Torersaanersuaq qaqutigoortoq naammassineqartoq

Nuup oqaluttuarisaanerani torersaaneq annerpaaq naammassineqarpoq, taamaalilluni inissianut suliffeqarfinnullu nutaanut inissaqalerluni.

Nuuk Imerup eqqaani containeriisivik, Qasigiannguani umiatsialivik Naluttarfiullu Maliup eqqaa allanngorluinnarsimapput. Inaarutaasumik torersaanissaq kisimi amingaataalersimavoq, inissiiviusimasut siunissami siunertarisassaminnut piareersarneqannginnerini. Illoqarfiup ilaanut pilersaarut naapertorlugu piffiit pineqartut inissianik inuutissarsiorfissanillu sanaartorfigineqassapput.

Qinngorpumi Nuuk Transportip eqqaani inissiivissaq, nunap sivinganera malillugu quleriaanik immikkoortitikkamik sanarfineqarsimavoq umiatsiallu ataasiakkaat angujuminarnerulersimallutik. Innuttaasut julip 10-ianili containeriutitik umiatsiatilluunniit tassunga ilissinnaalersimavaat. Maannamut inissiinissamut akuersissutinik 330-it sinnerlugit tunniussisoqareersimagaluartoq, suli inissaqarluarpoq.

Suliaq annertujaartoq

Sanaartornermut Avatangiisinullu Ingerlatsivik naapertorlugu umiatsianik atortunillu nuussuineq pilersaarutit naapertorlugit ingerlanneqarsimavoq. Ingerlatsivik januarimili suliassamut piareersalersimavoq paasisitsiniaanermillu ingerlataqarsimalluni. Paasisitsiniaaneq tusagassiuutitigut sapaatip akunnerini qulini ingerlanneqarpoq. Suliaq tamaat isigalugu, Kommuneqarfik Sermersuup ukiuni kingullerni suliarisimasaani annerpaat ilagisimavaat.

Containerit umiatsiallu tamaasa nalunaarsorneqarnissaat, Sanaartornermut Avatangiisinullu Ingerlatsivimmi sulisut suliassarisimavaat, taakkunannga piginnittut nassaarisinnaajumallugit. Qasigiannguani umiatsialivimmi umiatsiat 200-t sinnerlugit qaqissimasuutigineqarsimapput.

Taakkua ilaqarsimapput inuttassarsiuukkaluarlugit qisuariarfigineqanngittunik. Containerit umiatsiallu inuttaminnit nuunneqanngittut, maanna Nukappiakulummi matoqqasumik inissiiviugallartussamut ilineqarsimapput. Umiatsianik containerinillu piginittut qaammatinik pingasunik periarfissinneqarput pigisaminnik ujartuinissaminnik. Containeri kingullerpaaq oktobarip 22-iani nuunneqarpoq umiatsiarlu kingulleq novembarip 9-ni Qasigiannguani umiatsialivimmit nuunneqarluni.

Vilhelm Lynge Hard, Kommuneqarfik Sermersuumi Nunaminertanut Illuliornermullu Oqartussani Immikkoortortaqarfimmi Pisortap suleqatinilu suliaq piffissamik annertuumik atuiffigisimavaat. ”Maannakkut 20 fods containerit 70-it missaat 40 fods containerillu sisamat immikkut inissiigallartarfimmiipput, taakkunanngalu piginnittut kaammattussavagut piaarnerpaarmik uatsinnut saaffiginneqqullugit”, Vilhelm Lynge Hard oqarpoq.

Sanaartornermut Avatangiisinullu Ataatsimiititami siulittaasup Malene Lyngep nuussuinerup naammassisimanera nuannaarutigaa:

”Inissianik amerlanerusunik pisariaqartitsineq illoqarfiillu pingaarnersaanni inuussutissarsiortunut atungassarititaasunut pitsaanerusunik sinaakkusersuinissaq, Nuup illoqarfittut ineriartortinneqarnerata malitsigai. Tamatuma anguniarnerani Nuummi nunaminertanik pingaarutilinnik imaajaanermi alloriarneq siulliuvoq”, Malene Lynge oqarpoq.