Innuttaasunut

Arnanut meeqqamullu toqqissisimanartoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Atoqqaarfissiortitsineq: Ullumi Tasiilaq qimarnguvittaarpoq. Qimarnguvik arnanut meeqqanullu nakuusernermik tassasnngaannartumik eqqugaasunut neqoroorutaavoq.

Qimarnguvik arnanut meeqqannullu nakuusernermik eqqugaasunut tuaviortumillu toqqissisimanartumik sumiiffissaminnik amingaatilinnut siniffissaqartitsivoq.

Kommuneqarfik Sermersuumi kommunalbestyrelsi 2016-imut missingersuummi, Tunumi illoqarfiit annersaanni qimarnuvimmik pilersitsisoqarnissaanut ingerlatsisoqarnissaanullu aningaasanik immikkoortitsivoq. Qimarnuvik ”Kattunneq – Grønlands Krisecentre” suleqatigalugu piviusungortinneqarsimavoq.

”Kattunneq – Grønlands Krisecentre” danskit kalaallillu akornanni suleqatigiiffiuvoq, Mary Fonden, Danner, Kalaallit Nunaanni qimarnguviit, Mælkebøttecentret, sumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoqarfik aamma OAK Foundation Denmarkimit peqataaffigineqartoq. Aappariit akornanni nakuusernermik akiuiniarnermik Kalaallillu Nunanni qimarnuvinni aqutsisunik sulisunillu pikkorissaanissamik suliniut siunertaqarpoq.

Tasiilami qimarnguvimmi arnat meeqqallu nakuusernermik eqqugaasimanerminni eqqugaanissaminnulluunniit navianartorsiorlutik pinartumik pisariaqartitsinermikkut, illersungaaffigisinnaasaminnik unnuisinnaapput. Tamatuma malitsigisaanik arnat nakuusernermik eqqugaasut qimarnguiviup ilaqutariinnut siunnersortaanit, qimarnguvimmi toqqissisimasumi ikiorneqartassapput. Inooqatigiinneq inuunermilu atugarisat allat pillugit sulisut oqaloqatigineqarsinnaassapput.

”Ajoraluartumik arnarpassuit angerlarsimaffimmi nakuusernermik eqqugaasarput. Arnat kisimik eqqugaaneq ajorput, amerlasoorpassuartigut meeqqat aamma eqqugaasarmata. Tamanna nammineerluni alianartuuvoq. Taamaammat nuannaajallannarpoq ullumimiit, Tasiilami arnat meeqqallu pinartumik illersorneqarnissaminnik pisariaqartitsisut, toqqissisimaarfigisinnaasaannik neqeroorfigisinnaaleratsigit. Ullumikkut ulloq pilluarnartuuvoq, ” Uju Petersen (IA), Kommuneqarfik Sermersuumi Meeqqanut Ilaqutariinnullu ataatsimiitiami siulittaasoq oqarpoq.

Tasiilamiit kommunalbestyrelsemut ilaasortaq Mala Høy Kuko (S), qimarnguvimmik ammaanersiornermi oqalugiarpoq, politiinit peqqinnissaqarfimmiillu najuuffigineqartumik.

Qimarnguvittaaq atserneqarpoq ”Naaqqavi”.