Asii: Eqqartuussassanngortitsineq taamaatiinnarneqartoq silatusaarneruvoq

Eqqartuussassanngortitsinerup taamaatiinnarneqarnera borgmesterimit tamakkiisumik ilalerneqarpoq.

Eqqartuussassanngortitsinerup taamaatiinnarneqarnera Kommuneqarfik Sermersuumi borgmesterimit ilalerneqarpoq.

”Apeqqut eqqartorparput aammalu isumaqatigiissutigalugu siunertarineqartut eqqortuusinnaagaluartut aaqqiiniarneq taamaattariaqanngitsoq”

”Siorarsiorfiup aalajangiiffiginissaanut tunngavissap kommunimi atorfilittarpassuarnit piareersarneqarsimasoq tamanut pitsaanngitsumik saqqummiunneqarnera aammalu eqqunngilluinnartumik tunngavilerneqarnera kommunaldirektørimit mamiagineqartoq nipaatsumik akueriinnarneqassanngitsoq pingaartippara. Uanga paasinninnera naapertorlugu, kommunimi sulisut arlaannaannulluunniit attuumassuteqanngitsumit tamat takusinnaasaannik isorineqarlutik pineqarnerat Lars Møller-Sørensenip akisussaaffeqarfigalugit qisuariarpoq.”

”Taamaattoq eqqartuussassanngortitsineq eqqortuusorinanngilaq. Aamma kommunaldirektøri maannakkut taamatut isumaqarpoq, taamaammat eqqartuussassanngortitsineq piaartumik tunuartinneqarpoq.”

Suliaq qineqqusaarnermit aallaaveqarpoq, ilaatigut Siorarsiorfik aalajangiiniarnermullu suliaq pillugu paasissutissat eqqunngitsut arlallit saqqummiunneqarlutik.

”Suliap matuma ingerlarnga pillugu Siumumi ilaasortamit nassuiaqquneqarpoq, tamannalu paasilluarpara aamma ajunngilluinnarpoq. Tamanna suliaralugu ingerlanneqarpoq”

”Qineqqusaarnerup nalaani pisuutitsiniarnerpassuaqarlunilu kukkusumik oqariartuuteqartoqarpoq maannakkut puigorneqareersunik. Atorfilittanik pikkorissunik sulisoqarpugut, taakkulu ullut tamaasa politikkikkut aalajangiinissatsinnut piukkunnartunik sapinngisartik tamaat sulissutiginnittunik. Taamaammat politikkikkut aalajangernissamut atorfilittat suliaat suliatigullu siunnersuuteqartarnerat tunngavissaqanngilluinnartumik tamanut saqqummiunneqarnerat atorfilittatta misigissanngikkaat pingaaruteqarluinnarpoq. Taamaattumik kommunaldirektøri suli tamakkiisumik tatigaara, taassumami sulisut isumagai, aamma naak eqqartuussassanngortitsineq pissusissamisoornerpaanngitsoq pillugu isumaqatigiinngikkaluaruttaluunniit.”