Illoqarfimmik Inerisaaneq

Kommunimut pilersaarummut tapiliussaq 2b2-4, qeqertat2020, nuussuaq, nuuk

6 years tilbage

SIUNERTAQ
Siunnersuut, Kommunimut pilersaarummut tapiliussaq 2B2-4, Qeqertat 2020 inuussutissarsiuteqarfiullunilu umiarsualiveqarnermi siunertanut atugassiaavoq.

Kommunimut pilersaarummut tapiliussatut siunnersuut Qeqertani umiarsualiveqarfimmi nunaminertani pilersaarusiornissamik qinnuteqaatit aallaavigalugit suliaavoq, nassiussisut tassaallutik Usisaat Aps aamma ingerlatseqatigiit suliffeqarfiit tallimaasut: Royal Greenland, Aalborg Havn, STARK Kalaallit Nunaat A/S, Arctic Group aamma Blue Water A/S. Pilersaarusiornissamik qinnuteqaatip tamanut tusarniutigineqarnerani pilersaarutitut periarfissaq alla uannga nassiunneqarpoq Nuuk Bådpark/Brdr. Pedersen Nuuk Aps, taannalu nunaminertat pilersaarusiorneqarneranni atuutsinneqarluni. Ingerlatsiviup pilersaarusiornissamik qinnuteqaatinik suliaqarnera Kommunalbestyrelsimit 21. novembari 2017-imi pilersaarusiortarnermut inatsisitut allannguut 1. januaari 2016-imeersoq naapertorlugu inaarutaasumik akuersissutigineqarpoq.

Sanaartugassatut qinnuteqaatini siunertarineqartut piviusunngortinnissaat kommunimut pilersaarummut tapiliussassatut siunnersuut naapertorlugu periarfissaalissaaq. Pilersaarummut siunnersuutip nunaminertat pilersaarusiorfissatut qinnuteqaatigineqartut taakkunanilu immikkoortumi attaveqaatit isikkussaatalu pilersaarummi ataatsimut ineriartortinneqarnissaat aalajangersakkatigut qulakkeerneqassaaq. Pilersaaruttaaq naapertorlugu Nuummi containereqarfiup inerisarneqarnissaanut pilersaarutaasimasup ingerlateqqinneqarnissaa qulakkeerneqassaaq, kiisalu nunaminertat kommunimit imaluunniit ineriartortitsinermut ingerlatseqatigiiffimmit kommunip pigisaanit atorneqarsinnaallutik ilaatigut inuussutissarsiuteqarnermut atorneqarsinnaallutik.

Kommuneqarfik Sermersuup Illoqarfiit pingaarnersaat pillugu periusissiaq aamma kommunimut pilersaarut naapertorlugit Nuummi inuussutissarsiuteqarfiup inerisarneqarnissaanut Kommunalbestyrelsip takorluugaanut kommunimut pilersaarummut tapiliussassatut siunnersuut naapertuuppoq.

TAMANUT OQALLISISSIAQ
Siunnersuut tamanut sap.ak. 6-ni tusarniutigineqassaaq, piffissami 28. marsi – 9. maaji 2018.

Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.

Oqaaseqaatit akerliliissutillu Kommuneqarfik Sermersuumi tiguneqareersimassapput 09. maaji 2018. Nallertinnagu, uunga nassiunneqassallutik Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut uunga nassiullugu: plan@sermersooq.gl

Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.

INATSISINUT TUNNGASUT
Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut illuliorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.

PILERSAARUT UANI TAKUNEQARSINNAAVOQ
Kommunimut pilersaarummut tapiliussatut siunnersuutit kommunip nittartagaani sermsersooq.gl-imi tusarniaanernut iserluni aaneqarsinnaavoq, kommunip saaffiginnittarfiani pissarsiarineqarsinnaalluni imaluunniit Sanarfinermut Avatangiisinullu ingerlatsivimmut uunga sianerluni 36 74 00 saaffiginninnikkut pissarsiarineqarsinnaalluni.

Kommuneqarfik Sermersuumit naqinnerlutaqarsinnaaneq eqqumaffigeqquneqarpoq.

PDF