Ineqarnermut tapiiffigineqarnissamik qinnuteqarit

Uani inigisamut tapiissutinik qinnuteqassaguit malittarisassat piumasaqaatillu atuuttut atuarsinnaavatit.

Ineqarnermut tapiissutinik qinnuteqalernermi eqqaamasassat:

Nalinginnaasumik paasissutissiineq

Ineqarnermut tapiissutit inoqutigiinnut inissiami attartortittakkami najugaqartunut tunniunneqartarput. Ineqarnermut tapiissutit inoqutigiit maannakkut isertitaat kiisalu meeqqat inissiami aalajangersimasumik najugaqartut amerlassusaat tunngavigalugit tunniunneqartarput.

Piumasaqaatit

Aatsaat ineqarnermut tapiissutinik pisinnaavutit:

  • Attartukkami najugaqaruit
  • Inimik attartornissamut allaganngorlugu isumaqatigiissummik peqaruit
  • Aningaasaqarnikkut atugassarititaasut pillugit piumasaqaataasut naammassineqarsimappata

Akigititat

Ineqarnermut tapiissutit init qassiuneri (ini ineeqqallu) aamma inuit inoqutigiinni najugaqartut kiisalu init katersuuttarfiit aallaavigalugit naatsorsorneqartarput. Tassa imaappoq ineqarnermut tapiissutinik pisinnaatitaavutit imaattoqartillugu:

  • Inoqutigiinni kisimiittuuguit, inillu marluuppata
  • Inoqutigiinni inuit marluuppata, inillu pingasuuppata
  • Inoqutigiinni inuit pingasuuppata, inillu sisamaappata
  • Inoqutigiinni inuit sisamaappata, inillu tallimaappata

Annikillisitsiartuaarneq: Inoqutigiit maannakkut isertitaasa tamarmiusut aningaasartat aalajangersimasut sinnersimappagit, tapiissutit ineqarnermut tapiissutini pissarsiarisinnaasatit, appassapput:

  • Ilaqutariit meerartaqanngitsut 68.769 koruunit sinnerlugit maannakkut isertitaqarpata annikillisitsiartuaarneq aallartissaaq. 203.770 koruuninik maannakkut isertitaqartartunut ineqarnermut tapiissutisisarneq atorunnaarsinneqassaaq
  • Ilaqutariit meerartallit 28.654 koruunit sinnerlugit maannakkut isertitaqarpata, annikillisitsiartuaarneq aallartissaaq. 419.655 koruuninik maannakkut isertitaqartunut ineqarnermut tapiissutisisarneq atorunnaarsinneqassaaq


Utoqqalinersianit imaluunniit siusinaartumik pensionisiaqartumut massakkut isertitanit ilanngaassutigineqassapput:

  • Utoqqalinersiutilinnit ilanngaatigineqassapput 18.211 koruunit
  • Siusinaartumik pensionisiaqartunit ilanngaatigineqassapput 18.451 koruunit

Ineqarnermut tapiissutinut killissarititaasut.

  • Nalinginnaasumik annerpaamik tunniunneqarsinnaasut: ukiumut 60.000 kr. / qaammammut 5.000
  • Ineeqqamut ataatsimut annerpaamik tunniunneqarsinnaasut: ukiumut 18.000 kr. / qaammammut 1.500
  • Minnerpaamik tunniunneqarsinnaasut: ukiumut 1.200 kr. / qaammammut 100

Maannakkut aningaasarsiat pillugit annertunerusumik uani paasisaqarnerugit

Qinnuteqarneq

Ineqarnermut tapiissutinik qinnuteqarniaruit, immersugassaq immersussavat. Immersukkannut attartornermut isumaqatigiissut ilanngutissavat. Attartornermut isumaqatigiissut pissarsiarigukku ingerlaannaq qinnuteqarsinnaavutit.

MitID-mik atuisunut
MitID-mik atuisuuguit attaveqaatitigut toqqaannartumik ineqarnermut tapiissutinik qinnuteqarsinnaavutit.

MitID-mik atuisuunngitsunut
MitID-mik atuisuunngikkuit immersugassaq immersukkat ilanngussat pisariaqartut ilanngullugit najukkanni innuttaasunut sullissivimmut imaluunniit nunaqarfimmi allaffimmut tunniutissavat. Tassani qinnuteqarnermut immersugassap immersornissaanut aamma ikiorneqarsinnaavutit.

Malugiuk
Ukiut tamaasa qinnuteqarnissat pisariaqanngilaq. Ineqarnermut tapiissutit ukiut tamaasa ingerlaannartumik naatsorsorneqartarput aammalu kommunimit allagarsissaatit, tassani qanoq annertutigisunik pissarsissanersutit allassimassalluni. Allakkat tigoreernerisa kingorna aningaasartai iluarsineqartussaappata, najukkanni innuttaasunut sullissivimmut imaluunniit nunaqarfimmi allaffimmut saaffiginnissaatit.

Inissiamut allamut nuukkuit, nutaamik qinnuteqaateqassaatit.

Ilisimareeraluarlugu pisussaatitaanak ineqarnermut tapiissutinik pissarsisimaguit, akiligassinneqarsinnaavutit.

Allannguineq

Aningaasaqarnivit inissisimanera allannguuteqarpat, kommunimut nalunaarutigissallugu pisussaavutit.

Maalaarneq

Ineqarnermut tapiissutinik qinnuteqarsimaguit aammalu qinnuteqaatit tamakkiisumik taperserneqanngippat, kommune tunngavilersuuteqarnissamut aammalu maalaaruteqarnissamut ilitsersuussinissamut pisussaaffeqarpoq.

Maalaaruteqarnissaq kissaatigigukku Isumaginninnermi Naammagittaalliuuteqartarfimmut maalaaruteqarsinnaavutit.

Isumaginninnermi Naammagittaalliuteqartarfimmut qanoq naammagittaalliorsinnaanerit takujuk