Sermersuumi pitsaasumik attaveqaqatigiittarnissaq isumaqatigiissutigineqarpoq

Kommunalbestyrelsimi qinikkatut sulinermi pitsaasumik attaveqaqatigiittarnissaq ataatsimoortunillu malittarisassaqarnissaq qulakkeerniarlugu, qinikkatut sulinermi pitsaasumik attaveqaqatigiittarnissamut ataatsimoortumik malittarisassaliortoqarpoq.

Malittarisassat kommunalbestyrelsep tamarmiullutik akueraat. Borgmester Asii Chemnitz. Narupip malittarisassaliornissaq pillugu siunnersuutaa marsi 2017-imeersoq naapertorlugu.

Kommunalbestyrelsip akuersissuteqarneratigut kommunalbestyrelsimut ilaasortat qinikkatut sulinerminni paaseqatigiillutik malittarisassanik atuinissaminnut pisussaaffeqartilissapput.

Inassuteqaatigineqarpoq, kommunalbestyrelsimut ilaasortat pisariaqartillugu malittarisassanik atorluaasassasut.

”Nuanneqaaq qinikkatut sulinitsinni tamatta pitsaasumik attaveqaqatigiittarnissarput tapersersorsinnaagatsigu, naak aamma tamatigut politikkikkut isumaqatigiittanngikkaluarluta”, Asii Chemnitz Narup oqarpoq.

Malittarisassani innersuussutit qulingiluat qulequttanut pingaarnernut pingasunut agguataarneqarput, kommunalbestyrelsimi sulinermi qinikkatut sulinermi najoqqutassat ilaattut.

Kommunalbestyrelsimi namminermi sulineq

  1. Immitsinnut ataqqeqatigiissaagut
  2. Aalajangersimasunik siunnerfeqarluta, periuseqarluta politikkeqarlutalu sulivugut.
  3. Kommunalbestyrelsip aalajangigai ataatsimoorluta akisussaaffigaavut

 

Kommunalbestyrelsip avatangiisitsinnik suleqateqarnera

  1. Oqaloqatigiinneq peqataatitsinerlu atorlugit sulivugut
  2. Qaffasissumik paasissutisseeqatigiittarpugut (oqaatsit marluk atorlugit)
  3. Kommunip siuariartornissaanut kikkulluunniit siunnerfilimmik peqataajumasut tamaasa suleqatigaavut.

 

Kommunalbestyrelsip allaffeqarfiullu ataqatigiinnerat

  1. Paasissutissinneqarluarsimaneq tunngavigalugu aalajangiisarpugut
  2. Politikkikkut aqutsineq allaffissornikkut sulianik ilisimanninnermit immikkoortissavarput.
  3. Allaffeqarfik unneqqarissoq tatiginartorlu suleqatigaarput

 Innersuussutit qulingiluat takussutissami ataaniittumi takuneqarsinnaapput: