Quppernermi uani Innarluutilinnik aamma tarnimikkut innarluutilinnik suliassaqarfimmi Timimik sungiusaasut atuarnerusinnaavatit. Innarluutilinnut aamma tarnimikkut innarluutilinnut immikkoortortami timikkut sungiusaasoqarlunilu pillorissaasoqarpoq, taakkulu innuttaasut 18-iniit 65-inut ukiullit annertuumik innarluutillit sullitarivaat.
Kikkut sullinneqarsinnaappat
- Inuit innarluutillit tapersersorneqarnissaannut Inatsisartut inatsisaat nr. 13, 12 juni 2019-imeersoq naapertorlugu ilaatinneqartut.
- Innuttaasunut Siusinaartumik pensionisiat pillugit Inatsisartut Inatsisaat nr. 40, 9. december 2015-imeersoq.
- Innuttaasut inuusuttunut innarluutilinnut immikkoortortamut Pakkutaq-mut attuumassutillit
- Innuttaasut Ornittagaq Kammagiit-nut attuumassutillit
- Innuttaasut Piginnaanngorsaqqiinermut illumut attuumassutillit
- Innuttaasut Nuummi najugaqatigiiffinnut attuumassutilli
Qanoq attaveqartoqassava
- Innuttaasoq nammineq, qanigisaasut, peqqinnissaqarfimmit sulisut, immikkoortortani paaqqutarinnittut, najugaqatigiiffinni sulisut, ikorfartortit, innersuussisartut, kiisalu sullissisut saaffiginnissinnaapput
- Timimik sungiusaasut pillorissaasullu saaffiginnissummik tigusaqareeraangata innuttaasoq saaffigineqartarpoq siumullu pilersaarusiorneq aallartittarluni.
- Timimik sungiusaasut pillorissaasullu ataasiakkaarluni imaluunniit sungiusaqateqartarnermik aallartittoqassanersoq nalilersorlugulu innersuussutigissavaa.
Pillorissaasut timimillu sungiusaasut qanoq neqerooruteqarsinnaappat?
Sungiusarneq
Sungiusarneq ulluinnarni piffissami 08.00 – 16.00 ingerlanneqartarpoq aamma innuttaasoq, angajoqqaat, pillorissaasut timimillu sungiusaasut tapersersorteqarpallu taakku akornanni suleqatigiissutigalugu pilersaarusiorneqartarpoq. Sungiusarneq innuttaasunut timikkut paasinnittaatsimikkullu ajornartorsiuteqartunut, imaluunniit innuttaasunut tarnimikkut nappaataat kisiat pillugu ajornartorsiutilinnut neqeroorutigineqartarpoq.
Ataatsimoortunut sungiusarneq Fitness.gl-imi, sungiusartarfimmi imaluunniit naluttarfik Malik-mi ingerlanneqartarpoq. Taakkunani timigissarneq, nukkissarneq, uppinnaveersaarneq allallu sammineqarnerusarput. Ataatsimoortunut sungiusaanermi sammineqartartut aamma ilagaat peqqissutsimik siuarsaanerit assersuutigalugu nerisassalerinermut tunngasunik sammisaqarnerit, taakkunanilu nerisassat peqqinnartut aammalu inooriaaseqarnerup kingunerisaanik nappaatit pinaveersaartinneqarnerinut tunngasut ilitsersuutigineqartarput.
Ataasiakkaanik sungiusaanerit innuttaasup nammineq angerlarsimaffiani ingerlanneqarsinnaapput, sungiusartarfimmi, Fitness.gl-imi, nalunnguartarfimmi imaluunniit ulluunerani neqerooruteqarfiusumi. Sungiusarneq innuttaasup pisariaqartitaanik aallaaveqartarpoq, soorlu pitsorinnerulernissamut sungiusarneq, pisunnissamut sungiusarneq, uppinnaveersaarnermut sungiusarneq, timigissarneq imaluunniit inooriaatsimi nappaatit pinaveersaartinneqarnissaannut sungiusarnerit. Ataasiakkaani sungiusaanermi aamma ilanngunneqarsinnaasut tassaapput assaat nukilaatsut qerattarsimasullu, qangatut iliorsinnaajunnaarsaataasartut, imaluunniit ulluinnarni aaqqissuussinissamut suliassanullu pilersaarusiornermut tunngasinnaapput, soorlu errorsinissamut, pisiniarfiliarnissamut nerisassiornissamullu tunngasut. Taamaasilluni innuttaasup suliassani namminerlu inuunermini peqataaffissani malinnaaffiginerulersinnaavai.
Sammisassanut sungiusarnerit kisimiilluni allanillu peqateqarluni ingerlanneqarsinnaapput. Sammisassanut tunngasunik sungiusarnerit ulluinnarni suliassanut attuumassuteqarsinnaapput, tassaasinnaallutik nammineq nerisassiorneq, assassorneq, nammineq uffarsinnaaneq, nammineq atikkersorsinnaaneq imaluunniit ulluinnarni suliassanut allanut tunngasut, arlaatigut nammineq inuttut ajornakusoortissinnaasat.
Sammisassanut sungiusarneq aamma eqqarsartaatsikkut sungiusarnernut atorsinnaapput, taamaalilluni nammineq ulluinnarni inuunermut imaluunniit aaqqissuussanut peqataasinnaalluni. Pisiniarfimmiitsilluni annilaangalertoqarsinnaavoq, pisiniarfimmi inuppassuaqarnera pissutigalugu. Aamma imaasinnaavoq, aaqqissuussinerni ataatsimoorfiusuni peqataasinnaannginneq, soorlu assassoqatigiittartuni peqataanermi.
Sammisassaqartitsinermi holdit siunertarivaat timikkut eqqarsartaatsikkullu peqqissuunissaq siuarsassallugu, silaannarissumi aneernikkut aammalu pinngortitap periarfissarititarpassui atorluassallugit. Holdet ataasiakkaat piginnaasaat pisariaqartitaallu naapertorlugit naleqqussaasoqartarpoq. Assersuutigalugu Nuummi qanittuaniluunniit pisuttuaqatigiinnerit, nuniagiarnerit, pisuttuartitsinerit allalluunniit qungujulaartitsisinnaasut aammalu timimik aalatitsisinnaasut.
Innarluutilinnut tarnimikkullu innarluutilinnut immikkoortortami aamma sungiusarneq atortarparput innuttaasut nakorsaatinik atuinikillisaaffiginissaannut.
Iluaqusersuutit
Innuttaasup piginnaasai allanngoriarujussuarsimappata timimik sungiusaasut pillorissaasullu pulaartarput ulluinnarni oqilisaataasussanik iluaqusersuutinik aamma/imaluunniit inigisap allanngortinneqarnissaanik pisariaqartitsisoqarnersoq ulluinnaat oqinnerutinniarlugit nalilersorniarlugu. Imaassinnaavoq kørestolinik, rollatorinik, qipinnik kuulertalinnik, aaqanngitsut kuulertallit, igaffimmi atortorissaarutinik imaluunniit nerinermut atortunik immikkut ittunik. Timimik sungiusaasut pillorissaasullu iluaqusersuutit inniminnernissaat, naleqqussarnissaat, misilittarnissaat tunniunnissaallu akisussaaffigaat.
Siunnersuinerit ilitsersuinerillu
Timimik sungiusaasut pillorissaasullu innuttaasunut, qanigisaasunut suleqatigisartakkanullu siunnersuineq aqqutissiuussinerlu ingerlattarpaat, taassuma ataani annilaanganerup annikillisarnissaanut aamma sinimmut pitsaanerusumut iluaqusersuutit. Timimik sungiusaasut pillorissaasullu ilitsersuinermik nuutitsinermi ilitsersuinerit, sungiusarneq, issiariaatsini inissiilluarnernilu ikiuuttarput.
Suleqatit
Timimik sungiusaasut pillorissaasullu innuttaasut, qanigisaasut, Pakkutami sulisut, Kammagiit najugaqatigiiffiit kiisalu ikiorfartuisoqatigiit qanimut suleqatigisarpaat. Suleqatit tamarmik malinnaatinneqartarput innuttaasullu piginnaanerisa attatiinnarnissaanut iliuuseqaqataallutik.
Taakkua saniatigut innuttaasup pisariaqartitsinera naapertorlugu ataavartumik avataanit suleqatinit ilisimasassanik paasiniaasoqartarpoq.
Saaffiginnissutissatit tamarmik uunga mailimut ingerlatinneqartassapput: