Illoqarfimmik Inerisaaneq

Kommunimut pilersaarummut tapiliussaq 1a20-1

6 years tilbage

Qatanngutigiinnguit pingasut, Nuuk

SIUNERTAQ
Kommunimut pilersaarummut tapiliussatut siunnersuummi pilersaarutitut qinnutigineqarsimasoq »Qatanngutigiinnguit pingasut, Nuummi Svend Jungep Aqqutaani inissiat« aallaavigineqarpoq, naatsorsuutigineqarporlu pilersaarusiornermut inatsit 1. januaari 2016-imi allanngortinneqartoq naapertorlugu 10. apriili 2018-imi kommunalbestyrelsimit inaarutaasumik akuersissutigineqassasoq. Pilersaarutitut qinnuteqaat inaarutaasumik akuersissutigineqassanngippat tusarniaaneq ingerlasoq taamaatiinnarneqassaaq.

Kommunimut pilersaarummut tapiliussatut siunnersuut aqqutigalugu inissiat nutaat 60-it assigiinngitsunik angissusillit inissiarsuarnut pingasunut arfineq marlunnik quleriilinnut agguataarsimasut Svend Jungep Aqqutaani inissiarsuit assigiit marluk avannaatungaani sananeqarsinnaalissapput. Pilersaarutitut siunnersuuteqartoqarnera Nuummi akulikinnerusumik sanaartortoqarneratigut inissaaleqisoqarneranut iluaqutissiissaaq, tamannalumi Nuummi attanneqarsinnaasumik illoqarfimmik ineriartortitsiniarnermi pingaarnertut najoqqutaavoq.

Siunnersuummut illut akornanni illoqannginnersami naasuliviliornikkut (mistbænk), oqquiffissaliornikkut ujarassuarnik issortalersuinikkut nunagissaaneq ilaavoq.

TAMANUT OQALLISISSIAQ
Siunnersuut tamanut sap.ak. 6-ni tusarniutigineqassaaq, piffissami 28. marsi – 9. maaji 2018.

Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.

Oqaaseqaatit akerliliissutillu Kommuneqarfik Sermersuumi tiguneqareersimassapput 09. maaji 2018. Nallertinnagu, uunga nassiunneqassallutik Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut uunga nassiullugu: plan@sermersooq.gl

Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.

INATSISINUT TUNNGASUT
Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut illuliorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.

PILERSAARUT UANI TAKUNEQARSINNAAVOQ
Kommunimut pilersaarummut tapiliussatut siunnersuutit kommunip nittartagaani sermsersooq.gl-imi tusarniaanernut iserluni aaneqarsinnaavoq, kommunip saaffiginnittarfiani pissarsiarineqarsinnaalluni imaluunniit Sanarfinermut Avatangiisinullu ingerlatsivimmut uunga sianerluni 36 74 00 saaffiginninnikkut pissarsiarineqarsinnaalluni.

Kommuneqarfik Sermersuumit naqinnerlutaqarsinnaaneq eqqumaffigeqquneqarpoq.

PDF