Imigassaq pillugu politikki

Aallaqqaasiut 

Kommuneqarfik Sermersuumi kommunimi innuttaasut, suliffiit suliffeqarfiillu akornanni imigassamut tunngatillugu kulturimut sunniiniarneq anguniarneqarusuppoq.

Neriniartarfiit, imerniartarfiit sumiiffiillu allat sassaallerfiusut inuinnaallu imigassarsisarnerat amerlasuut inuunerannut ilaaginnarpoq, taamaalillunilu iluarusuutitut atorneqartarnera amerlasuunut nalinginnaasuulluni. Inuit imigassamik mamarsaatiginnissinnaasariaqarput ingasaalluguli imigassartorneq illuatungeqarpoq. Imigassamik atornerluineq illoqarfinni angalanermi toqqissisimanissamut akornusiisinnaavoq aamma ataqatigiinnermut ilaqutariinnermullu ajoqusiisinnaavoq. Aammattaaq nipiliortoqarneranik, angallattoqarneranik ikuallattoqarsinnaaneranilluunniit kinguneqartarluni.

Inuit inuunerminni ilungersunartumik atugallit imigassaq tarnimikkut ajornartorsiuteqarnertik pillugu nakorsaatitullusooq atorsinnaasarpaat, ass. uippakajaarnermi annilaangarujussuartarnermilu. Tamanna imigassamik atornerluinertut isigineqarpoq piffissallu ingerlanerani inuttut, ilaqutariinnikkut, suliffeqarnikkut aningaasaqarnikkullu ajalusoornermik nassataqarsinnaalluni.

Ingasattumik imigassamik atornerluineq Kommuneqarfik Sermersuumi inuttut inuiaqatigiittullu ajornartorsiutitut isigineqarpoq. Tamatumunnga ikiuiniarneq pinaveersaartitsinerlu inuiaqatigiinni inuttullu ataqatigiissaakkamik suliniarnertut pissaaq.

Kikkunnulluunniit ersarippoq, imigassamut tunngasut assigiinngitsorpassuarnut tunngasuummata, suliassaqarfinnut amerlasuunut siammarsimasut, aamma imaannanngitsunut soorlu oqallisigisassaanngitsunut atornerluinermullu tunngasunik imallit aammali nuannataarnernut illoqarfimmilu nuannersumik inuuneqarnermut tunngasarlutik.

Tamanna pillugu Kommuneqarfik Sermersuup imigassaq pillugu politikki una kommunalbestyrelsimit akuersissutigineqarsimasoq nutarterpaa. Imigassaq pillugu politikkimi qulequttamut tunngasut sukumiisut allaaserineqanngillat pineqartumullu tunngasuni sammiviit tamaasa isummerfigissanagit, upperigatsigu attuumassuteqartunut tunngasunik suliallit pikkorissut taakkuusut immikkoortunut arlalinnut sukumiisunik sunniuteqarluartunillu suliniuteqarnissamut piukkunnarnerusut.

Taamaammat imigassaq pillugu politikki kommunip imigassamut isummerneranut pingaarnertut tunngavissiivoq imigassamillu nioqquteqarsinnaanermut akuersissuteqartarnermut najoqqutassiiviulluni.

Imigassaq pillugu politikkeqarnikkut imigassamut tunngasut tamaasa pillugit ammasumik oqallissinnaalernissaq, kiisalu akuersissuteqartarnermut tunngasuni malittarisassanik paasinnilernissaq neriuutigaarput.

Meeqqanut inuusuttunullu akisussaaffeqaqatigiinnerput

Kommunimit pingaarnertut kissaatigineqarpoq, meeqqat inuusuttullu kikkulluunniit toqqissisimallutik meeraanissaat. Taamatut kissaateqarnermi imigassaq pingaaruteqanngitsutut inissisimavoq. Meeqqat ingerlalluannginnerannut patsisaagajuttoq tassaavoq, angerlarsimaffimmi imigassamik atornerluisoqarnera. Tamanna pillugu kommunimit kissaatigineqarpoq, imigassap kingunipilutsitsisarnerinut meeqqat alliartornerminni inuunerlu ataatsimut isigalugu isigitinneqartarnerinut illersorneqarnissaat anguniarlugu suliniartoqassasoq. Aammattaaq anguniagaavoq, inersimasut sunngiffimmi peqqinnartunik sammisassaqartarnissaat ileqqorissaartumillu imigassartoriaaseqarnissaat qulakkeerniassallugu.

Naartusut ilaqutariillu meerartallit

Naartusut imigassartunnginnissamut isumassarsiortinneqassapput immannguaannarluunniit imigassartornikkut naartoq ajoquserneqarsinnaammat. Imigassamut atatillugu naartumik ajoqusiinerit inuuneq naallugu innarluuteqalernermik nassataqartarput.

Angajoqqaat imigassamut peqqinnartumik ileqqoqalernissamut isumassarsiortinneqassapput, angajoqqaat isumassuisinnaaginnarniassammata, kiisalu meeqqat inuusuttullu angajoqqaat imigassamik atuinerannit/atornerluinerannit ilungersortinneqaratik.

Sulisut naartusunut ilaqutariinnullu meerartalinnut attaveqartuusut ilaqutariinni atornerluinermik ajornartorsiuteqartoqarsinnaaneranik eqqumaffiginninnissamik immikkut pisussaaffeqarput. Meeqqamik sumiginnaanermut illersuinissaq suliaqartuusut suliassaasa ilagaat, angajoqqaat arlaata atornerluisuuneranik pasitsaassinermi paasisaqarnermiluunniit isumaginninnikkut oqartussaasunut nalunaaruteqarnikkut.

Sullissiveqarfinni tamani imigassaq pillugu politikkiliortoqassaaq sulisunullu ilitsersuusiortoqassalluni, suliaqartuusunut naatsorsuutigisanik taakkartuiffiusumik kiisalu akisussaanermik, piginnaatinneqarnermik iliuuseqarnissamullu malittarisassanik taakkartuiffiusumik.

Atuarfiit ilinniarfiillu

Meeqqat imigassartussanngillat, kiisalu piffissap inuusuttut imigassartortalerfigisaata sapinngisamik kingusissuutinneqarnissaa anguniagaavoq.

Atuarfiit, sunngiffimmi ornittakkat ilinniarfiillu sullissiveqarfittut isummiussinermik suliaqarfiusutut qitiupput taamaattumillu meeqqat inuusuttullu imigassaq pillugu ilisimasaannik isummiussinerannillu sunniiniarnissamut immikkut akisussaaffeqarlutik.

Atuarfiit, sunngiffimmi ornittakkat ilinniarfiillu tamarmik imigassaq pillugu politikkiliussapput. Imigassaq pillugu politikkimi aalajangersarneqassaaq imigassamut silatusaartumik kultureqarnermik qanoq ataatsimoorluni paasinnittoqarnersoq kiisalu sulisunut erseqqissumik najoqqutassiortoqassalluni.

Sammisaq imigassaq, kiisalu imigassaq pillugu politikki oqallittarfinni attuumassuteqartuni tamani eqqartorneqassapput: Atuarfiup siulersuisuini, ilinniartitsisut ataatsimoornerini, klassini angajoqqaanillu ataatsimiititsinerni, taamaalilluni imigassamut isummerneq erseqqissuutinneqarniassammat.

Timersoqatigiiffiit inuusuttullu peqatigiiffii

Imigassaq kiisalu meeqqanut inuusuttunullu peqatigiiffeqarneq ataatsimoortinneqassanngillat.

Timersoqatigiiffiit inuusuttullu peqatigiiffiisa siunertaraat meeqqat inuusuttullu imartuumik inuttullu ineriartorfiusumik sunngiffeqartinneqarnissaat.

Kommunip naatsorsuutigaa peqatigiiffiit imigassaq pillugu politikkiliornissamut taassuminngalu malinninnissamut akisussaassuseqassasut. 

Katsorsaasarneq 

Kommuneqarfik Sermersuup imigassamik ajornartorsiutillit sapinngisamik sunniuteqarluartumik pilertortumillu katsorsartissinnaanerat siunnerfigalugu sulissutigaa. Tamanna pillugu aammattaaq kommunip anguniagaraa, Allorfik Sermersooq katsorsartinnissamilluunniit neqeroorutillit allat kommunimi sullissisunik suleqateqarnerat sapinngisamik pisariitsuussasoq, kommunimiimmi qularutigineqanngilaq, imigassamik ajornartorsiutillit siusissukkut anguniagalimmillu katsorsartinneqarunik qaangiisinnaasut amerlanerussasut.

Taamatuttaaq kommunimit qularutigineqanngilaq, imigassamik ajornartorsiuteqartarnerup nipangiusimaannarneqartarnera ukiuni aggersuni annikillisarneqassasoq. Nipangiusimaannarunnaarsitsineq aamma akuersaaginnarneq Kommunip tungaaniit assigiissuteqartutut isigineqanngilaq, akerlianilli qularutigineqarani kanngusunneq pisuutitsinerlu pillugu nipangiusimaannarnermut taarsiullugu oqallisigineqartalerpata amerlanerusut siusinnerusukkut katsorsartittalissasut.

Atornerluinermik katsorsaaneq oqartussaaffeqarfiit assigiinngitsut akornanni suleqatigiissutigisassaavoq, pingaaruteqarlunilu innuttaasut katsorsartikkusuttut susassaqartunit katsorsartinnissaat qulakkiissallugu.

Tamanna pillugu Kommuneqarfik Sermersuup aamma Allorfik suleqatigiinnissamik isumaqatigiissusiornikuupput, taamaalilluni innuttaasut Allorfimmi akeqanngitsumik katsorsartissinnaalerlutik.

Kommuneqarfik Sermersuumi suliniuteqarneq Paarisallu qaqugukkulluunniit suliarisartagaanut aammattaaq ataqatigiissaasoqassaaq.

Kommuneqarfik Sermersooq suliffeqarfittut

Sulineq suliffimmilu imigassartorneq ataatsimoortinneqassanngillat.

Kommuneqarfik Sermersuup sulisitsisutut kissaatigaa suliffeqarfittut qanoq imigassamut isumaqarsinnaanermut atornerluinermillu ilungersunartutut isiginnissinnaanermut assersuutissaalluarnissaq.

Taamaattumik suliffiup iluani atoriaannanngorlugu sermeeraq.gl-imi pissarsiareriaannaasumik atornerluineq pillugu politikkiliortoqarnikuuvoq.

Sulisut tamarmik imigassamut (atuinermut, atuivallaarnermut, atornerluinermut) isumassaqartitsinissaat kommunimilu sulisutut inuppassuarnut maligassaanermik ilisimaarinnilernissaat kommunimi siunertaavoq.

Imigassaq pillugu politikkimi imigassamut isiginneriaaseq aamma imigassartornermut maleruaqqusat kiisalu sulisunut imigassamik ajornartorsiuteqartunut ikorfartorneqarnissamik katsorsartinnissamillu periarfissaat allaaserineqarput.

Sulisut sinniisaat isumannaallisaanermullu sinniisut imigassamik ajornartorsiuteqalernermi sulisup pineqartup aqutsisullu akornanni attaveqaataasutut inuttut pingaaruteqarput. Pingaarutilinnik inuttalersuinermi siunertaavoq sulisut imigassamik ajornartorsiutillit sapinngisamik piaartumik pitsaanerpaamik ikiorserneqarnissaasa qularnaarneqarnissaat.

Akuersissuteqartarnerit

Imigassamik aalakoornartortalimmik tuniniaasinnaanermut akuersissut niuertarfimmik ingerlatsiniaraanni aalajangiisoorujussuusinnaavoq pingaarutilik. Suliffeqarfiup imigassamik aalakoornartortalimmik tuniniaasinnaanermut akuersissummik tunineqarnissamut inatsisinut tunngasut eqqortissimappagit Kommuneqarfik Sermersooq akimmiffissalersuerusuttuunngilaq. Tamanna pillugu kommune pisariitsumik suliamik suliaqarneq aamma inatsisit naapertorlugit pitsaasumik suliamik suliaqarneq siunnerfigalugit oqimaaqatigiissaarilluarnissamik pilersitserusuppoq.

Akuersissuteqartarnermi maleruaqqusat periutsit uani immikkoortumi ersarissarniarneqarput:

§ 3.  Imigassaq pillugu akuersissuteqarnani imigassanik aalakoornartortalinnik tuniniaanissaq sassaalliinerluunniit inerteqqutaavoq.
  Imm. 2.  Kommunalbestyrelse imigassaq pillugu akuersissuteqartartuuvoq.
– Imigassaq pillugu Inatsisartut Inatsisaat nr. 35, 23. november 2017-imeersoq


Inatsisitigut tunngavigisat

Imigassanik aalakoornartortalinnik nioqquteqarsinnaanermut sassaallersinnaanermullu akuersissuteqartarneq, aqutsineq nakkutilliinerlu  Imigassaq pillugu Inatsisartut Inatsisaat nr. 35, 23. november 2017-imeersoq Imigassaq pillugu Inatsisartut inatsisaata allanngortinneqarnera pillugu Inatsisartut inatsisaat nr. 9, 12. juni 2019-imeersukkut allanngortinneqartoq naapertorlugu malittarisassiuunneqarpoq.

Tunngaviatigut Kommunalbestyrelse tassaavoq imigassanik aalakoornartortalinnik nioqquteqarsinnaanermut sassaallersinnaanermullu akuersissuteqartartuusoq aqutsinermilu oqartussaassuseqartuusoq aamma Peqqissutsimut Naalakkersuisoqarfik tassaalluni nakkutilliisussaatitaallunilu naammagittaalliortarfiusoq. 

Kommunalbestyrelsip siunertaraa, akuersissuteqartarnermut tunngasut inatsimmi allassimasut naapertorlugit aqutsinissaq inatsimmut tapiliussami innersuussutigineqartut oqaaseqaatillu najoqqutaralugit. Kommunalbestyrelse inatsimmi periarfissat naapertorlugit imigassanik aalakoornartortalinnik nioqquteqarsinnaanermut akuersissutinik tunniussinissamut aalajangersagaliornissamut periarfissaqarpoq. Taamaattorli kommunimi aalajangiinerit tamarmik tunngavilersorluarsimasunik aallaaveqassapput. Assigiinngisitsinnginnissamik najoqqutaqarneq isumaqarpoq qinnuteqaatit tiguneqartunik assigiinngisitsisoqassanngitsoq, tunngavilersuilluarsimaneq eqqaassanngikkaanni tamarmik assigiimmik tunngaveqarmata.

Kommuneqarfik Sermersuumit kissaatigineqarpoq, kommunimi suliffeqarfiit pisinnaasatigut ineriartorfissatigullu pitsaasumik periarfissiisumik killiliussaqartitsinissaq. Kommuneqarfik Sermersooq akuersissutinik suliaqartarnermi kommune tamakkerlugu assigiissaarinissamik qulakkeererusuppoq, aamma tuniniaasarfinni neriniartarfinnilu assigiinngisitaartunik neqerooruteqartoqartarnissaanut sunniuteqaqataarusulluni. Imigassanik aalakoornartortalinnik nioqquteqarsinnaanermut sassaallersinnaanermullu akuersissummik qinnuteqartoqartillugu inuussutissarsiortunut unammilleqatigiinnermi equngasoortitsinissaq Kommunalbestyrelsimit pinngitsoortinniarneqartarpoq, ass. ataasiaannartumik atuuttussamik akuersissuteqartoqartillugu aqutamik ingerlatsisoqarnissaanik qulakkeerineq.

Sumiiffinni inoqarfiusuni (illoqarfinni nunaqarfinnilu) imigassanik aalakoornartortalinnik nioqquteqarsinnaanermut sassaallersinnaanermullu akuersissutit amerlassusii kommunalbestyrelsip pingaarnertut sapinngisamik attatiinnarniarpai. Taamaattorli inuiaqatigiinnut piviusunullu tunngasunik pingaarnerusunik naliliinikkut kommunalbestyrelsip tunngavik tamanna sanioqqussinnaavaa, ass.:


– Illoqarfittani sumiiffinnut  nutaani akuersissutit

– Kommunalbestyrelsip naliliinera naapertorlugu inuiaqatigiit nalinginnaasumik pitsaasumik ineriartornissaannut peqataatitsiviusinnaasumik akuersissuteqarnerit (ass. Kalaallit Nunaanni takornariaqarnermik inerisaanermut atatillugu)

Imigassanik aalakoornartortalinnik nioqquteqarsinnaanermut sassaallersinnaanermullu akuersissuteqarnissamut inatsimmi paragraf 5 naapertorneqarsinnaavoq.

§5.  Imigassaq pillugu akuersissummik pissarsiniarluni qinnuteqaatit suliarineranni kommunalbestyrelsip inuiaqatigiit, torersuutitsineq pitsaaliuinerlu eqqarsaatigalugit nalilissavaa ataatsimut isigalugu akuerineqarsinnaasumik imigassamik aalakoornartulimmik atuineq qulakkeerneqarsimanersoq. Kommunalbestyrelsip tassunga atatillugu ilanngutissavai:

1)  qinnuteqartup niuernermut piginnaaneri,

2)  qinnuteqartup aningaasaqarnikkut atugai aningaasaqarnikkullu pilersaarutai,

3)  Suliffeqarfiup inissisimaffia, angissusia, inissitsitigaanera pissutsillu immikkut atuuttut, tassa suminngaanniit imigassanik aalakoornartortalinnik nioqquteqartoqarniarnera imaluunniit sassaalliiniarneq, aamma

4)  Isumaginninnikkut politiinullu tunngasut pillugit immikkut isummat.

– Inatsisartutlov nr. 35 af 23. november 2017 om alkohol

Imigassamik tuniniaasinnaanermut akuersissutit nutaat

Akuersissuteqarfiusumut nutaamut akuersissuteqarnissamik naliliinermi sumiiffiup imigassamik nioqquteqarnissamut sassaallernissamulluunniit naleqquttuunissaa kommunalbestyrelsip pingaartinniarpaa. Sumiiffinnut najugaqarfinniittunut, timersortarfiit haalit, atuartitsiviit eqqaanniittunut sumiiffinnulluunniit inuusuttut ornigarnerusartagaannut aallaavittut akuersissuteqartoqartassanngilaq

Imigassanik aalakoornartortalinnik nioqquteqarsinnaanermut sassaallersinnaanermullu akuersissutinik nutarterinissamik qinnuteqaatinik suliarinninnermi qinnuteqarnissap tungaanut piffissap qanoq ingerlasimanera kommunalbestyrelsip isiginiartarpaa. 

Inuiaqatigiit, silatusaarsinnaanissaq peqqissaarnissarlu oqimaaqatigiisillugit aalajangersimasumik naliliineq tunuliaqutaralugu imigassanik aalakoornartortalinnik nioqquteqarsinnaanermut sassaallersinnaanermullu akuersissutinik qinnuteqaatinik tamanik kommunalbestyrelse aalajangiisassaaq.

Imigassamik aalakoornartortalimmik sassaalliisinnaanermut tuniniaasinnaanermullu akuersissutit assigiinngitsunut immikkoortitigaallutillu annertussusilersugaapput.

Imigassamik aalakoornartortalimmik sassaalliisinnaanermut tuniniaasinnaanermullu akuersissummik qinnuteqarniaruit paasissutissat uani nassaarisinnaavatit

https://sermersooq.gl/kl/inuussutissarsiorneq/tilladelser/Alkoholbevilling

Ataasiaannartumik atuuttussamik akuersissutit

Imigassanik aalakoornartortalinnik nioqquteqarsinnaanermut sassaallersinnaanermullu aalajangersimasunik akuersissuteqartarnerit saniatigut kommunalbestyrelse ataasiaannartumik atuuttussamik imigassamik sassaallerfiusunut akuersissuteqartassaaq. Akuersissut taama ittoq tamanut ammasumik nalliuttorsiornermi assigisaaniluunniit atorneqarsinnaavoq.

§10 imm. 5 Ataasiaannartumik atuuttussamik akuersissut: Ataasiaannartumik atuuttussamik akuersissut: Ataasiaannartumik tamanut ammasumik aaqqissuussamik ingerlatsinermi sassaalliisinnaanermut akuersissut, matumani imigassaq sassaalliutigineqartoq ataaseq 16 volumenprocent angullugu kimittussuseqaqqusaanani.

Politiit akuersinerisigut kommunalbestyrelsimi siulittaasoq (Borgmesteri) ataasiaannartumik atuuttussamik akuersissuteqarsinnaavoq.

Inuiaqatigiit inuuniarnerlu eqqarsaatigalugit

Kommunalbestyrelsip anguniagaraa kissaatigalugulu, innuttaasut tamarmik isumannaatsumik angalaarsinnaassasut, pingaartumillu meeqqat inuusuttullu imigassanik aalakoornartortalinnik tuniniaanermi sassaalliisoqartarnermilu akornutaasunut illersorneqassapput.

Kommunimi innuttaasut kommunimi neriniartarfiit neqeroorutaannik iluarusuuteqarsinnaasariaqarput.

Imigassap aalakoornartup kingunipiliuinik killilersimaarinissamut annertuumik piumasaqaatitaqarpoq.

Tamanna ima pisinnaavoq:


– Imigassanik aalakoornartortalinnik nioqquteqartarneq sassaallertarnerlu pillugit inatsisip malinneqarnissaanik piumasaqaateqarnikkut

– Unioqqutitsisoqarsimatillugu akuersissutinik nakkutilliinerup sukannernerulersinneratigut

– Meeqqanut inuusuttunullu illersuiniarnernik siuarsaanikkut, soorlu allagartalersuinikkut immaqaluunniit sumiiffinni inerteqquteqarfiliortitsinikkut

– Suliffeqarfinnik tamanik kaammattuinikkut, akuersissuteqarnermi imigassaq pillugu politikkeqarnissamik piumasaqaammik atuutitsilersitsinissaq maleruaanissarlu

– Imigassamik sassaallernissamut tuniniaanermullu pikkorissarsimanermik allagartamik takutitseqqaartariaqarnermik piumasaqaateqarnissaq (ass. https://certifikat.gl/)

– Suliassaqarfimmi suliniutinut pilersaarusioqatigiinnissamut Namminersorlutik Oqartussanik anguniagaqartumik oqaloqatigiinnermik aallartitsinikkut

– Najukkami politiitut oqartussaasut qanimut suleqatigilernerisigut suleqatigiinnarnerisigullu

Akuersissutinik nakkutilliineq

Sassaalliisarnermut tuniniaasarnermullu tunngasunik nakkutilliisussaatitaaneq Peqqissutsimut Naalakkersuisoqarfimmiippoq.

Akuersissuteqarfigineqartup akuersinermut atatillugu pisussaaffinnik aqutsinera kommunalbestyrelsip politiit suleqatigalugit nakkutiginiarpaa, innersuussutigalugu inatsimmi § 3 imm. 6.

Tamatumani imigassanik aalakoornartortalinnik nioqquteqarsinnaanermut sassaallersinnaanermullu aalajangersimasumik akuersissutit pisunullu aalajangersimasunut akuersissutit pineqarput.

Naggasiineq

Aallaqqaataani soorlu eqqaaneqartoq, imigassaq inuunermi ilaaginnarpoq, aqutamillu imigassartorneq amerlasuunut iluarusutsitsisarluni. Killeqanngitsumilli imigassartorneq aqukkuminaatsumik kinguneqartitsisarpoq, soorlu nakuusernermik, sioorasaarinermik, kinguaassiutitigut kannguttaatsuliornermik aanngajaarniutinillu atornerluilernermik. Aqunneqanngitsumik imigassartorneq toqqissisimanermik nuannisarnermillu killiliisinnaavoq. Tamanna pillugu Kommuneqarfik Sermersuumit anguniagaavoq, ajornartorsiutit taakku innuttaasunut naleqqunnerpaamik iliuuseqarfigineqarnissaat aamma tamakkununnga tunngasunik suliaqartartut piukkunnaatillit pikkorissullu aqqutigalugit. 

Tamanna iluatsissappat susassaqartut tamarmik – neriniartarfiutillit, kommunimi oqartussasut, politiit, inuusuttut taakkulu angajoqqaavisa, ilinniarfiit, Paarisap, piumassutsiminnik suliniartut allallu peqataaffigisaannik pinaveersaartitsinissaq pisariaqarpoq. 

Kommunimi pingaarutilimmik suliniartoqareerpoq, taamaattorli unnukkut inuuneqarnermi ingerlatallit pisortatigoortumik pisussaaffeqarfiusumillu suleqatigiinnermut katersorneqarnissaat attanneqarnissaallu siunertaralugu anguniagaqarnerup qaffassartuarnissaa pingaaruteqarpoq.

Imigassaq pillugu matuminnga politikkeqarnikkut kommunip imigassamut isummiussineranut pingaarnertut tunngavissiinissaq taamaalillunilu innuttaasunut tamanut kommunimik toqqissisimanartuutitsiniarluni suliniarnermut taakkartuisuunissaq Kommuneqarfik Sermersuup kissaatigaa Kommunimiittut, sulisuusut innuttaasullu tamarmik imigassap ajortortaanut paasinninnissamut ataatsimut akisussaassuseqassapput.

Imigassaq nammineq akisussaaffigalugu, inuk ataqqillugu!