Nunaminertamik atugassiisarneq

Quppernermi uani, nunaminertamik atugassanngortitsineq, qaqugukkut nunaminertamik agguarneqarnissannik qinnuteqassanersutit, qanorlu taama iliorsinnaasutit pillugit atuarnerusinnaavutit.

Illit innuttaasutut suliffeqarfittulluunniit assersuutigalugu illuliorusukkuit atuisinnaatitaavutit. Nunaminertamik atugassinneqarnissamut qinnuteqaateqarnikkut nunaminertamik atuisinnaatitaavutit.

Qinnuteqarneq
Assersuutigalugu nunaminertamik atugassinneqarnissamik qinnuteqarsinnaavutit:

  • Angerlarsimaffimmik imaluunniit illumik sananiaruit
  • Illumik pisisimaguit – eqqaamallugu qinnuteqarninni piginnittuunermut uppernarsaativit imaluunniit akuersissutip pigisavit assilinera tunniutissagakkui
  • lluutit allilissagukku imaluunniit allanngortissagukku
  • Illup atorneqarnera allanngortissagukku, soorlu pisiniarfimmiit najugaqarfimmut
  • Imermut kuuffeqarfimmullu aqqusersuutinik ikkussuissaguit
  • Nunaannarmi parapolantenne-mik nappaassaguit
  • Biilinut unittarfiliussaguit
  • Asimi nunaannarmi illuaraliussaguit
  • Soorlu angallammik container-imilluunniit inissiissaguit

Periutsit marluk atorlugit kommunimut nunaminertamik atugassinneqarnissamik qinnuteqarsinnaavutit:

  • Nittartagaq www.nunagis.gl aqqutigalugu qinnuteqarsinnaavutit. NunaGIS tassaavoq Kalaallit Nunaat tamakkerlugu nunap assinginik digital-iusunik toqqortaqarfik. NunaGIS aqqutigalugu qanoq iliorlutit qinnuteqarnissannut ilitsersuunneqarsinnaavutit
  • Imaluunniit najukkanni innuttaasunut sullissivik imaluunniit nunaqarfiup allaffia attaveqarfigisinnaavat, tassanngaanniillu ilitsersorneqarsinnaallutit
  • Qinnuteqaat nassiunneqarnerani uppernarsaatit naammaginartut kakkiunneqassapput. Assersuutigalugu titakkat uuttortariikkat aamma nassuiaatit

Siumoortumik oqaloqatiginninneq
Nunaminertamik atugassinneqarnissamik imaluunniit sanaartornissamut akuersissummik qinnuteqannginninni, akeqanngitsumik siumoortumik oqaloqatiginninnissamut inniminniinissamik periarfissaqarputit.

Siumoortumik oqaloqatiginninneq suliniuteqarnissannut aqqutissanni ikorfartuutaassaaq, apeqqutinillu akineqarnissannut periarfissiissalluni. Ataatsimiinneq aqqutissiuussineruvoq, ataatsimiinnermilu aalajangiisoqassanani akuersissutinillu tunniussisoqassanani.

Imatut ataatsimiinnissamut inniminniissaatit:

  • Siumoortumik oqaloqatiginninnissamik inniminniiniarlutit, uunga mailimik nassiussissaatit sai@sermersooq.gl sammisallu nalaani Siumoortumik oqaloqatiginninneq allallugu.
  • Mailimi atitit tamakkerlugit oqarasuaativillu normua allakkit.
  • Mailimi allaguk, naapinneqarusunnerlutit imaluunniit onlinekkut ataatsimiikkusunnerlutit. Naapilluni ataatsimiinnissat Nuummi Kommuneqarfiup Allaffiani ataatsimiittarfimmi ingerlanneqartassapput. Onlinekkut ataatsimiinnerit tunngaviatigut Teamsikkut ingerlanneqartarput.

Siumoortumik oqaloqateqarnissamik pissarsiaqarfigilluarusullugu, mailimi ilanngutissavatit:

  • Piginnittumit piginnaatitsissut
  • Suliap imarisaa annertussusaalu pillugit paasissutissat
  • Ataatsimiinnissamut oqaluuserisassat kissaatit apeqqutillu akeqartussat ilanngullugit
  • Titartagartai
  • Sanaartukkamut piffissaliussaq ilanngunneqarsinnaavoq

Siumoortumik oqaloqatiginninnissamut inniminniillutit maili nassiussimalerukku, sullissisumit mailikkut saaffigineqassaatit ataatsimiinnissamullu piffissamik isumaqatigineqarlutit.

Naatsorsuutigisinnaavat, ataatsimiinnissamut 30-60 minutsit piffissaliunneqarsinnaasut.

Suleriaaseq
Nunaminertamik atugassinneqarnissamut qinnuteqaatit kommunimi pilersaarummut nassuiaasersorluakkamut naleqquppat, kommunip nunaminertamik atugassinneqassasutit aalajangersinnaavaa.

Qinnuteqaatit kommunimi pilersaarummut uniuuppat, kommunip pingaarnertut qinnuteqaatit itigartitsissutigissavaa. Pisulli ilaanni nunaminertamut qinnuteqaatigineqartumut immikkut ittumik akuerissallutit kommune aalajangersinnaavoq.

Sumiiffiup ilaanut nunaminertap qinnuteqaatigisavit inissisimaffianut kommune kommunimi pilersaarummik akuersissuteqarsimanngippat, kommune sumiiffimmut kommunimut pilersaarummut tapiliussamik akuersissuteqarsinnaavoq, imaluunniit tamanut ammasumik tusarniaasinnaalluni. Tamanut ammasumik tusarniaaneq nalinginnaasumik naqitat atorlugit saqqummiussinikkut allagarsiinikkulluunniit pisarpoq. Tusarniaanermi ullut sivikinnerpaamik 14-it periarfissaritinneqartarput. Tusarniaanermi akissuteqartoqarsimappat, taakku kommunip suliamik ingerlatitseqqinneranut ilaatinneqassapput.

Malugiuk
Nunaminertaq qinnuteqaatigineqartoq nunaminertamik atugassiinermiit kingusinnerpaamik ukiut marluk qaangiunnerini atorneqalereersimassaaq.

Kommuni nunaminertamik atugassiinermi piumasaqaatinik allanik piumasaqarsinnaavoq.

Nunaminertamik atugassiineq piffissamut killilerneqarsinnaavoq. Assersuutigalugu angallammik container-imilluunniit inissiigallarnermut atatillugu taanna atorneqarsinnaavoq.

Nunaminertamik atugassinneqarnissamut qinnuteqaatinnut atatillugu kommune akitsuummik akiliisitsisarpoq.

Illuliornissat kissaatigisimagukku sanaartorfissagissaanermut akitsuummik akiliisitsisoqarsinnaavoq. Akitsuut taanna aningaasartuutinut, kommunip sumiiffimmi illumik sananissamik kissaateqarfigisanni kuuffeqarfinnut aqqusiorneranut, aqquserniorneranut aqqusinernilu qaammaqqusersuineranut matussutigineqassaaq.

Nunaminertaq atorunnaarukku nunaminertami saliinissaq pisussaaffigaat.

Kommuneqarfik Sermeersooq Sanaartornermut Avatangiisinullu Ingerlatsivimmi illoqarfiit killeqarfiisa iluini kiisalu kommunip nunaqarfiisa killeqarfiisa iluini nunaminertanik agguaasarnerit ingerlatarai. Asimi nunaminertanik atugassanngortitsisarnerit Namminersorlutik Oqartussanit ingerlanneqarallarput – kommunili aqqutigalugu qinnuteqartoqartassaaq.

Kommuneqarfik Sermersuumut nunaminertamik atugassinneqarnissamut NunaGIS aqqutigalugu qinnuteqarsinnaavutit.

Qinnuteqaat qanoq immersorneqarnissaanik ilitsersuut takusinnaavat.

Qinnuteqaatit atsiorukku aatsaat atuussinnaavoq. Taamaammat qarasaasiakkoortumik atsiortarnerup atuutilernissaata tungaanut qinnuteqaat, taassuma immersorneranut atatillugu, suli atsiortussaatitaavutit. Qinnuteqaat najukkanni innuttaasunik sullissivimmut imaluunniit nunaqarfiup allaffianut nassiutissavat tunniulluguluunniit.

Internet-imut attaveqanngikkuit, nunaminertamik atugassinneqarnissamik qinnuteqarninni najukkanni innuttaasunik sullissiviup imaluunniit nunaqarfiup allaffiata ikiorsinnaavaatsit.

Malugiuk
NunaGIS.gl aqqutigalugu nunaminertamik atugassinneqarnissamik qinnuteqarsimaguit, akiligassap allagartaa atsiugaq najukkanni innuttaasunik sullissivimmut imaluunniit nunaqarfiup allaffianut kingusinnerpaamik sapaatit akunneri sisamat qaangiutsinnagit nassiulluguluunniit tunniutissavat, akiligassallu allagartaa Sanaartornermut Avatangiisinullu Ingerlatsivimmut ingerlateqqinneqassalluni. Akiligassap allagartaa sapaatit akunneri sisamat qaangiutsinnagit Sanaartornermut Avatangiisinullu Ingerlatsiviup tigusimanngippagu qinnuteqaatit atorunnaarsinneqassaaq.

Tusarniaanermi piffissarititaq nalinginnaasumik sapaatit akunnerinik marlunnik-pingasunik sivisussuseqartarpoq. Tamatuma kingorna nunaminertamik atugassinneqarnissamik qinnuteqaatit kommunalbestyrelse-mit aalajangiiffigineqassaaq.

Akigititat
Akigititat akinut allattorsimaffimmi ataaniittumi nassaarisinnaavatit.

Akit allattorsimaffiat 2024 (Nunaminertanut tunngasunik oqartussaqarfik)