Ullukinnermi pilluaritsi

Bormgester Asii Chemnitz Narup Ullukinnermi pilluaqqusivoq.

Uanga paasinnittarnera najoqqutaralugu siulitta ”ullukinnersiortarnerat”, tassaavoq suut tarmik naggateqarnerannik toqusarnerannillu, aammali taartumiit toqumillu inuunerup nutaap, qaamarngullu nutaap pilersarneranik – tassa suut tamarmik nutaanngoqqittarnerannik – nalliuttorsiutiginninneq. Ullukinnersiorneq tamaalilluni tassaavoq inuunerup silarsuullu nutaanngoqqinissaannik nalliuttorsiutiginninneq. Inuunitoqaq qaamanitoqarlu peeruppata, nutaassallu takkunnissaannik ullorissat ”aassuutit” oqariartorlutik qilammi takussaalerpata, tamanna nalliuttorsiutigineqartussaavoq – inuit tamarmik nutaaginnarnik kusanartunillu atisalersussallutik, ullorlu nalliussineqassaaq tunioraaqatigiinnernik, nerisassanik mamarnersiukkanik sallaallernermik, qilaasersorluni tivanernik, nuannaarlunilu erinarsoqatigiinnerit atorlugit. Ulloq illernartitaasarsimavoq, kinaluunniillu ulloq taanna piniariartoqqusaasanngilaq suliaqaqqusaananiluunniit. Aamma pineqartoq tassaavoq pisoqqamut qaangiuttumut qujaniarneq, nutaassamullu takkukkumaartumut tikilluaqqusineq.

Suut tamarmik killeqarput naggateqarlutillu, kisiannili aamma nutaamik aallartiffeqarlutik. Inuunerup nigalilittut kaavinnera tassaniippoq, nutaaq pilersarpoq pisoqqap uniffiani.

Siulitsinni pineqartoq tassa upperisarsiorneq atorlugu oqimaaqatigiisitsiniarneq, silarsuup, tassunakkullu inuunerup, ataqatigiinnerata innarlerneqarani oqimaaqatigiisinneqarnissaanik siunertaqartoq. Siulitta inuunerminni upperisaraat silarsuaq aserussasoq, inullu toqulluni, silarsuup oqimaaqatigiisinneqarnera innarlerneqassangaluarpat. Silarsuup oqimaaqatigiittuarnissaanut inuk malitassaqarpoq ileqqutoqqanik – ullukinnersiortarnertut ittunik – ileqqutoqqanilu malitassani Sila pinngortitarsuup ataqatigiinneranut oqimaaqatigiisitsisuuvoq, soorlulittaaq inuup nammineq timimigut tarnimigullu silaqassutsi atorlugu oqimaaqatigiisinneqartartoq. Upperisarsiornikkut oqimaaqatigiisitsinerup tamatuma siunertarpiaa tassaavoq inuup pitsaanerpaamik inuuneqarnissaminut periarfissaqarnissaa, kinguaassiorluarsinnaanisssaq, nerisassaqartuaannarnissaq, peqqissuulluunilu inuuneqarnissaq, inuunermi qitiusumik naleqartitatut inissisimasoralugit.

Ullukinnersiorluni nalliuttorsiortarnerup tunuani isummat tunngaviusut tamakku uanga assut pingaartitaraakka, nunarsuatsinni kikkunnulluunniit atuummata – aamma ullutsinni – seqernup qaamarngullu uteqqilernerani immitsinnut kissaattaratta ajunngitsumik peqqinnartumillu inuuneqarnissatsinnik, timitsinnik tarnitsinnilu oqimaaqatigiisitsilluta, nunarsuatsinni silarsuarput piujuaannartutut oqimaaqatigiissoq avatagiiseralutigu. Ullukinnermi, inuunerup silarsuullu nutaanngoqqinnissaasa nalliuttorsiutigineranni, ullorsiorluarnissassinnik uummaatinnik pisumik tamassi kissaappassi.

– Asii Chemnitz Narup