2018-mut missingersuut: Qatserisartut biilissaat nutaat

Kommuneqarfik Sermersooq kommunip siunissami annaassiniarneq qularnaallisarniarlugu aallartippoq.

Annaassiniarnermut piareersimaneq pillugu immikkoortortami pilersaarut akuersissutigineqarpoq ilaatigullu ima isumaqarpoq biilit pigineqartut allanik taarserneqarnissaat. Ikinnerpaamik 25 million kruuninik 2021 ilanngullugu aningaasaliiffigineqassaaq.

Annaassiniarnermut piareersimanerup immikkoortortamut pilersaarusiartaa Tasiilami Nuummilu aamma qatserisarfiit illuinik alliliinermik pilersitsinermillu imaqarput, taarsiinernut ikuallattoornermilu atortunut, ikiuiartornermi biilinik tulluarsakkanik nutaanik pissarsinissanut minnerunngitsumillu qatserisartut tamaasa ilinniartinneqarnissaannut.