Attaveqaqatigiinnermi naleqartitat

Attaveqatigiinnermi sumiluunniit, naqitatigut oqaatsitigullu, tunngaviusumik naleqartitat sisamat aallaaviusarput:

  • Uppernartuuvugut – oqaatsigut tatigineqarsinnaapput
  • Ammavugut – attavigineqarsinnaavugut aamma paasissutissat pisariaqartinneqartut tamarmik pineqarsinnaapput
  • Sullississaagut – siulliuniartarpugut aamma attaveqarneq ajorpugut aatsaat paasissutissanik apeqqutillisoqaraangat. Nammineq siulliulluta nalunaaruteqartarpugut aamma suliat nuanniikkaluarpataluunniit
  • Paasineqarluarsinnaavugut – attaveqarnitsinni tigusissussaq aallaavigisarparput aamma tigusisussap pisariaqartitai aallaavigisarpagut.
  • Ulluinnarni ingerlatsinitsinni attaveqatigiinneq akuulluinnarpoq aamma ataatsimiinnerit naaneri tamaasa eqqarsaatigisarparput ullumikkut angusat kimut kikkunnulluunniit ingerlateqqinneqassanersut.

Illup iluani attaveqatigiinneq

Aqutsisut sulisullu inuttut toqqarlutik attaveqatigiittarnissaat pingaartipparput. Aqutsisut immikkut akisussaaffeqarput, illup iluani paasissutissiisarnissaq attaveqatigiinnissarlu qularnaassallugu.

Sulisut naligiiaat akornanni attaveqatigiinneq

Sulisut naligiiaat akornanni attaveqatigiinneq attaveqatigeeriaatsini pingaarnersaavoq, illup iluani attaveqatigiinnissaq pineqartillugu.

Sulisut naligiiaat akornanni attaveqatigiinneq tassaavoq sulisut naligiiaat akornanni paasissutisseeqatigiinneq, pisortaniit immikkoortortani fagchefinut tassanngaanniillu sulisunut – kiisalu uteqqillugu. Paasissutissiineq inummiit inummut pineqartarpoq.

Pilersaarutit allannguinerillu pitillugit sulisut naligiiaat akornanni attaveqatigiinneq pingaartorujussuusarpoq, amerlasoorsuarnut allat aqqutit atorlugit attaveqartarnermut naleqqiullugu. Sulisut naligiiaat akornanni attaveqatigiittarneq pingaartinneqartarpoq, sulisut pitsaasumik tunngavilersuilluarlunilu oqaloqataasinnaaqqullugit Kommuneqarfik Sermersuumi takorluukkat, anguniakkat isumallu pillugit qulakkeerneqassalluni.

Attaveqatigiinnermut immikkoortortap sulisut naligiiaat akornanni attaveqatigiinnermut tunngatillugu suliassaraat attaveqatigiinnermi ilitsersuisuunissaq aamma siunnersortaanissaq, aqutsisut ataatsimoorlutik kommunip oqariartuutaanik sulisuminnut apuussilluarsinnaaqqullugit.

Sermeeraq

Kommuneqarfik Sermersuup Intranetiani ”Sermeeraq”-mi sulisut ilisimasariaqagaat paasissutissat tamarmik oqaluttuarineqarput. Pisortaqatigiit aamma suliatik oqaluttuaraat kommunip ineriartorneranut sulisut peqataatikkumallugit.

Immikkoortortat kaammattorneqarput iluatsitaminnik suliassaminnillu oqaloqatigiittarfimmi tassani saqqummiusseqqullugit. Iluatsitsinerit pillugit oqaluttuat isumassarsiorfigineqartarput, aammali suliassat unamminartut pillugit oqaluttuat siunnersuutaasinnaapput ilitsersuutaallutillu sullivimmi immikkoortortaqarfinnut allanut.

E-mail

Email sakkuuvoq inuit ataasiakkaat attaveqatigiinneranni atugassaq, inummiit inummut imaluunniit inummiit inuppassuarnut. Email pisariaqarluinnarfiani ataatsimmut amerlasuunut attaveqarniarnermi aatsaat atorneqartariaqarpoq.

Avammut attaveqarneq

Attaveqatigiinneq ingerlasoq ammasuussaaq aamma kommunimi, nunap sinnerani nunarsuullu sinnerani innuttaasut oqaloqatigineqassapput.

Attaveqatigiinneq sullissinermut ilaalluinnarpoq. Taamaattumik Kommuneqarfik Sermersuumi sulisut TAMARMIK akisussaaffigaat attaveqassallutik kommunilu avammut ilisaritissallugu. Naqitat tamarmik suliarineqartut illumiillu avammut nassiussat, aamma allakkat naqitallu, attaveqatigiinnermut naleqartitanik tunngaveqassapput, kommunip najoqqutassatut aalajangersagaa malillugu.

Attaveqatigiinnermut immikkoortortaqarfik piareersimasoq ilitsersuissalluni siunnersuissallunilu aamma suliaqarnermi ikiuunnissaminut piareersimavoq.

Avammut attaveqarnermi amerlanerpaanut apuussinissaq kiisalu attaveqatigiinnermi anguniakkat piviusunngortinnissaat pillugu attaveqatigiinnermut immikkoortortaqarfik attaveqatigiinnermut pisariaqartitsineq naapertorlugu pilersaarusiussaaq, sapinngisamik amerlanerpaat angujumallugit. Pilersaarutip oqariartuutit qanoq ittuunissaat suliarinerani paaseqqissaassavagut oqallisigalugillu, kikkut saaffigissarnerigut, tusagassaqartitsiviit, imai, ilusaa, akigititat il.il.

Attaveqatigiinnermut immikkoortortaqarfik pisariaqartitsisoqarnera naapertorlugu attaveqatigiinnermut pilersaarusiornermi ikiuutissaaq.

Nittartagaq

www.sermersooq.gl kommunip avammut, innuttaasunut tusagassaqartitsivinnullu tusagassiviini pingaarnerpaajuvoq pingartinneqarnerpaallunilu.

Nittartakkami nutaarsiassat kingulliit tusagassiutinullu nalunaarutit saqqummiunneqartassapput. Aamma innuttaasut paasissutissanik sapinngisamik amerlanerpaanik aallersinnaassapput angerlarsimaffimminni imminnut kiffartuunniarlutik, innuttaasunut kiffartuussiviit iserfigineqarsinnaasut atorlugit.

Tusagassiorfiit

Tusagassaqartitsivinnit ilanngunneqarneq avammut nittarsaassinermi pingaaruteqarnerpaavoq. Pitsaasumik tatigeqatigiilluta suleqatigiinnissarput kissaatigaarput, aamma tusagassaqartitsiviit akuersaarlugillu ammavugut. Tusagassiutinut ingerlaavartumik attaveqarneq oqaloqateqarnerlu pingaartilluinnarpagut.

Qisuariartassaagut sukkasuumik eqqortumillu aamma suleqataassaagut, ersarissuussaagut tusagaasiutinullu unneqqarissuulluta. Kikkut tamarmik akisussaaffigaat piareersimaffigissallugu ”Sulianik” suussusersisarnissartik, ajornartorsiutinngortinnagit aamma pisortarisaq piaarnerpaamik ilisimatinneqartassaaq. Tamatuma kingorna Attaveqatigiinnermut immikkoortortaqarfik akulerutsinneqassaaq pilersaarusiap ingerlaqqinnissaa pillugu aamma isummertoqarnissaanut kommunip ajornartoornermi upalungaarsimanissaanut pilersaarut naapertorlugu.

Paatsuungasoqannginnissaa, tamakkiisumik iliuuseqarnissaq paasisimasaqarluarnissarlu qularnaarumallugit Attaveqatigiinnermut immikkoortortaqarfik ilisimatinneqassaaq, sulisut tusagassiorfinnut attaveqareeraangata qulequttat sullivimmut pingaarutillit pillugit. Taamaasiorluta tusagassiorfinnut iliuusissagut allat naleqqussarsinnaassavagut, pineqartut tusagassiutinut anngutsinnagit sulisugut ilisimatillugit, tamanna pisariaqartoq nalilerneqarpat. Tamatigut sulliviup iluani paasissutisseeqqaartarnissaq anguniarparput, suliaq tusagassiutinit sammineqartinnagu imaluunniit sammineqalernerani. Kisianni illup ungataaniittut tusagassiorfiit sulliviup iluani paasissutissiissagutta atussanngilagut – paarlattuanik attaveqaatit sulliviup ungataanut attaveqarnerup sullivimmi suussusersiinermut sunniutigisartagai ilisimavarput.

Tusagassiortut piffissaat kingulleq tikitsinnagu tamatigut saaffiginnissutaat akisassavagut aamma isumaqatigiissutigisagut eqqortittuaannassavagut. Tunngaviusumik akinngisaannassaagut ”Oqaaseqaatissaqanngilanga” pisariaqanngitsumik pasitsatsitsisarmat, isumaqalersitsisarlunilu ajortoqartoq aamma toqqorteriniarsarisutut isumaqarfigineqalersaratta. Massakkorpiaq akisinnaanngikkutta oqassaagut, qaqugu akisinnaanerluta nassuiarlugulu sooq massakkorpiaq akisinnaannginnersugut.

Attaveqatigiinnermut immikkoortortaq ulloq unnuarlu upalungaarsimasoqarpoq, apeqqutit tusagassiutineersut akisassallugit. Sulisut tusagassiorfinniit attavigineqartut kinaassusersisinnaanngisasminnik qinnuigineqarput upalungaarsimasunut innersuusseqqullugit. Pisortat, stabschefit aamma fagchefit paarlattuanik pisussaapput sivikitsuinnaap iluani apeqqutinik tusagassiortuneersunik akinissaminnut.

Nipangiussisimasussaatitaaneq

Soorunami tamatta suliat inunnut paasissutissanik imallit pineqartillugit tatigut nipangiussisimasussaatitaaneq ataqqisussaavarput. Suliani taamaattuni paasissutissanik piniarfigineqaraangatta, nassuiartassavarput paasissutissanik tunniussisinnaanata nipangiussisimasussaatitaanerput pissutigalugu.

Suliamut tigussaasumut tunngatillugu oqaatsit naliginnaasut atorlugit oqaaseqartassaagut. Suliani immikkuullarissuni pissutsit tunngaviusut ingerlateqqinneqartarmata iluaqutaakkajuppoq, suliarlu aalajangersimasoq pillugu paasinninnerulersitsisarluni.

Sulianut tunngatillugu tusagassiortoq inuit kommuni pillugu naammagittaalliorsimasut sinnerlugit sianerpat tamatigut siunnersuisarpugut qanoq iliorluni allattugaatinik amerlanerusunik piniartoqarsinnaanersoq.

Attaveqatigiinnermut immikkoortortaq tusagassiorfinnut attaveqartarneq pillugu siunnersuuteqarsinnaavoq pitsaasunik.

Kina oqaaseqarsinnaava?

Sulisut tamarmik oqaaseqarsinnaatitaapput, oqaaseqarnissaminnulli pisussaatitaanatik. Oqaaseqarnisaq toqqissisimanarinngikkaanni, sulisut pisussaapput sulisumut susassaqartumut allamut aqutsisumulluunniit ingerlatitseqqissallutik.

Sulisut tamarmik kommunimi sulisutut misigisatik pillugit oqaaseqarsinnaatitaapput.

Sulisut tamarmik suliatik pillugit oqaaseqarsinnaatitaapput. Tunngaviusumik sulisoq suliamut akisussaasoq oqaaseqarsinnaavoq, tunngavissaqarluarnerugami, kisianni pisortat ataasiakkaat Akisussaaffigaat malittarisassiuutissallugu kommuni sinnerlugu kina tusagassiortunut akisinnaassanersoq apeqqutit tunngaviusut pillugit.

Suliat ingerlateqqinneqartuaannangajammata innersuussutigineqassaaq immikkoortortami suliap oqallisigineqaqqaarnissaa tusagassiorfinnut oqaaseqartoqartinnagu.

Isummat naliliinerillu politikkimut tunngasut politikerit oqaaseqarfigisassavaat kiisalu pisortaqatigiit allallu toqqakkat kommuni sinnerlugu oqaaseqarsinnaapput.

Suliat ataatsimiititani ataavartuni suliarineqartut pillugit tunngaviusumik ataasimiititap siulittaasuanit oqaaseqarfigineqartassapput.

Inuinnartut oqaaseqarneq: Sulisut tamarmik inuinnartut suna tamaat pillugu oqaaseqarsinnaatitaapput. Pisariaqarpallit erseqqissarneqassaaq inuinnartut oqaaseqarluni, kommunilu sinnerlugu oqaaseqartuunani.

Oqaaseqarneq sumut attuumassuteqarnersoq immikkoortinneqarnissaa pingaaruteqarpoq. Kommuneqarfik Sermersuumi sulisutut oqaaseqaraanni kommunimut sinniisutut inissisimanissaq aallaavigineqassaaq, taamaattumillu kommunip isumaa oqariartuutigineqassaaq.

Suliffimmi malittarisassat nalinginnaasut tusagassiortunut oqaaseqassagaanni soorunami aamma atuuttarput. Kommunimut aqutsisorisamullu nipangiussisussaatitaaneq il.il. eqqarsaatigalugit unneqqarissuunissamik attassiinnarnissaq sulisutut pisussaaffiuvoq.

Aqutsisut imaluunniit qaffasissumik atorfillit soorlu pisortat, stabschefit, attaveqatigiinnermik suliallit il.il. eqqaamassavaat tamat eqqarsartariaasiat naapertorlugu kommuni sinnerlugu oqaaseqartutut isigineqassagamik. Taamaattumik oqaaseqarnerat kommunimut tussaaq. Sulisut taakku taamaattumik kaammattorneqassapput kikkut tamat oqalliseqataaneranni akuunaveersaaqqullugit.

Oqaluttuatsialak

Kommunimi pisartut periarfissallu ersarissuunissaat pillugu oqaluttuatsialannik anngussisarnissaq pingaaruteqarpoq, kommunip tusaamaneqarnera kusanartumik nittarsaanneqassappat. Aamma ulluni nalinginnarni ingerlanitsinni oqaluttuatsialappassuarnik ulikkaarpoq. Kikkut tamarmik oqaluttuatsialaat akisussaaffigaat, anngullugillu. Pisut aalajangersimasut pillugit aqutsisut isumaqatigiissuteqarfigiuk, oqaluttuap qanoq anngunneqarsinnaaneranut imaluunniit Attaveqatigiinnermut immikkoortortaq attavigiuk siunnersorneqarumallutit, ilitsersorneqarumallutit isumasioqatigiumalluguluunniit.

Ajornartoornerup suliarinera

Tusagassiutini eqqartornerlunneqarnerup sullivup tusamasaanera, isigineqarnera piusariaqarneralu tunngaviusumik aserorsinnaavaa.

Tusagassiutini eqqartornerlunneqarnerit pigajupput, arlaannik ajortoqarsimappat, kukkuluttorujussuartoqarsimappat, sumiginnaasoqarsimappat aamma eqqarsaatigilluagaanngitsunik saqqummiussisoqarsimappat.

Eqqartornerlunneqarnerup saniatigut tusagassiutini saassutarineqarnerup nassatarisinnaavai unnerluutigineqarneq, missingersuusiugaanngitsunik aningaasartuuteqarneq kiisalu sullivimmi annilaanganeq nuanniilliornerlu.

Suliat ajornartoornermik kinguneqartitsisinnaasarmata pisariaqarpoq ajornartoortoqannginnissaata eqqumaffigineqarnissaa, tassa imaappoq, ajornartorsiutit tamanit ilisimaneqanngitsut eqqumaffigineqassappput, sukkasoorujussuarmik ajornartorsiortitsilersinnaammata.

Ajornartoornermi upalungaarsimaneq

Malittarisassat immikkut ittut atuutilersarput ajornartoortoqartillugu imaluunniit ajornartoortoqarnissaa uaneralaamiilersimatillugu. Ajornartoornermi upalungaarsimaneq pitsaasoq iluaqutaasorlu ajornartoornerup killilersimaarnissaanut kisimi atorneqarsinnaanngilaq, amerlasuutigulli pinngitsoortittarpaa ajornartorsiutip ajornartoorninngunnginnissaa. Kinguneqarluartumik ajornartoornermi upalungaarsimaneq pissappat pinngitsoorani pisariaqarpoq:

  • Tamakkiisumik paasisaqarsimanissaq – Eqqissisimagit ajornartoornerullu akornissaanut pilersaarusiorlutit
  • Iliuuseqarasuarnissaq aamma sukkasuumik qisuariarnissaq – Sukkasuumik qisuariassaagut – akunnerni arlalinni utaqqeqqaarata imaluunniit aqagumut utaqqeqqaarata – massakkorluinnaq
  • Saqqumisuunissaq aamma nassaariuminartuunissaq – Ajornartoorneq puigortinniarsarineqassanngilaq. Ajornartoorneq tammarnavianngilaq toqqorteraluarutta.
  • Saqqummissaagut suliamillu saqqummiussineq sunnerniarlugu uangut isummatsinnik.

Ajornartoornermi suleqatigiit

Aqutsisoq qaninnerpaaq ilisimatinneqarasuassaaq ajornaartoortoqarpat imaluunniit ajornartoortoqalissagaluarpat. Aqutsisoq ajornartoornermi suleqatigiittussanik pilersitsissaaq, pisoq aallaavigalugu pilersaarusiortussamik ajornartoornermillu suliaqartussamik. Ajornartoornermi suleqatigiinni ilaassapput borgmesteri, pisortaaneq aamma/imaluunniit pisortaqatigiinnit arlaat kiisalu attaveqatigiinnermut immikkoortortaq.

Ajornartuulerfiusinnaasut

Ajornartuulerfiusinnaasut – suliat mikisualuunerusut – ajornartoorninngoriataarsinnaapput annertuut. Kommuni piffissap sivikitsuinnaap ingerlanerani tusagassiutini naatsorsuutigineqanngitsumik, ajunaartoqarsimappat imaluunniit sumiiffimmi inuttaasuni ineriartorneq pissutigalugu eqqartornerlunneqalersinnaavoq. Ajornartuulerfiusinnaasunik eqqarsarnissaq aqutsinermi eqqumaffigisassat pingaarnerit ilagileriartorpaat taamaattumik anguniagaavoq ajornartuulerfiusinnaasunik pinngitsoortitsinissap ilinniarluarsimasunit suliarineqartarnissaa aaqqissuulluarneqarnissaalu.

Kommuneqarfik Sermersooq qarasaasiami naapittarfinni

Qarasaasiami inuit naapittarfianniinnerup siunertaraa innuttaasut iluarisimaarinninnerulernissaat Kommuneqarfik Sermersuumillu ilisarisimanninnerulernissaat.

Qarasaasiami inuit naapittarfii innuttaasunik kiffartuussivmmi atorneqarsinnaavoq, aaqqissuussinerit pillugit ilisimatitsinerni atorneqarsinnaavoq, nutaarsiassanik siammarterinermi atorneqarsinnaavoq aamma pilerisaarinermi.

Kommunip aallaavik taanna atorlugu nutaarsiassanik siammarterissaaq innuttaasut amerlanersaannut soqutiginartunik, naammattunik amerlassusilinnik inooqataanerput paasitinniarlugu atuisut ataasiakkaat atuinerat inanginngikkaluarlugu.

Tusagassiutitoqqanut naleqqiullugu qarasaasiami inuit naapittarfiini atuisut periarfissaqarput oqaaseqarnissaminnut apeqquteqarnissaminnullu, naatsorsuutigisaminnik akineqartariaqartutut. Anguniagaavoq innuttaasut kiffartuussiviat sukkasooq pikkorissorlu apeqqutaatinnagu attaveqatigiinermi suna aallaaviunersoq aamma qarasaasiami inuit naapittarfiini pisariaqartitsineq minnerunngerluaasarpoq. Suna tamarmi ingerlanneqarpoq tamanit takuneqarsinnaalluni aamma taamaattumik innuttaasut tamarmik periarfissaqarput sullissinitsinnik nalilersuinissaminnut. Saaffiginnissutit sukkasuumik, naatsumik eqqortumillu akineqartassapput inussiarnersumik oqaloqatigiinnissaq uummarissarlugu.

Qarasaasiami naapittarfiit pillugit suleqatigiit

Atuisut paasissutissinneqararnissamut kiffartuunneqarnissamullu naatsorsuutaat piviusunngortikkumallugit pilersinneqassaaq Qarasaasiami naapittarfiit pillugit suleqatigiit.

Suleqatigiinniissapput sulisut attaveqatigiinnermut immikkoortortaqarfimmeersut, pingaartuusarlutik qarasaasiami inuit naapittarfiini naliginnaasumik ammasarfiup nalaani saaffiginnissutigineqartunut tamanut akissuteqartassapput.

Suleqatigiit pitsaasunik akissuteqarsinnaaqqullugit, suleqatigiinnit attavigineqarsinnaassapput ingerlatsiviit sinniisaat kiisalu innuttaasunik kiffartuussivimmi sulisut.

Suleqatigiit attaveqaataasut pisussaapput piffissap sivikitsuinnaap iluani paasissutissanik tunniussisarnissaminnut.

Qarasaasiami naapittarfiit pillugit malittarisassat

Qarasaasiami inuit naapittarfiit oqallinnerup torersuunissaa qularnaarumallugu, attaveqatigiinnermi malittarisassat makku malinneqassapput:

  • Kommuneqarfik Sermersuup qarasaasiakkut naapittarfiit atortassavai aserfallattaalllugillu. Isertarfiit soqutaajunnaartut imaluunniit soqutigineeruttut peerneqartassapput.
  • Kommuneqarfik Sermersooq attaveqartarpoq oqaatsit inussiarnisaartut akuersaartullu atorlugit.
  • Kommuneqarfik Sermersooq tamatigut nalunaaruteqartassaaq kalaallisut qallunaatullu. Oqaatsit allat atorneqarsinnaapput suliap tamanna pisariaqartippagu.
  • Saaffiginnissutit tamarmik akineqartassapput minnerpaamik oqaatsit allannermi atorneqartut atorlugit.
  • Ilanngussaq inunnut aalajangersimasunut qulaarinnittut nunguterneqartassapput.
  • Ilanngussat sulisunut aalajangesimasunut imaluunniit allanut nikanarsaasut imaluunniit eqqunngitsunik pasilliiniutinik imallit nunguterneqartassapput.
  • Ilanngussat narrujuumminartunik imallit peerneqartassapput.
  • Ilanngussaq Kommuneqarfik Sermersuup isigineqarneranut ajoqusiisoq akineqassaaq, nunguterneqassanngilaq. Sinaakkutissat iluanni killiligaanani oqaaseqarsinnaatitaaneq atuuppoq.
  • Atuisut, ilanngussaminnik nunguterunneqartut nalunaarfigineqartassapput tunngavilersorlugu sooq nunguterisoqarsimanersoq.

Nittartakkami immikkoortortat

Ingerlatsiviit, nunaqarfinni kommunip allaffii, immikkoortortat, meeqqeriviit allallu immikkoortortat kommunip ataaniittut kammattorneqarput namminneq nittartagalioqqullugit qarasaasiakkut inuit naapittarfissaannnik, nalilerneqarsimappat atuisunut innuttaasunulluunniit attaveqarneq pitsanngoriartinneqarsinnaasoq. Nittartagarli ilusilerneqassaaq kommunip ataatsimoortumik nittartagaanut paarlaanneqarsinnaajunnaarlugu.

Immikkoortortaqarfiit ataasiakkaat suliassaraat qularnaassallugu nittartakkamut, qarasaasiakkut naapittarfissamut malittarisassiarineqartut malinneqarnissaat. Nittartakkap pilersinneqarsimanera pillugu Team for Sociale Medierimut nalunaarutigineqassaaq, taannalu aaqqissuisoqarfittut pisinnaatitaaffilerneqassalluni, taamaalilluni ataavartumik pitsaassusaata nalilersorneqartarnissaa siunnersorneqartarnissarlu isumannaarumallugit.

Ammasuunissamik politikki uani aasinnaavat.

Quppernerup imarisaa qanganitsersimava?

Quppernermut naqqiutissaqarpit?