Qatanngutigiit pingasut – inissiat 51-it

Assut soqutiginartillugu Kommuneqarfik Sermersuup matumuuna suliniut pissanganartoq pilersaarusiornermut inatsit nutaaq naapertorlugu tusarniaassutigaa.

Kommunalbestyrelse ullormi 21.11-imi aalajangerpoq suliniut “Qatanngutigiit pingasut – inissiat 51-it” sapaatit akunnerini arfineq pingasuni piffissami 13.12.2017-imit 07.02.2018-imut tusarniaassutiginiarlugu.

QATANNGUTIGIIT PINGASUT – INISSIAT 51-IT
Suliniummi ilaapput inissiat quleriiaallit pingasut tamarmik arfinilinnik quleriiaallit inissiartaalu 17-it, katillugit inissiat 51-it. Taakku saniatigut suliniummut ilaavoq nunaminertat sanaartorfiunngitsut tamanit sukisaarsaarfigineqarsinnaasut.

Suliniuteqarfik ullumikkut soqutigisaqartumit inuussutissarsiorfittut atorneqarpoq. Kommunimut pilersaarummi sermersooq2028.gl-imi sumiiffik A-p iluaniittutut nalunaarsugaavoq, taamaalilluni inissialiorfissatut illikartinneqarsimalluni. Taakku saniatigut kommunimut pilersaarummi sermersooq2028.gl-imi eqimasuutitsinissaq isiginiarneqarsimavoq Nuummi ineriartornermi imminut napatittumik pilersitsiniarnermi pingaaruteqarluni. Taamaammat kommunimut pilersaarummut suliniut naapertuuppoq.

Kommuneqarfik Sermersuup suliniut kajuminnaraa ilaatigut Nuummi inissaaleqisoqarnera ilaatigullu illussanik titartagartaa, angissusaa ilusaalu sumiiffimmi sanaartukkanut tulluuttuummata. Taakku saniatigut pitsaasuuvoq illut akornanni sammisassaqartitsiniutinik pilersitsisoqarnissaa sulissutigineqarmat.

Suliniut kommunip nittartagaanit sermersooq.gl-imit aaneqarsinnaavoq

PILERSAARUSIORNERMUT INATSIT NUTAAQ
Pilersaarusiornermut inatsit nutaaq 01.01.2016-imi atuutilerpoq tassanilu Naalakkersuisut kommunillu Kalaallit Nunaanni inuussutissarsiutinik inerisaanermi siuarsaanermut ilaavoq aningaasaliisarnermik pisariillisaanikkut kajumissaanikkullu. Maanna periarfissaalerpoq pisortat pilersaarusiornerat taassumalu kingorna nunaminertanik atorneqanngitsunik nalunaaqqaarnissaat utaqqeqqaarnagu nunaminertanik pisariinnermik pissarsisoqarsinnaalerpoq.

PILERSAARUSIORNERMUT INATSIT NUTAAQ IMA SULERIAASEQARFIUSUTUT NASSUIARNEQARSINNAAVOQ:
• Soqutigisaqartoq Kommunalbestyrelsimut (kommunimut) suliniummut qinnuteqaammik nassiussissaaq.
• Suliniut kommunalbestyrelsip nalilersorlugulu akuerissavaa.
• Kommunalbestyrelsip suliniut pillugu sapaatit akunnerini ikinnerpaamik arfinilinni tusarniaatigissavaa kommunalbestyrelsip suliamut tunngasunik kinaassusersiunngitsunillu piumasaqaatai ilanngullugit, ilaatigut qinnuteqartut nutaat naammassisassaat.
• Tusarniaanermi innuttaasut tusarniaanermut akissuteqaatinik, akerliissutinik suliniutinilluunniit allanut toqqagassanut nassiussisinnaapput.
• Tusarniaanermi akerliissuteqartut allanilluunniit suliniutinik saqqummiussaqartut tunuliaqutaralugit suliamut tunngatillugu naliliinikkut suliniut pitsaanerpaaq toqqarneqassaaq.
• Soqutigisaqartoq nunaminertamik ukiut marluk tikillugit immikkoortitsisinnaassaaq aningaasalersornerata inissisimanera uppernarsarneqarsinnaappat.
• Nunaminertamik atuinissamut inniminneeqqanerup nalaani, immikkoortoq pillugu soqutiginnittoq nammineerluni kommunimut pilersaarummut tapiliussaliussaaq, pilersaarusiassallu angissusaa assigisaaluunniit peqqutaallutik avatangiisinut tunngatillugu nalilerneqartariaqarpat, soqutiginnittoq SMV-mik suliaqassaaq, tassa avatangiisinut naliliinermi periaasissaq, imaluunniit
VVM-imik.

Pilersaarusiornermut inatsimmi nutaami allannguutini eqqaamaneqassaaq suliniutit kommunimut pilersaarummut politikkikkulluunniit anguniakkanut akerliuppata kommunalbestyrelsip qaqugukkulluunniit itigartissinnaammagit.

Pilersaarusiornermut inatsit uani atuarneqarsinnaavoq: nanoq.gl, »Inatsisartut inatsisaat nr. 34 9. december 2015-imeersoq« aamma »Pilersaarusiorneq aamma nunaminertat atorneqartarnerat pillugit Inatsisartut inatsisaat nr. 17, 17. november 2010-meersoq«

OQAASEQAATIT, AKERLILIISSUTIT SULINIUTILLUUNNIIT ALLAANERUSUT
Oqaaseqaatit, akerliliissutit suliniutilluunniit allat uunga nassiunneqassapput plan@sermersooq.gl 07.02.2018 tikitsinnagu.

Suliniutaajunnartut allat sukumiisumik allakkatigut titartagartalersuinikkullu nassuiaaserneqarsimassapput taakkulu saniatigut kommunip suliniutinut qinnuteqaateqartunut allattuivia aamma naammassineqarsimassaaq.

Kommunip suliniutinut qinnuteqaatinut allattuivia kommunip nittartagaanit sermersooq.gl-imit aaneqarsinnaapput.

NAAMMAGITTAALLIUUTEQARNISSAMUT ILITSERSUUT
Kommunalbestyrelsip aalajangiinera naammagittaalliuutiginiaraanni naammagittaalliuut Naalakkersuisunut saaffiginnissutigineqassaaq:

NAALAKKERSUISUT,
Aningaasaqarnermut Naalakkersuisoqarfik;
Pilersaarusiornermut immikkoortortaq;
Postboks 1037,
3900 Nuuk.

Saqqummiussisoqareertillugu naammagittaalliuut kingusinnerpaamik sapaatit akunneri arfineq-pingasut qaangiutsinnagit nassiunneqareersimassaaq.

PDF