Saaffiginnissutit suliarereerutsigu suliffitsinnut ataatsimiigiarnissannut aggersarneqarumaarputit. Nuummi najugaqanngikkuit, kommunitsinnili illoqarfiit nunaqarfiilluunniit ilaanni najugaqaruit, taava taarsiullugu oqarasuaatikkut ataatsimeeqatiginissannut qaaqqusisinnaavatsigit, imaluunniit video atorlugu ataatsimiinneq ingerlassinnaavarput.

Ulluunerani meeqqerivimmi perorsaasuuguit imaluunniit atuareernerup kingorna ornittakkami perorsaasuuguit, taava meeqqerivimmiit ikinnerpaamik inuit marluk ataatsimiinnissamut peqataanissaat innersuussutigisarparput (ass. inimi perorsaasoq aamma pisortaq).

Ilinniartitsisuuguit atuarfimmit sapinngisamik ikinnerpaamik inuit marluullusi ataatsimiigiarnissarsi innersuussutigissavarput aamma. (ass. atuaqatigiinni ilinniartitsisoq/klasselærer aamma immikkut atuartitsinermi siunnersorti).

Angajoqqaajuguit ajornanngippat angajoqqaat marluullusi takkunnissarsi innersuussutigaarput.

Ataatsimiinnermi apeqqutigisat sapinngisamik ingerlaannaq akissuteqarfiginiarsarissavarput, imaluunniit innersuussuteqassaagut ajornartorsiut misigisat qanoq iliorlutit sulissutigisinnaanerit.

Apeqqutit akisinnaanngikkallassagutsigu, taava ataatsimiinnitsinni misissuinissap ingerlanneqarnissaanut isumaqatigiissuteqarumaarpugut. Misissuinerit ingerlanneqartarneri tamarmik assigiinngitsuupput, misissuineq ajornartorsiutaasumut tulluarsarlugu suliarineqartarmat, taannalu paasiniarneqaqqaartariaqarluni. Tassunga atatillugu illit peqatigalutit sullissinissamik isumaqatigiissummik suliaqassaagut, taannalu Misimit isumagineqassaaq.

Quppernerup imarisaa qanganitsersimava?

Quppernermut naqqiutissaqarpit?