Peqquserluttuliorneq akiorniarlugu politikki

Tunissutit ajunngitsorsiallu allat

Tunissutit ajunngitsorsiallu allat isumaat maani siammasissumik paasineqassaaq, tassaasinnaammata tigussaasut (assersuutigalugu sukkulaatit, atuakkat amma viinnit), tigussaanngitsullu (assersuutigalugu akikillerutit, angalanerit, pikkorissarnerit imaluunniit nerisaqarneq.

Aamma aningaasat tunissutaasinnaasut assersuutigalugu kingornussassatigut sallinngortitsineq.

Tunissutinut ajunngitsorsianullu allanut – naliliuppata imlt. tunisisup ajunngisaarluni tunuliaqutaanut tunngagaluarpat – sulisoq pisortatigoortumik atorfimminut atasumik neqeroorfigineqassaaq. Tunisisoq tassaasinnaavoq innuttaasoq ataaseq, assersuutigalugu utoqqaat illuani najugalik, angajoqqaaq kommunip meeqqeriviani meeralik imlt. nunaminertamik piginnittoq, kommunimut sanaartornissamut akuersissummik qinnuteqartoq.

Tunisisoq suliffeqarfiusinnaavoq namminersortoq, soqutigisalinnut kattuffik imaluunniit avataani suleqatigisaq.

Allaaserineqareersut tunissutit ajunngitsorsiallu allat saniatigut pineqanngillat suliffiup iluani atorfilinnut, assersuutigalugu aqutsisoqarfimmit aasaanerani katerisimaarnissamut imaluunniit juullimut nereqatigiinnissamut tunniussisoqartarnera.

Tuniseriaatsip ilaginngilaa soorlu viinni puiaasat marlussuit, atorfillip suliaminut atatillugu saqqummiussineranut, imaluunniit immikkut ilisimasallip oqalugiaateqarnerani akissarsiatut.

Ingerlatsinermi tunngavissat

Pisortat suliffeqarfiini atorfillit, sulinerminnut atatillugu tunisisinnaanerat allanillu ajunngitsorsiaqarsinnaanerannut apeqqut, ingerlatsinermi tunngavissat nalinginnaasut aamma pillaasarnermi inatsimmut naleqqussagaavoq. Aammattaaq suliffeqarfinni ataasiakkaani atuuttunik immikkut malittarisassanik aalajangersaasoqarsinnaavoq.

Tunisinnermi allanillu ajunngitsorsianut tunngavissat nalinginnaasut, pikkorissutsimi malittarisassanut qanittumik ataqatigiissuteqarput. Siunertaavoq pisortani atorfillip pisuni tamani illuinnaasiortumik qulalersitsinnginnissaa. Taama isilluni aamma sulisut ataasiakkaat illersorniarneqarput.

Taamaattumik pisortani atorfillit tunissutinik allanilluunniit ajunngitsorsianik peqquserlunnertut isikkulimmik tigusaqartussaanngillat. Tamanna pillaasarnermi inatsimmut naapertuutinngitsuliornerussaaq. Immikkut ittumik pisoqalissappat, sulisoq peqquserluttuliornertut ittumik pasitsaassaqarluni, pisortatigoortumik ingerlatsivimmut attuumassuteqartumik, aqutsisoqarfik ingerlaannartumik akisussaatinneqassaaq. Pisoq aqutsisoqarfiup iliuuseqarfigissavaa. Sulisup iliuuserisinnaasaa alla tassaavoq politiinut saaffiginninneq imaluunniit misissuisartunut nakkutilliinermilluunnit oqartussaasunut saaffiginninneq.

Pisortani atorfillit, innuttaasunit imaluunniit suliffeqarfinnit tunissutit ajunngitsorsiassalluunniit allat, tamatigut tunuarsimaarfigisariaqarpaat. Ingerlatsinermi tunngavissaq nalinginnaasoq taanna, allamut atanermut (soorlu assersuutigalugu peqqinnissaqarfiup aamma angerlarsimaffinni kommunip sullitaanut) aamma atuuppoq.

Taaneqareersutut tunuliaqutaavoq, innuttaasunit suliffeqarfinnilluunniit tunissutinik allanillu ajunngitsorsianik tigusineq, atorfillip suliassami piviusorsiortumik illuinnaasiunngitsumillu naammassinissaanut qulalersitsisinnaanera. Minnerunngitsumik toqqaannartumik atorfimmut tunngasuni, atorfillip aamma innuttaasup suliffeqarfiulluunniit ataqatigiinnerannik qulalersitsisinnaanera.

Nalinginnaasumik aallaavigisaq

Aallaavigisaq tassa, pisortat suliffeqarfiutaanni atorfillit tunissutinik allanilluunniit ajunngitsorsianik sulinerminnut atatillugu tigusinnginnissaat.

Atorfilik tunissummik allamilluunniit ajunngitsorsiamik inummit suliffeqarfimmilluunniit neqeroorfigineqartoq, tunissut pisortani suliaminut tunngasuuppat tigusariaqanngilaa. Tamanna aamma atuuppoq, tunisisoq pisortani suleqataasimappat, aammalu tunisisoq siusinnerusukkut pisortaqarfimmi imminut tunngasumik suliakkiisimanngikkaluarpalluunniit.

Assersuut 1:

Kommunimi avatangiisinut ingerlatsivimmi atorfilik, suliffeqarfimmit allamit tunisassiornissamut akuersissummik pissarseqqammersup, atorfilik tunissummik annikitsumik neqeroorfigaa. Atorfillip tunissutisiani utertinniartariaqarpaa.

Assersuut 2:

Qulaani assersuummi taaneqarpoq atorfilik tunisittoq – immaqalu kommunimi suleqatai ilanngullugit –suliffeqarfimmit allamit tunissummik annikitsumik neqeroorfigineqarput, suliffeqarfiup (suli)kommune suliakkinngikkaluaraa. Tassani aamma atorfillip tunissut utertittariaqarpaa.

Pisortani atorfilik, suliaminut atatillugu pisianik, nammineq atugassaminik, sullissinernilluunniit pisisarfimminit akikillisaavigitittussaanngilaq, akikillilerut suliffiani atorfinitsitaaneranut tunngassuteqarpat. Allaavorli sulisoq nammineq atugassaminik pisisarfimminit akikillisaaffigitikkuni, akikillilerut suliffiani atorfinitsitaaneranut tunngassuteqanngippat, assersuutigalugu pisisarfik tamanut akikillilerummik, imaluunniit suliatigut peqatigiiffimmut assigisaannulluunniit ilaasortanut neqerooruteqarmat.

Immikkut pisoqartillugu tunisittoqarsinnaavoq

Immikkut pisoqartillugu pisortani atorfillit tunissummik tigusisinnaapput.

Assersuutigalugu naluneqanngitsutut, pisortani suliallit immikkut pisoqartillugu soorlu akunnaattuliinermi, ukiunik nalliuttorsiornermi imaluunniit soraarninngornermi, innuttaasunit suliffeqarfinnilluunniit tunissutisisinnaapput.

Assersuut:

Kommunimi pisortaaneq ukiunik 25-nngortorsiorpoq kommunimilu ilassinnilluni

Suliffeqarfik, kommunip aalajangersimasumik suliatigut attaveqarfigisaa, pisumut atatillugu kommunimi pisortaaneq tunissummik naleqquttumik tunerusuppaa, assersuutigalugu atuagaq imaluunniit viinnit puiaasat. Kommunimi pisortaanerup tunissutit tigulluarsinnaavai.

Assinganittaaq pisortani atorfillit niueqatigisamit tunissutinik annikinnernik tunissuteqarfigineqarsinnaapput nalliuttunut annernut, assersuutigalugu juullimut ukiortaamulluunniit atatillugu.

Aammattaaq pisortani atorfillit ”qujaniutinik” tunissutisisinnaapput, isumaqarunik tunissut utertinneqarpat tunniussisumut pissuserissaannginnerusoq aamma pakatsissutaasinnaasoq.

Assersuutit:

Utoqqaat illuani najugallip panini sukkulaatinik piseqquaa, juullimut atatillugu sulisunut tunissutigerusullugu

Meeraq meeqqerivimmi taamaatittussanngormat angajoqqaavisa viinnit perorsaasunut nassarpaat

Napparsimasup uninngareerluni peqqissigami nakorsaq naasunik pajuppaa

Pisut taama ittut aallaavigalugit atorfillit tunissummik tigusisinnaapput. Qujaniutitut tunissutit annikitsut pineqarput, tunisisoq pillugu tiguneqarsinnaasut.

Ilanngullugu nalinginnaasumik ileqquusoq, pisortani atorfillit nunanit allanit suliaqarnermut atatillugu tikeraanit tunissutinik annikitsunik tigusisinnaapput (qaaqqusisumut tunissut), assinganillu qaaqqusisumit tunissutinik tigusisoqarsinnaasoq pisortani atorfillit nunanut allanut tikeraarnerannut atatillugu.

Assersuut:

Immikkoortortami/ingerlatsivimmi atorfilik nunani allani oqartussaasunik tikeraartunik tikilluaqqusivoq, tassunga atatillugu annikitsumik tunisippoq, assersuutigalugu atuagaq, nunamut pineqartumut tunngasoq. Tunissut taama ittoq atorfillip tigusinnaavaa.

Ingerlatsivinni ataasiakkaani aalajangerneqarsinnaavoq tunissutit qanoq atsigineri nalunaarsussallugit.

Eqikkaaneq

Peqquserluttuliorneq pillugu politikki uani aasinnaavaq.