Kommuneqarfik Sermersuumi Gadeteam tassa aqqusinermi angalaartartut, NGO-t Københavnimeersut Hjælp Din Næste peqatigalugit Nuummi Brugsenip silataani ippassaq innuttaasunut pisariaqartsitisunullu akeqanngitsunik pizzanik, imeruarsaatinik kissartunik atisanillu agguaaneranni amerlasuut takkupput.
Aaqqissuussineq innuttaasunik pisariaqartitsisunillu amerlasuunik kateriffiuvoq. Pisariaqartitanik toqqaannartumik tunniussisinnaaneq kiisalu Gadeteamip sulinerata innuttaasunut ersarinnerulernissaa siunertaalluni.
Navarana Kotalawala Gadeteamimeersoq nassuiaavoq:
“Sulinerput ersarinnerulersikkusupparput, inuit ilisimaniassammatigut kinaanersugut aammalu suna pillugu sulinerluta. Innuttaasut nammineq pisariaqartitaannik tunniussisinnaanerput pingaaruteqartorujussuuvoq, tassa toqqaannartumik ikiuinissamut attaveqalersitsinissamullu periarfissatsialammat.”
Gadeteamip 2026 aallartinneraniilli Hjælp Din Næste suleqatigilerpaa. Ullut 14-it ataallugit 25.000 kr-it katersorneqarsimapput atisanik atortussanillu pisiniarnissamut, kiisalu NGO Hjælp Din Næste-p palletsinik 100 kg-inik ukiuunerani atortussanik, sinnguppuuinik, kamippaat aamma nuersakkanik inuit ataasiakkaanit tunniunneqarsimasunit nassiussisimalluni.
Suliniut Gadeteam aamma Hjælp Din Næste suleqatigiinnerannut nutaamut ilaavoq, angerlarsimaffeqanngitsut innuttaasullu salliutinneqarlutik ikiorneqarnissaat nukittorsarniarlugu.
