Quppernermi uani napparsimaninni pisinnaatitaaffitit pisussaatitaaffitillu atuarnerusinnaavatit.
Kalaallit Nunaanni suliffeqarfeqarfiit pisortanit namminersortunillu ingerlanneqarput. Namminersortut pisortallu suliffeqarfiutaanni sulinermut atatillugu pissutsit inatsisit aqqutigalugit naleqqussagaapput. Tamatuma saniatigut pisortani atorfeqartunut atorfinitsinneqarnermi atugassarititaasut isumaqatigiissummi sulisut ataasiakkaat atorfinitsinneqartarneranni malinneqartuni aamma maleruagassiorneqarput. Matuma kinguliani allassimasut pisortani atorfeqartunut taamaallaat atuupput.
Sulisinnaatillutit suliffivit paarinissaanut pisussaatitaavutit. Napparsimaleruilli peqqissinissavit tungaanut angerlarsimaannarnissat pisariaqalersinnaasarpoq. Pisortani atorfeqartutut napparsimaninnut atatillugu pisinnaatitaaffeqarlutillu pisussaaffeqarputit.
Pisussaaffiit
Suliffeqartillutit napparsimaleruit sulisitsisunnut arlalinnik pisussaaffeqarputit. Napparsimaleruit taamaalillutillu suliffiit paarisinnaanagu pisussaavutit:
- Ullormi napparsimaffinni siullermi sulisitsisunnut saaffiginnissallutit napparsimanerillu nalunaarutigalugu.
- Ullut pingasut sinnerlugilluunniit nakorsamit oqaaseqaat atorlugu napparsimanerit uppernarsassallugu
Pisinnaatitaaffiit
- Qaammammusiaqaruit, napparsimaninni aningaasarsiaqarsinnaatitaavutit. Napparsimanerpit nalaani aningaasarsiaqarsinnaatitaanissanni suliffiup tamanna pillugu malittarisassai naapertorlugit napparsimasutut nalunaassaatit aammalu napparsimalluni sulinnginneq pillugu immikkut ittumik isumaqatigiissuteqarsimaguit taakku aamma malinneqassapput.
- Akunnermusiaqaruit, napparsimaninni aningaasarsiaqarsinnaatitaanngilatit. Tamatumunnga taarsiullugu napparsimanersiuteqarsinnaatitaavutit. Napparsimanersiutinik qinnuteqarniaruit najukkanni suliffissarsiuussisarfimmut saaffiginnissaatit.