2018-imut missingersuut: meeqqanut inuusuttunullu inooqataanikkut ajornartorsiortunut aningaasaliissutit

Kommuneqarfik Sermersuumi kommunalbestyrelse ilaatigut atornerluinermik katsorsaanermut ikiuigasuarnissamullu upalugaarsinamermut aningaasanik immikkoortitsivoq.

Kommuneqarfik Sermersuumi meeqqat inuusuttullu ukiup tulliani aningaasaqarnermut missingersuummi kommunalbestyrelsemit salliutinneqarput. Suliniutigineqartut 2018-imullu missingersuummi ilaatinneqartut uani eqikkaavigineqarput.

Atornerluisunik katsorsaaneq

Meeqqat inuusuttullu 18-it inorlugit ukiullit akornanni atornerluisutut katsorsarneqarnissamik pisariaqartitsineq annertusiartortoq, Kommuneqarfik Sermersuumit maluginiarneqarpoq. Ullumikkut taakkunannga ikiuiniarneq ajornakusoorpoq, atornerluinermik katsorsaanissamik tulluartumik neqeroorummik peqanngimmat.

Kommuneqarfik Sermersuup Allorfik – Pinngitsuuisinnaaneq Pillugu Ilisimasanik Siammarterivik peqqinnissaqarfillu, meeqqanik inuusuttunillu tulluartumik atornerluinermik katsorsaasarneq pillugu suleqatigerusuppai. 2018-imut missingersuummi 1 millionit koruunit ukiullu tulliini ukiumut 800.000 koruunit immikkoortinneqarsimapput. Aningaasaliissutit sulisunik marlunnik amerlilerinermut atorneqassapput.

Nakkutigineqarluni pulaartoqarneq

Meeqqat inuusuttullu nakkutigineqarlutik angajoqqaaminnik najorneqarnissaminnik pisariaqartitsisut sullinneqarnerat aaqqissuussagaanerusumik ingerlanneqartariaqarpoq. Nakkutigineqarluni pulaartoqarsinnaanerup, meeqqap angajoqqaaminik attaveqarsinnaatinaanera qulakkeertarpaa. Pulaartoqarnerup nalaani Kommuneqarfik Sermersooq meeqqap toqqissisimanissaa akisussaaffigaa.

Ukiup tulliani ukiunilu aggersuni missingersuutinut 300.000 koruunit immikkoortinneqarsimapput, taakkulu sulisumik ataatsimik naleqarput.

Inuussuttunik siunnersorti saniatigut ataaseq

Kommuneqarfik Sermersooq arlalinnik inuusuttunik siunnersorteqarpoq. Inuusuttunik siunnersortit, inuusuttut ineriartornermikkut ikiorneqarnissaminnut kommuunimit innersuunneqarsimasunik ikiuisarput. Ikiuineq assersuutitut inuusuttup atornerluinermit pinerlunniarnermilluunniit qimagutsinniarneranik timitaqarsinnaavoq. Inuusuttunik siunnersuisut piffissaasa ilaa annertusiartortoq, inuusuttunik killisiorneqarnerni, eqqartuussivinni najuunnerni inissiigallarnerniluunniit ikiuunnernut atorneqartarpoq.

Taamammat Kommuneqarfik Sermersuup suliassaqarfik sulisumik ataatsimik amerlisaavigaa, suliassat amerliartortut meeqqat inuusuttullu sullinneqarnerannut sunniutinnginniassammat. 2018-imi missingersuummi  ukiunilu tulliuttuni  300.000 koruunit immikkoortinneqarsimapput.

Ikiuigasuarnissamut upalugaarsimaneq pitsaanerusoq

Meeqqanik inuusuttunillu ikiuigasuarsinnaanermik upalugaarsimaneq Kommuneqarfik Sermersuumit suliassatut salliusussatut isigineqarput. Tamanna meeqqanik inuusuttunillu annertuumik pinartumillu ajornartorsiuteqartunik tarnikkut ikiuigasuarnerusinnaavoq.

Ukiup tulliani ukiunilu tulliuttuni missingersuut, angalanermut aningaasartuutinut, nakkutilliinermut ajornartorsiuteqartunullu ikiuisinnaasunik pikkorissaasarnissanut 800.000 koruunit immikkoortinneqarput.