Ukioq manna ilungersuussilluartut toqqangaasut

Sisamanngormat 2017-imi Ilungersuussilluartut Nuuk Centerimi,  kusanartumik aaqqissuunneqarsimasumik toqqarneqarput.

Aaqqissuussinermi kaageqarsimavoq, kaffeqarluni, imeruarsaatissaqarluni aliikkusersuisoqarlunilu, aaqqissuussinermilu najuuttut ilaatigut Malu & Rita Band nipilersortut borgmesterillu Asii Chemnitz Narupip ukioq manna ilungersuussilluartunik ilisarititsinera pinnattaassiineralu takusinnaasimavaat.

”Ukioq manna nersorniagassatut innersuunneqarsimasut marloriaatingajanngorsimapput,” Bormester Asii Chemnitz Narup oqalugiaatimini aallaqqaataasumik oqarpoq. ” Arlallillu piukkunnaqimmata ataatsimiititamit aalajangerniarneq pikkunarsimaqaaq – tuppallernarlunili, kommunitsinnimi nutaaliornermik immitsinnut tapersersortarnitsinnik naleqartitsisarnitsinnillu ileqqutsinnik takutitsisuummat.”

Borgmesterip eqqaasitsissutigaa, ulluinnarni ilungersuussilluartuusunik annertuumillu pilliuteqartuartunik inuppassuaqarmat: ” Tamannalu ullumi nalliussiniarlugu katersuuppugut – ilungersuusilluartartut suliniutit piumassuseqarnerlu akornatsinniittut nalliussiniarlugit katersuuppugut. Ilungersuussilluarneq imaanngilaq pilersitsineruinnaasoq kaammattoqatigiinnermilli ajornartorsiuteqartunut periarfissaqanngitsunulluunniit ikiuisinnaanermik imaqarnera ullumi aamma uppernarsissavarput … Immitsinnut naleqartinnissarput maluginiartarnissarpullu eqqaamassavarput, ulluinnatsinnimi inuppassuit naappittakkavut, arlaatigut namminiussutsiminnik ilungersuussilluartuupput, ullumikkullu inuiaqatigiinni tamanna nalliussissavarput.”

Ukioq manna ilungersuussilluartutut siullermik toqqangaasimavoq Sika Charlotte Mare Lynge, qasujaalluni uumasut atungarissaarnerulernissaannik sullissiuarsimaneranik nersorniarneqartoq. Nersornaaserneqarnissaanut tunngavilersuummi ilaatigut imatut allaqqavoq:

Kalaallit Nunaani Uumasut ikinngutaat uumasunik suliaqartut assigiinngitsut peqatigalugit qimmit toqunneqarnissaat pinngitsoortittarsimavai ilaatigut taakku paarinerlunneqartut kissaatigineqanngitsullu  Danmarkimut inuttassaanut allanut apuuttarlugit. Sika nammineq piumassutsiminik aningaasarsiaqaranilu nalunaaquttap akunnerpassui atorlugit suliaqartarsimavoq, Kalaallit Nunaani Uumasut Ikinngutaani piumassutsiminik suliaqartartut peqatigalugit, uumasunik suliaqartut allallu uumasut toqqissisimanartumik avatangiiseqartinnissaannut qulakkeerinnissinnaasut piffissaq sivisooq atorlugu attaviginiartuartarsimavai. Qimmit Nuummiit ilaqutarsiassaanut nassiunniartarneri suliniutaavoq annertooq, tamannalu nersorneqassutissatsialaavoq.

Ukioq manna Ilungersuussilluartut nersorniarneqartartoq tassaavoq Helena Jensen. Nersorinninnermilu tunngavilersuut ilaatigut imatut nipeqarpoq:

Ukiut tamaasa angerlarsimaffeqanngitsunut Juullisiortitsinissamik aaqqissuussinissamik pingaartitsisoq. Juulli nallerpallaartinnagu nammineq piumassutsiminik aaqqissuussisarpoq, arnaavoq patajaatsoq isumassuinissarlu uummateqarfigalugu.   Suliniuteqartarnera nuannaartorinarpoq Nuummilu angerlarsimaffeqanngitsut nuannersumik Juulliararsiorluarnissaat anguniartarlugu.

Ilungersuussilluartumut nersornaat
Nersornaat ukioq manna Kommuneqarfik Sermersuup, innuttaasumut kommunimi inunnut allanut iluaqutaasumik immikkuullarissumik iliuuseqarsimasumut tunniutissuaa. Ilungersuussissulluartutut nersornaammik tigusisussatut naatsorsuutigineqassagaanni iliuuserisimasat, illoqarfimmi, nunaqarfimmi kommuniluunniit tamaat isigalugu inuiaqatigiit ataatsimoornerannut iluaqutaasimassaaq. Ilungersuussilluartup suliarisimasai inuussutissarsiornermiissapput, kultureqarnermi inunnilluunniit isumaginninnermiissallutik.