Quppernermi matumani Najukkami Tapiissuteqartarfik pillugu atuagassaqarputit, kiisalu suliniutit sorliit tapersersorneqartarnersut aammalu illit suliniutinnut qanoq iliorlutit qinnuteqassanersutit.
Siunertaq
Najukkami Tapiissuteqartarfik siunertaraa Kommuneqarfik Sermersuumi najukkami suliniutit aningaasatigut tapersersorneqarnerisigut najukkami inuiaqatigiit nukittorsarneqarnissaat pisuunnguallatsinneqarnissaallu. 2024-mi 2.5 mio.-inik missingersuuteqarluni Najukkami Tapiissuteqartarfik nutaaliortunut, piujuartitsisunut ataatsimoortitsisunullu kulturimik siuarsaarusuppoq.
Suut qinnutigineqarsinnaappat?
Kommuneqarfik Sermersuumi isumaqarpugut, najukkami suliniutinik ingerlatsisarneq allannguinernik pitsaasunik kommunillu iluani ataatsimoorfeqarnermik pilersitsisartoq. Tapiissuteqartarfimmit siunertarineqarpoq suliniutit tulliuttut tapersersussallugit:
- Nutaaliortut: Suliniutit, sammisat aamma aallarnisaanerit najukkami unammillernartunut aaqqiiniarnissami isumassarsianik imaluunniit periutsinik nutaanik imallit.
- Piujuartitsiniarnermik siuarsaataasut: Suliniutit, sammisat aamma aallarnisaanerit piffissamut ungasissumut avatangiisit pillugit, kulturi, aningaasaqarneq imaluunniit inooqatigiinnermik piujuartitsinermik qitiutitaqarnermik siunertaqartut.
- Ataatsimooqatigiinnut nukittorsaataasinnaavoq: Suliniutit, sammisat aamma aallarnisaanerit inunnik katersuutsitsisut, akuunermik ataatsimooqatigiinnermillu misigissutsinik siuarsaataasut.
- Nammineq kajumissutsimik sulinermik tunngaveqartut: Suliniutit, sammisat aamma aallarnisaanerit nammineq kajumissutsimik tunngaveqarluni suliniuteqarneq tunniusimanermullu tapertaasut, suliniutit taamaattut amerlasuut inuiaqatigiinnik nukittunerulersitsinermik ataqatigiinnerulersitsinermik tunniusseqataasut.
- Sunngiffimmi periarfissanut tapertaasut: Suliniutit, sammisat aamma aallarnisaanerit sunngiffimmi periarfissanik tapertaasut, assersuutigalugu pinngortitami sammisaqartitsinerit aqqutigalugit, timi atorlugu sammisat aamma sammisat pinaveersaartitsinermik sunniuteqartut.
Suliniutit, sammisat aamma aallarnisaanerit immikkut pingaartinneqartut tassaapput:
- annerusumik piujuartitsinissamut ilanngusseqataasut
- tamanit peqataaffigineqarsinnaasut
- Kommuneqarfik Sermersuumi ingerlanneqartut
- inunnik katersuutsitsisut ataatsimoortitsinermullu pitsanngorsaataasut
- nutaaliortut
- atuarfimmi aalatitsinermut tunngassuteqartut
Tulliuttut tapiiffigineqarneq ajorput:
- Nipilersukkanik filminillu immiussineq saqqummersitsinerlu
- Atuakkat allallu saqqummersinneqarnerit
- Peqatigiiffiit suliniaqatigiiffiillu siulersuisunut ilaasortanik akissarsiaqartitsisut
- Aaqqissuussat naammassineqareersimasut imaluunniit qinnuteqaatip nassiunneqannginnerani aallartinneqarsimasut
- Sammisat inuussutissarsiutinut tunngasut
- Ingerlatsinermut aningaasartuutit
- Ilinniakkamut atatillugu aamma oqaatsinik ilinniarluni angalanerit
- Aaqqissuussinerit politikkikkut, upperisarsiornikkut, immikkoortitsisumik imaluunniit sulisut kattuffiinut tunngasunik siunertallit
- Aaqqissuussinerit imigassamik aalakoornartortalimmik sassaalliinertallit
Qinnuteqarnermi periuseq
Kikkulluunniit tapiissuteqartarfimmut qinnuteqarsinnaapput, aamma Kommuneqarfik Sermersuup nammineq suliffeqarfiutaasa qinnuteqarsinnaanerat ammaffigineqarpoq soorlu kommunimi tamarmi atuarfiit, meeqqeriviit, kulturimik ingerlatsiviit il.il. ko
Qinnuteqaatinik ingerlaavartumik nassiussisinnaaneq periarfissaavoq taamaattoq 2024-p naanera tikillugu. Aningaasat pigineqarallartillugit tapiissuteqartoqarsinnaavoq. Qinnuteqaatit 100.000 kr.-it inorlugit amerlassusillit sapaatip akunnerini 3-ni suliarineqarsinnaaneri naatsorsuutigineqassaaq, qinnuteqaatillu 100.000 kr.-it sinnerlugit amerlassusillit sapaatip akunneri 6-t angullugit sivisussuseqarsinnaapput.
- Suliniutip allaaserineqarnera qinnuteqaammut ilanngunneqassaaq, missingersuutit peqqissaarussat, peqataasut allattorsimaffiat, siunertaq kiisalu sullinniakkatit ilanngutissavatit. Aaqqissuussinerit meeqqanut inuusuttunullu siunnerfillit pineqartillugit peqataasussat meeqqanik pinerliisimannginnermut uppernarsaataat ilanngunneqassapput, taamaattoq kommunip suliffeqarfiutaa qinnuteqarpat tamanna pisariaqanngilaq sulisut suliniummi peqataasut meeqqanik pinerliisimannginnermut uppernarsaateqareertarmata.
- Qinnuteqartoq kommunip suliffeqarfiinik suleqateqarsimappat suleqatigiinneq tamanna allakkatigut uppernarsaateqartinneqassaaq.
- Qinnuteqartup akisussaaffigaa oqartussanut allanut qinnuteqaatissat pisariaqartut qinnutiginissai, soorlu nunaminertamik atugassinneqarnissamut akuersissutit.
- Piianeq, eqqaaneq aamma torersaaneq qinnuteqartup nammineq akisussaaffigivaa.
Susassaqartitsinermut Kultureqarnermullu Immikkoortortaq Ineriartortitsinermut, Peqqinnermik Siuarsaataasumik aamma Pitsaaliuinermik Immikkoortortaqarfik suleqatigalugu qinnuteqaatinik allaffissornermik suliassartaannillu ingerlatsipput soorluttaaq aningaasaliissutinik tunniussisartuullutik. Tapiissuteqartarfiup aningaasaataasa 10%-ii allaffissornermut atugassanngorlugit immikkoortitaapput.
Qinnuteqartoq pisussaatitaavoq isumagissallugu, nalunaarusiamik inaarutaasumik naatsorsuutitalimmik najukkami@sermersooq.gl-imut nassiussissalluni kingusinnerpaamik suliniutip naammassineqarnerata kingorna qaammatit 3 qaangiutsinnagit. Aningaasat atorneqanngitsut naatsorsuusiornerup naammassineqarnerani kommunimut utertinneqassapput. Qinnuteqaatigineqaqqaartumut tapiissutit siunertaanut atornagit allamut atorneqarsimappata kommunimut utertillugit akilerneqassapput.
Qinnuteqartoq atugassarititaasut tulliuttut pillugit paasinnippoq:
- Eqqumiitsuliornermut tunngasunut tapiissutit kiisalu akissarsiat isertitatut A-tut tunniunneqassasut. Aningaasat tunniunneqarneranni A-mik akileraaruserneqassasut.
- Suliniummut atatillugu angalanernut aningaasartuutinut, ineqarnermut suliaqarnermullu aningaasartuutinut allanut tapiissutit isertitatut B-tut tunniunneqassapput. Aningaasartuutit taakkununnga tunngasut ilanngaaserneqartussaatitaapput. Qinnuteqartup nammineq akisussaaffigaa isertitat taakku inatsisitigut piumasaqaataasoq naapertorlugu nalunaarutigissallugit. Qinnuteqartup nammineq akisussaaffigaa ilanngaataasinnaasunik aningaasartuuteqarsimaguni taakkua nalunaarutigissallugit.
- Tapiissutit sumut tapiissutaanerannik erseqqissumik taaneqarsimanngitsut isertitatut A-tut tunniunneqassapput. Aningaasat tunniunneqarneranni A-mik akileraaruserneqassasut.
- Qinnuteqaammi aamma missingersuummi paasissutissat tunngavigalugit, Kommuneqarfik Sermersuumit nalornissutaasinnaasut aalajangiiffigineqassapput, Akileraartarnermut Aqutsisoqarfiup siunnersuinera atorneqarsinnaavoq.
Paasissutissanik pissarsiffik:
- Aningaasarsianit akileraarutit pillugit Inatsisartut inatsisaat nr. 12, 2. november 2006-imeersumi § 14. Aningaasarsiat akileraaruteqaataasussat, assersuutigalugu: 1) Inuussutissarsiutitut ingerlassamit sumilluunniit aningaasarsiat, , s.i. ilisimatusarnermik, eqqumiitsuliornermik imaluunniit atuakkiornermik sulinermit akissarsiat, imaluunniit suliaq, kiffartuussineq imaluunniit ikiuineq sunaluunniit aqqutigalugu akissarsiat tamat.
- Aningaasarsianit akileraarutit pillugit Inatsisartut inatsisaat nr 12, 2 november 2006-imeersumi §75.
- Kalaallit Nunaanni akileraarusiisarneq (legatinut).
- Aningaasarsianit akileraarutit aamma sulisoqarnermut akitsuutip akilersinneqartarnera pillugit Namminersorlutik Oqartussat nalunaarutaat nr. 10, 20 september 2011-meersoq.