2018-mut missingersuutit: Meeqqanut perorsaanikkut timersorneq

Nuummi ulluunerani paaqqinnittarfimmi sulisut timersornermik pinnguarnermik ilinniarnermillu sullissilluarnerusariaqarput. Taamaattumik kommunalbestyrelse ukiunut tulliuttunut pingasunut 1,8 million kruunit susassaqarfimmi sulisut pikkorissarnissaannut immikkoortitsipput.

Perorsaanikkut timersorneq ilaatigut meeqqat inuttut pissusaat timersorneq aqqutigalugu qaffassarniarlugu ingerlanneqassaaq.

– Qularutiginngilara meeqqat tamarmik timimik aalatinnerulernissaat iluaqutigissagaat. Taanna suliniut aamma Inuit Ataqatigiit Demokraatillu akunnerminni suleqatigiinnissamik isumaqatigiissutaannut iluaqutaassaaq pissutigalugu anguniagaammat “Ulluunerani paaqqinnittarfiit tamarmik sunngiffimmilu neqeroorutaasut tamarmik timip aalatinnissaanut, timersornermik timillu aalatinnissaanut peqataanermikkut qulakkiissavaat, Meeqqanut Atuartitaanermullu Ataatsimiititami siulittaasoq Nivi Olsen oqarpoq.

Nuummi meeraaqqeriviit 16-pput meeqqeriviillu 15-ullutik.