Thiiooq Knudsen – Juullimi eqqaamasanni nuannernerpaaq

Kommueqarfik Sermersuup juullimi ammartagaa juullernissaata tungaanut ingerlavoq. Kommunalbestyrelsimi ilaasortat apersornikuuagut ukiup ingerlanerani suliaminni suut nuannarinersaasimaneraat aamma inuunerminni juullimi eqqaamasaminni suna nuannernersaanersoq.

Kommunalbestyrelsimi ilaasortaalluni suliat tamarmik nuannerput, kisiat maanna ilaasortaaninni atuarfeqarnermut tunngasut nuannarinersaraakka. Meeqqanimmi sullissineq qangaaniilli nuannarisarigakku. Siullermik kommunalbestyrelsimut ilaasortanngorpunga Paamiuni 1997-imi, tassanngaanniillu 2013-ip tungaanut ilaasortaallunga.

Ukioq manna kommunalbestyrelsimut qinersisoqarmat ilaasortanngoqqippunga, nuannareqaaralu Meeqqanut Atuarfeqarnermullu Ataatsimiititami ilaasortanngorsimagama.

Ilaquttat ilagalugiit juullisiorluni nuannernersaasarpoq. Uagut ilaqutariiusugut qangali eqqissilluta juullisiorniartarpugut nereqatigiittarlutalu. Naak ilaquttat peerutereersut eqqaamasaraluarlugit, nuannaarluta juulli atortarparput.


Kommuneqarfik Sermersuup juullimi unammisitsinerani #julenuuk-mut peqataanissat eqqaamajuk. Hashtag #julenuuk atorlugu Facebookimut Instagramimulluunniit assimik ikkussiguit unammisitsinermut peqataassaatit.