Suliniummi ”Kulturikkut isumassarsiorfik – atuarfeqarfinnut kiffartuussivik” ulluinnarni atuartitsinermi nutaaliorsinnaanermik, atuartitsissutinillu kulturimut tunngasunik neqerooruteqarpoq.

Nuutoqqami pisuttuarnermi nunatsinni illoqarfiit pingaarnersaata oqaluttuassartaa paasisassarsiorfigiuk. Uaajeertunut qilaatersortunullu peqataanermi kalaallit kulturikkut oqaluttuassartaat ilisimasaqarfigineruleruk. Nuummi eqqumiitsulianik saqqummersitsivik pulaaruk, kulturilu maluginiutit atorlugit misigisassarsiorfigiuk.

Qulaani taakkartorneqartut tassaapput Kommuneqarfik Sermersuumit meeqqat atuarfiannut  neqeroorutigineqartut, suliniummi ”Kulturikkut isumassarsiorfik – atuarfeqarfinnut kiffartuussivik”. Suliniummi eqqumiitsuliortut kulturikkullu suliaqartut qanimut suleqatigineqarput. Anguniarneqarpoq nutaaliorsinnaaneq kulturikkullu sammisaqartitsinerit atuartitsinermut ilanngunneqarnerunissaat.

Kulturimut isumassarsiorfiup atuarfinnut kiffartuussivittaa Kommuneqarfik Sermersuumit ataqatigiissaarneqarpoq. Suliniutip ukkatarissavai, najukkami kulturikkut suliaqartut eqqumiitsuliortullu, atuarfeqarfinnut  neqeroorusiorsinnaanerat tapersersussallugu. Eqqumiitsuliortut kulturikkullu suliaqartut ataatsimoorussamik attaveqarfiliorput, ilisimalikkanik avitseqatigiiffiusumik kiisalu suleqatigiiffiusumik.

”Kulturikkut isumassarsiorfik neqeroorutaasoq, nuannaarutigalugu meeqqat atuarfiinut tikilluaqquara, neriuppungalu atuarfiit amerlasuut kajumigalugu atorluarumaaraat. Neqeroorutit assigiinngitsut amerlasuut , kulturikkut isumassarsiorfimmi neqeroorutigineqartut , fagiini pinngitsuugassaanngitsuni soorlu kalaallisut, qallunaatut, inuiaqatigiilerinermi allanilu atuartitsissutini nutaaliorfiusuni ilanngunneqarsinnaapput. Atuartitsinernut nalinginnaasunut nutaanik paasisaqarfiulersitsisinnaallutik, kiisalu meerartatta inuusuttortattalu nutaaliorsinnaanerinut alapernaasernerulernerannullu ammaasseqataasinnaallutik,” Asii Chemnitz Narup, Kommuneqarfik Sermersuumi borgmesteri oqarpoq.

Kommuneqarfik Sermersooq atuarfeqarfinnut nittartakkamik suliaqarpoq, neqeroorutinut paasissutissanik katersiviusumik. Nittartakkami tassani ilinniartitsisut atuartitsinerminni atorsinnaasaminnik isumassarsiorsinnaapput.

Neqeroorut aallaqqaataasumik Nuummi atuarfeqarfinnut neqeroorutaassaaq. Siunissaq ungasinnerusoq eqqarsaatigalugu, suliniut Kommuneqarfik Sermersuumut tamanut siammarterniarneqarpoq.

Kulturikkut isumassarsiorfik – atuarfeqarfinnut kiffartuussivik