Nuummi juullimi orpiup ikinneqarnera

Pisarnertut Sapaassuit aallartinneranni Nuummi juullimi orpik ikinneqarpoq, ukioq mannalu aammaarluni orngiarneqarluarpoq. Orpik kusanartoq, Reykjavik Kommunimit tunissutaasoq, inuit tuusintinit amerlanerugaartut ungoqqavaat, viceborgmesterillu Nivi Olsenip oqalugiarnermini eqqaavaa ’orpiit Islandimeersut immikkuullarissuusut’.

Ualinerani aaqqissuussineq Arsiffimmi scenemit Maaliamit aqunneqarpoq, ilaatigullu Hinnarimmit pulaarneqarpoq, taassumalu juullimi kissaatini oqaluttuarai nuannersunillu erinarsorluni.

Taassuma kigorna utaqqisaasoq nalliuppoq, juulimaaq, nuliani nissiaqqallu ilagalugit takkummata. Nissiaqqat orpik eqqaani siammartereermata, juulimaaq juulimaallu nulia orpip nuuata tungaanut kivinneqarput, orpik qaammarsaalluni ikinniassammat.

”Illoqarfiup orpia ikikkaagatsigu, qamuuna malugisarparput ilumut juullilersoq,” viceborgmester Nivi Olsen oqalugiaatimini oqarpoq. ” Maanna piffissanngorpoq Juullimut pinnersaatit tamaasa saqqummernissaat – piffissanngorporlu sumi tamani igalaat saavini naneruutit ikinnissaat – naneruuterpassuillu taakkuupput maani Nuummi uatsinnut ’Juullimi ilisarnaataalersimasut’  – Igalaani ullorissat qulleeqqallu assigiinngitsunik qinngornillit tusindtilikkaat, allaanngillalluunniit illoqarfik tamaat qinngornermik tipaatsunnartumik Juullerpalaamik pajulluni qaammartitsisut.  Ileqqorput taanna nuannertuuvoq qularutiginngilaralu amerlasoorpassuulluta novembarip qaammataani Juullip naneruutaasa igalaani sumi tamani ikititilernissaat qilanaarutigigivut.”

Viceborgmesteri oqalugiareermat Generalkonsul Skafti Jónsson juulli, orpik aamma Islandip Kalaallillu Nunaata akornanni ikinngutigiinneq pillugu oqaaseqarpoq, aaqqissuussineq erinarsoqatigiinnermik, orpiup kaavinneqarneranik – minnerunngitsumillu Islandimiit mamartunik meeqqanut agguaassinermik naggaserneqannginnerani.