Innuttaasunut

Asiip akileraarutitigut suliniutit mianersoqqussutigai

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Ullut sisamaannaat atorlugit Naalakkersuisut akileraarutit pillugit inatsisinik allanngortitsiniarnerat, Kommuneqarfik Sermersuumi Borgmesterip, Asii Chemnitz Narupip eqqasuutigaa.

Mittarfinnik nutaanik sanaartoriartorlutik avataanit tikittut, 35 procentiinnarmik akileraartalernissaat akileraarutaallu tamakkiisumik Namminersorlutik Oqartussanut nakkartalernissaat, inatsisissatut siunnersuutip malitsigissavai.

”Sulisunik avataaneersunik atorfinitsitsisinnaanerup kalaallinik sulisoqarnermiit ajornannginnerulernissaa, inatsisissatut siunnersuummi eqqanartoqartippara. Tamannami innuttaasutta salliutillugit suliffissaqartinnissaannut siunertatsinnut naapertuutinngilaq,” Asii Chemnitz Narup oqarpoq.

Sermersuumi borgmesteri isumaqarpoq sanaartornermi akileraarutitigut isertitat tamaasa, Namminersorlutik Oqartussanit tiguneqartalernissaat navianartuusoq.

”Namminersorlutik Oqartussanuinnaq akileraarfiusumik sanaartornerit suna tullerissavaat? Avataaniimmi tikillutik suliartortut, kommuunimi innuttaasut allat assigalugit kommuunimit sullinneqartussaapput. Kommuunimi aqquserngit atorlugit ingerlasassapput, meeqqatik atuarfinni atuartissinnaassavaat, kommuunip aningaasaqarneranut tapiissuteqanngikkaluarlutik,” Asii Chemnitz Narup oqarpoq.

Inatsisissatut siunnersuut pillugu Kommuneqarfik Sermersooq qularuteqaraluartoq, borgmesterip takusinnaalluarpaa mittarfiliornerit aningaasalersorneqarneranni nutaamik eqqarsartoqartariaqarnera.

”Mittarfiliorneq iluatsinniarlugu Kommuneqarfik Sermersuup annertuutigut akuersaagassaqartariaqarnissaa qularnanngilaq, siunnersuutigissuarali ataatsimoorluta oqaloqaigiissutigissagipput aningaasalersuinermi qanoq tamatta pilliuteqarsinnaanerput, akileraartarnermi inatsisit taamak sakkortutigisumik kingunissaallu misissoqqaarnagit imatut allanngortiternagit.”