Meeqqanut ilaqutariinnullu Ingerlatsivimmi pisariillisaaneq

Meeqqanut Ilaqutariinnullu Ingerlatsivik aqqissuuteqqinneqarpoq, tamannalu ilaatigut isumaqarpoq isumaginninnermi immikkut ilisimasalinnik suleqatigeeqalernissaa meeqqanillu atugarissaannginnerusunik illersuinerulernissaq.

Meeqqanik ilaqutariinnillu atugarissaannginnerusunik sullissineq pitsanngorsarneqassaaq, taamaattumillu Kommuneqarfik Sermersuumi oqartussaaffeqarfik taanna nutaamik aaqqissuussiffigineqarpoq.

Ineriartortitsinermut pisortaq Helene Horsbrugh: – Aaqqissuussinermi nutaami isumaginninnermut tunngasunik immikkut ilisimasalinnik sulisoqalertussaavoq, tamannalu sullissinermi pisariillisaataassaaq taamaattumillu naggataatigut meeqqat atugarissaannginnerusut pitsaanerusumik illersugaalissapput, taakkuummatami sullitassatta pingaarnersaat.

Qaninnerusumik suleqatigiinneq

Ullumikkut meeqqanut ilaqutariinnullu immikkoortortat pingasut assigiinngitsut tassaapput Nuummi, Tasiilami Paamiunilu. Siunissami immikkoortortaq ataasiinnaalissaaq.

– Sulisut eqqarsaatigalugit ungasinnerusoq eqqarsaatigalugu illoqarfinni allani suleqatit qanimut suleqatigineqalissapput, aammalu ulluinnarni sulianut tunngasunik aqutsineq annertunerusumik aallunneqalissalluni. Allannguut tamanna sulisut namminneerlutik ujartugaraat, Helene Horsbrugh oqarpoq.

Aaqqissuusaaneq illoqarfiit akimorlugit ingerlanneqassaaq, tassuuna innuttaasut tamarmik sumi najugaqarneq apeqqutaatinnagu kiffartuunneqarnerat assigiimmik qaffasissuseqaqqullugu. Aaqqissuusaaneruttaaq kommunimi tamani meeqqat inatsisitigut taperserneqarnissaanik piumasaqaatit eqquutsitsinissaanik periarfississavaa – pingaartumik isumaginninnikkut sullissinermi misissuisarnerni periusissatullu pilersaarutini piffissamik killigitinneqartartut piumasaqaatillu nutaat peqqutaallutik.