Ingerlatsivik Sermitsiap inigisimasaanut Sipisaq Avannarleq 10B-mut nuukkallarpoq, Nota Benep qulaani inigisaagalui atuarfeqarnermut ingerlatsivimmit attartortinneqarnerat pissutigalugu.
Atuarfik Samuel Kleinschmidtip matuneqarallarnera tunngavigalugu Sanarfinermut Avatangiisinullu ingerlatsivimmit aalajangiunneqarpoq illoqarfiup qeqqani Nota Benep qulaani init Atuarfeqarnermut ingerlatsivimmut attartortinneqarallassasut. Init maanna atuaqatigiinnit immikkut atuartinneqartunit atorneqarput.
Sulisut piffissami sivikitsumi angerlarsimaffimminni sulitinneqareerlutik allaffeqarfissatut inissaat nutaat maanna piareerneqarput. Sulisut allaffinnut nutaanut iserterput innuttaasullu ingerlatsivimmik, ingerlatsinermik immikkoortortamik, pilersaarusiornermut immikkoortortamik, nunaminertanut oqartussaaffeqarfimmik imaluunniit ingerlatsiviup immikkoortortaqarfippassuisa ilaanni atorfilittanik atassuteqassatillutik ornigullutik saaffiginnissinnaalerput.
Eqqagassalerinermik sullissivik ikuallaaviup eqqaani allaffimminniiginnarsimasoq aammalu pilersaarusiornermut immikkoortortaq qatserisarfimmi allaffimmik attartugaqartoq kisimik nooqataanngillat.
