Puigortunngortunut ataqatigiissaarisut Suliffeqarnermut Isumaginninnermullu Ingerlatsivimmi Inersimasunik Isumaginniffimmi immikkoortortaqarfiuvoq.

Pingaaruteqarpoq paasissallugu nappaat ilaqutariinni tamanik sunniisinnaammat aamma puigortunngortup attaveqarfigisaanni. Taamaattumik puigortunngortup ilagisai tamarmik ikorfartorneqarnissaat pisariaqarsinnaavoq. 

Puigortunngortunik ataqatigiissaarisut makkungannga siunnersuinermik ilitsersuinermillu neqerooruteqarpoq:

  • Puigortunngorneq
    • nappaatip paasinissaa
    • qanigisaasut nappaammik ilisimannilernissaat
  • Eqqaamasinnaaneq
    • puigortunngornerup eqqaamasinnaaneq qanoq sunnertarpaa?
  • Attaveqatigiinneq
    • innuttaasut puigortunngorsimasut qanoq attaveqartarpat?
    • innuttaasunik puigortunngorsimasunik qanoq attaveqartoqartarpa?

Puigortunngortunik ataqatigiissaarisut oqarasuaatikkut oqaloqateqarsinnaanermik aamma periarfissaqartitsipput, tassani tallimanngornerit tamaasa nal. 10 - 12 puigortunngorneq pillugu paasisaqarsinnaavutit siunnersorneqarlutillu. Innuttaasut aamma ataqatigiissaarisumik isumaqatigiissuteqarnikkut puigortunngorneq pillugu ilinniartinneqarsinnaapput. Puigortunngornermik nappaateqartut qanigisaasullu angerlarsimaffimminni aamma ilitsersorneqarnissamik ikorfartorneqarnissamillu periarfissaqarput. 

Puigortunngortunik ataqatigiissaarisut puigortunngorneq pillugu kalaallisut danskisullu quppersagaateqarput.

Puigortunngorneq sunaava?

Puigortunngorneq tassaavoq nappaatit arlallit qaratsamik saassussinerannik ataatsimut taaguutaat.

Puigortunngorneq nappaataavoq - utoqqalinermit aallaaveqanngitsoq.

Puigortunngornissamut aarlerinaat inuit utoqqaliartortillugit annertusiartortarpoq. 

Innuttaasup puigortunngornermik nappaatillip naliliisinnaanera, misigissusii aamma kinaassusia allanngoriartorsinnaasarput. Amerlanertigut ajornartorsiutaasarlutik eqqaamasinnaaneq, oqaatsit aamma paasinnittaaseq.

Puigortunngorneq ulluinnarni attaveqarniarnermut inuunerullu naleqassusianut annertuumik siunniuteqartarpoq. Nappaatit ikittunnguit puigortunngornermut ilisarnaatinik ersersitsisartut, katsorsarneqarsinnaapput. Kisianni nappatit amerlasuut annikinnerusumik annertunerusumilluunniiit katsorsarneqarsinnaasarlutik. Taamaattumik pingaaruteqarpoq nappaat sorlerpiaq puigortunngornermut aallaaviunersoq aamma nakorsartinnermut pilersaarusiortoqarnissaa.

Nappaatit assigiinngitsut puigortunngornermut peqqutaasinnaapput.

Quppernerup imarisaa qanganitsersimava?

Quppernermut naqqiutissaqarpit?