuussivimmut tunngasunik apeqquteqartoqarsimavoq.

”Innuttaasunut ataatsimiititsinermi inerniliissaguma oqaatigisariaqarpara Paamiuni innuttaasut pingaartitakka aamma pingaartikkamikkit, tassa meeqqat inuussutissarsiornermillu ineriartortitsinissaq, taamaattorli sorliit siulliunneqassanersut assigiinngitsunik isummerfigineqarpoq” oqarpoq Asii Chemnitz Narup.

Kommuneqarfik Sermersuumi borgmesteri tallimanngorneq septembarip 29-ata tungaanut Paamiuniissaaq.