Sermersooq: Sumiginnaaneq missingersuutinut sunniuteqarpoq

Kommuneqarfik Sermersuumi ukiup tullianut missingersuut akerliunertaqanngittumik isumaqatigiissutigineqarpoq. Ilaatigut imarai 12 millionit koruuninik sinneqartoortoqarnissaa akileraarutillu allanngunnginnissaat.

Novembarip 21-iani missingersuut 12 million koruuninik sinneqartoorfiusoq, Kommuneqarfik Sermersuumi kommunalbestyrelsip isumaqatigiissutigaa. Tamanna 25 million koruuninik sinneqartoornissamik, kommunip naliginnaasumik missingersuusiortarnerinit affaata missaanik annikinneruvoq, taakkununngali tunuliaqutaavoq meeqqat inuusuttullu sullinneqarnerannik annertusaasimaneq.

Susassaqarfik 60 millionit koruuninik qaavatigut immikkoortitsivigineqarsimavoq, tassani aningaasaliissutit katillugit 203 millionit koruuninngorlutik. Tamanna isumaqarpoq kommunip missingersuutaasa arfineq pingasorarterutaat meeqqanut inuusuttunullu inissinneqarallarsimasunut atorneqassasut.

“Ukioq manna missingersuusiap suliarinerani, misigissutsit tamalaat aqqusaarsimavagut. Aningaasaliissutit pisariaqartinneqartut immikkoortissinnaasimagatsigit nuannaarutigaara, tanngassimaarutigaaralu meeqqat atugarliuuteqartut ikiorneqarnissaannut kommunalbestyrelsemi naaggaanngisaannarsimagatta, ukiulli tamaasa pisariaqartitsinerup alliartornera alianartutut isigaara,” borgmester Asii Chemnitz Narup oqarpoq.

60 millionit koruunit inissiigallartarnermut immikkoortinneqarsimasut saniatigut, ukioq manna missingersuut aningaasaliinernik nutaanik 13,5 millionit koruuniusunik ilaqarput, meeqqat inuusuttullu atugarliortut sullinneqarnerannut nukittorsaataasussat.

Meeqqanik sullissinerup ineriartortinneqarnissaanut pilersaarutip, tamatumani sulinerup pitsanngorsaavigineqarnissaanut ukiaanerani aallartisarneqarsimasup, suliarineqarnissaanut 7,5 millionit koruunit immikkoortinneqarsimapput. Tamatuma saniatigut Meeqqanut Ilaqutariinnullu Ingerlatsiviup naliginnaasumik nukitsorsaavigineqarnissaanut 6 millionit koruunit immikkoortinneqarsimapput.

“Aprilimi qinersinerup kingorna suleqatigiinnissamik isumaqaitigiissutitsinni naqissuserparput, uani qinersivimmi meeqqat pingaartitat annersarissagaat. Tamanna soorunami isumaqarpoq, immikkoortortap aningaasaliiffigineqarnissaa. Allatut pigaluarutta unneqarissaarnerussanngilaq. Taamaammat kommunalbestyrelsip tamarmiusup anguniakkagut tapersersorai takullugu nuannerpoq,” Asii Chemnitz Narup oqarpoq.

2018-imut missingersuut akerliusortaqarani isumaqatigiissutigineqarpoq. 12 millionit koruuninik sinneqartoortarnissaanik aamma kommunimut akilaarutip 26 procentiusup allanngunnginnissaanik imaqarpoq.