Innuttaasunut

Naak ukiorlussimagaluartoq Paamiuni nutaamik utoqqaat illuliorneq piffissaq malillugu ingerlavoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Nutaamik utoqqaat illuliorneq illoqarfimmi sanasunit sananeqarpoq.

Upernaami ingerlanerliorpasileraluarpoq. Ukioq ilungersunartoq, nalinginnaanngitsumillu aperujussuarnerup kingunerisaanik Paamiuni nutaamik utoqqaat illuliornissaq kingusinaarluni aallartinneqarpoq. Toqqaviliornissap aallartinnissaanut aammaarluni qaartitereqqittoqartariaqarsimammat sanaartorneq aallartinneraniit kinguaattooqqippoq. Aasalli ingerlanerani sulineq ingerlalluarsimammat kinguaattoornerit angummaffigineqarsimapput.

”Ataatsimut isigalugu malinnaaqqilerpugut, naatsorsuutigaarpullu piffissaq eqqorlugu naammassissasoq: 2018-imi decembarip qaammataani”, oqarpoq sanasut naalagaat Nuka Peter Stenskov Frederikshåb Betoncentralimeersoq, taannalu utoqqaat illuliornermik akisussaasuuvoq.

Pingasunngorneq 27. septembari borgmesteri Asii Chemnitz Narup sanaartorfimmi pulaarpoq, illullu piffissaq eqqorlugu naammassinissaa nuannaarutigaa.

”Utoqqaat illussaata naammassinissaa qilanaareqaara. Paamiuni utoqqaat sivisuallaamik pitsaanerusumik atugaqalernissaq utaqqereerpaat, taamaattumik kinguaattoortoqaqqissanngitsoq tusarlugu nuanneqaaq”, Asii Chemnitz Narup unnersiorpoq.

Maannakkut sanasut holdit marluk utoqqaat illussaanik sanapput. Sanaartorfimmi angutit arfineq-pingasut iigalersuipput, natilersuillutillu qilaalersuipput. Saniatigullu illoqarfiup immikkoortuani allami sanasut sisamat illup saavata qalliutissaa suliaraat, taannalu ukiup ingerlanerani illumut ikkunneqassaaq. Taamalu inuit arlallit ataatsikkut sullipput, illullu saava sukkanerusumik matuneqarsinnaassaaq.

Angutit taakku aqqaneq-marluk utoqqaat illuliortut tamarmik Paamiuneersuupput, Nuka Peter Stenskov tulluusimaarpalulluni oqarpoq.

”Illoqarfimmi sanasut atorniarsaraavut. Suliaq annertummat imaassinnaavoq illoqarfimmit allamiit qalissialiortartumik tikisitsisariaqassasugut, taamaattorli maannamut illoqarfimmi najugallit atorlugit suliaq suliarisimavarput”, oqarpoq.

Utoqqaat illussaanni inissiat 24-ussapput, perusuersartarfillit, uffarfillit igaffittallillu, immikkullu nakkutigisamik puigortunngortunut immikkoortortaqassaaq. Nutaartarissavaa peqqissaavimmut toqqaannartumik atalertussaanera, tassa illup iluatigut torsuusakkut matukkut iserfigineqarsinnaassammat. Taamaaliornikkut kommunimi peqqinnissaqarfimmilu sulisut avillugit sulisorineqassapput.