Kommuneqarfiup Allaffiata silataani eqqumiitsuliaq nutaaq

Kommuneqarfiup Allaffiata naatsiiviata kaajaluisaani eqqumiitsuliaq nutaaq takuneqarsinnaalerpoq. Pineqarpoq eqqumiitsuliortup kalaallip Thue Christiansenip kusanartuliaa ’Arsaattut’, ukiuni arlalinni kommunip allaffiata iluani nivingareersoq maanna silami kikkunnilluunniit nuannaarutissanngorluni takuneqarsinnaalerpoq.

Ilaanniuna eqqumiitsuliap allamut inissinneqarnini tulluarinerusaraa, tamannarpiarluuna tunngavigalugu maanna Thue Christiansenip ’Arsaattut’ kommuneqarfiup allaffiata silataani kusassaataalersoq”, borgmester Asii Chemnitz Narup oqarpoq. Massakkut inissinneqarnera aatsaat pissusissamisoorpoq. Qanimut isigineqarsinnaanini ungasissumiillu, aammalu eqqumiitsuliap ilusilersornera saffiugassallu assigiinngitsut seqernup qaamarnanit pinnguarineqartullusooq peqqutaalluni.

Thue Christiansen eqqumiitsuliortarnermini assigiinngitsunik periuseqarpoq, “Arsaattut”-nilu aalasulioriaasiata immikkuullarissup arsaattut aalisakkatut puisitulluunniit eqaatsigalutik inissisimanerat takuneqarsinnaavoq.

Eqqumiitsuliaq pilersinneqarpoq Nuummi Saviminilerinermik ilinniartut suleqatigalugit, aammalu ammalortup qeqqanik ilinniartut atuarfimmeersut pilersitsisuupput.

Eqqumiitsuliortup nammineerluni nuannaarutigisorujussuuaa suliani siunissami Kommuneqarfiup Allaffiata silataani kusassaataalermat.

Eqqumiitsuliortup ilisaritinnera
Thue Christiansen februaarip 25-ni 1940-mi Maarmorilimmi Uummannamiittumi inunngorpoq. Ilaatigut Erfalasorput pilersippaa.

Thue Christiansen Haderslev Statsseminariumimi 1964-imi ilinniakkaminik naammassinnippoq, kingornalu Danmarkimi Kalaallit Nunaannilu ilinniartitsisuusarsimalluni.

Kalaallit Nunaat 1979-imi Namminersornerullutik Oqartussaqalermat Thue Christiansen naalakkersuisunut ilaasortaanngorpoq kulturimut ilinniartitaanermullu naalakkersuisuulluni. 1983-illu tungaanut issiasimalluni.

Ilinniartitsisunngunnginnermini politikkikkullu suliaqanngikkallarami  Thue Christiansen eqqumiitsuliortuuvoq, ilusilersuisartoq kulturimillu oqaluttuartoq. Pisortat illuutaanik arlalinnik kusassaasimavoq, Kalaallit Nunaanni nunanilu allani saqqummersitsisarsimalluni.

Ridder af Dannebrogordenenimik saqqarmioqarpoq.