Inuit tamarmik Kalallit Nunanniittut ilinniagaqarnissamut periarfissaqassapput. Ingerlaqqiffiusumik ilinniagaqartarnermut tunngavissat pitsaanerusut Uani annertunerusumik paasisaqarfigisinnaavat.
Karakterinik amigaateqaruit, imaluunniit meeqqat atuarfianni soraarummeersimanngikkuit Majoriaq neqerooruteqarpoq piginnaanngorsaaqqinnermik ingerlatsinermik, taannalu allattariarsornermik oqaluttariarsornermillu naggaserneqassaaq. Misilitsinnerit meeqqat atuarfianni inaarutaasutut misilitsinnerit assigai, ilinniagaqalernissamullu atorsinnaalluni. Taamaammat MA naammaginartunik angusaqarlutit naammassisimagukku GUX-mut imaluunniit inuussutissarsiutinut ilinniakkanut qinnuteqarsinnaavutit. Maluginiaruk ilinniarfissat assigiinngitsuni akuerisaaffissani karakterii allanngorarsinnaammata.
Fagmodulit
Meeqqat atuarfianni ilinniartitsissutini minnerpaamik tallimani atuartitsisoqarlunilu misilitsittoqartarpoq:
- Kalaallisut
- Qallunaatut
- Tuluttut
- Kisitsisilerineq
- Timikkut
Faget tamarmik assigiinngitsunik fagmodulinik pingasunik aaqqissugaammata (piginnaasaq, allattariarsorneq oqaluttariarsornerlu), fagini ataasiakkaani malinnaasinnaaneq kisimi periarfissaavoq, aamma modulit akornanni angusinerit akornisigut unikkallartoqarsinnaavoq. Modulit katiterneqarsinnaapput assigiinngiiaartillugit, atuartup pisariaqartitai piumasaalu malillugit.
Tassunga atasumik atuaqatigiinni piareersarfiusuni atuartitsissutitut neqeroorutigineqarsinnaapput atuartitsissummut piareersarneq, nutaaliorneq, ulluinnarni nalinginnaasumik inuuneqarneq, inuttut ineriartorneq il.il.
Ilinniarluni tigusaanissamut piumasaqaat
MA-mik ingerlatsinissamut ilinnialerusukkuit imaaliussaatit:
- Meeqqat atuarfiannik naammassinnittoqarsimassaaq
- 15-it 16-illu sinnerlugit ukioqassaatit
- Piginnaanngorsaaneq iliuusissatut pilersaarummut attuumassuteqartuussaaq
Ilinniagaqarnersiutit
MA-mi atuartut ilinniagaqarnersiuteqarnermut pisinnaatitaapput ilaatigullu kollegiani inissaqarsinnaallutik. Atuartitsinermi atortussat tamarmik akeqanngillat.
Qinnuteqaat
MA-eqimattamut qinnuteqarusukkuit, qinnuteqaammut immersugassaq immersussavat. Taannalu pisinnaavat najukkanni Majoriami. Immersoreerukku najukkanni Majoriamut tunniukkiartussavat. Ilanngussassat uku eqqaamassavatit:
- Kuisinnermut allagartaq
- Atuarfimmiit pappiaqqat (Karakteritit)
- Najugaqarnermut uppernarsaat
- Katinnikuuguit katissimanermut uppernarsaat ilanngussinnaavat
Aqqutissiuinissaq
MA pillugu apeqqutissaqaruit, MA-miluunniit atualerusukkuit illoqarfinni Majoriamut saaffiginnissaatit. Majoriami ukua pillugit aqqutissiuutsissinnaavutit:
- Majoriat sorliit MA-mik neqeroornersut
- MA-nermi ilinniagaqarnersiuteqarneq
- Illoqarfinni kommuninilu allani MA-mik qinnuteqarsinnaaneq
- Najukkami Majoriami ilinniartut ineqarfianni pissutsit
- MA-mut ilinniartussanik akuersisarnermi periaaseq
- MA-mut ilinnialernissamut piumasaqaatit
- Fagit suut ilinniartitsissutigineqarnersut MA-mi
- MA-mi inaarutaasumik misilitsinneq
- Illit iliuusissatut pilersaarutissat
Piffissaliussat
MA-mut ilinniarnissamut kingusinnerpaamik qinnuteqarfissaq Majoriamiit Majoriamut assigiinngillat. Najukkanni Majoriap paasitissinnaavaatsit, illoqarfinni assigiinngitsuni qinnuteqarnissaq qaqugumut killeqarnersoq.
Ukiumi atuarfiusumi ataavartumik fagmodulinut qinnuteqartoqartassaaq.