Justus Hansen – Juullimi eqqaamasanni nuannernerpaaq

Kommueqarfik Sermersuup juullimi ammartagaa juullernissaata tungaanut ingerlavoq. Kommunalbestyrelsimi ilaasortat apersornikuuagut ukiup ingerlanerani suliaminni suut nuannarinersaasimaneraat aamma inuunerminni juullimi eqqaamasaminni suna nuannernersaanersoq.

Kommunalbestyrelsemi Inuit Ataqatigiillu suleqatigiinnissamik isumaqatigiissuterput suli attakkatsigu nuannaarutigaara. Pingaarutilinnik imaqarpoq, soorlu kommunimi innuttaasunik sullissinerup qaffassarneqarnissaa qaffasitsumillu ingerlanneqarnissaa, nunaqarfimmi illoqarfimmiluunniit sorlermi najugaqarneq apeqqutaatinnagu.

Kommunimi pingaartipparput eqqaaveqarfitta torersarneqarnissaat tamannalu nuannareqaara. Kommuneqarfik Sermersuumi illoqarfiit nunaqarfiillu Kalaallit Nunaanni siullernut ilaallutik, ajornartorsiummik tamatumannga aaqqiiniartunut ilaalissammata. Nuannaarutigisamma aamma ilagaat kommunip takornariaqartitsinermik inuutissarsiortunik tapersersuinera, tamannalu ingammik Tasiilap eqqaani malugineqarsinnaavoq.

Juullimi eqqaamasanni nuannernersaraat, sakimma maanna qimagutereersup Karl Piivaap, katersugaasivimmi juullerpalaartitsisarsimanera. Tassani juullimut orpiliortarnikuuvoq, sanigutip ipua orpikkallu atorlugit. Assut tamanna maqaasisarparput. Pingaartissimavaa, ullumikkut meeqqanut inuusuttunullu, qanga nammineq nalimini juullip orpiata qanoq isikkoqartarsimanera takutissallugu.

Aasaru nammineerlunga misilikkusuppara paarnaqutinik katersillunga, namminerlu juullimut orpiliorlunga.


Kommuneqarfik Sermersuup juullimi unammisitsinerani #julenuuk-mut peqataanissat eqqaamajuk. Hashtag #julenuuk atorlugu Facebookimut Instagramimulluunniit assimik ikkussiguit unammisitsinermut peqataassaatit.