Kommuneqarfik Sermersuumi kommunalbestyrelsip najugaqatigiiffinnik nutaanik marlunnik pilersitsinissaq martsip 23-ani 2026 akuersissutigaa. Suliniummi innuttaasunut innarluutilinnut najugaqarfissanik nukittorsaanissaq aamma utaqqisut allattorsimaffiannik annikillisaaneq siunertarineqarpoq.
Najugaqatigiiffiit nutaat marluk Aqqusinersuaq 13-imi aamma Blok 9-mi pilersinneqassapput, ingerlatsivimmit inissat nutaat arfineq-pingasut pilersinneqassapput, najugaqatigiiffinni ataasiakkaani inissat sisamanut agguataarlugit. Neqeroorutit inersimasunut timikkut imaluunniit tarnikkut piginnaasakillisimasunut ulloq unnuarlu pisariaqartitsinngikkaluarlutik ulluunerani ikorfartorneqarnissamik pisariaqartitsisunut sammitinneqarput. Tamanna kommunip innarluutilinnut politikkianut naapertuuppoq, tassa innuttaasut ataasiakkaat pisariaqartitaannut naleqquttunik najugaqarfissanik neqerooruteqarnissaq.
Inissat utaqqisut allattorsimaffiannit innuttaasunut, najugaqarfinnit najugaqatigiiffinnut nuunneqartussanut kiisalu ulloq unnuarlu neqeroorutinit angerlartinneqartussanut tunniunneqassapput. Taamaattumik pilersitsinerup najugaqarfinni najugaqatigiiffinnilu utaqqisut ikilinerannik kinguneqarnissaa naatsorsuutigineqarpoq.
Isumaginninnermut Innarluutilinnullu Ataatsimiititaliami siulittaasoq Justus Hansen ima oqaaseqarpoq:
“Nuummi najugaqatigiiffinnik nutaanik marlunnik maanna pilersitsisinnaagatta nuannaarutigaara. Tamanna pingaarutilimmik alloriarneruvoq, innuttaasut innarluutillit pisariaqartitaannut naleqquttunik neqeroorfigineqarnissaat aamma sapinngisamik nammineerlutik inuunissaminnut tapersersorneqarnissaat qulakkeerniarlugu.”
Najugaqatigiiffiit marluk 2026-mi pilersinneqassapput. Illut piareersareerlutillu iserterfigineqarsinnaanngoreerput, taamaattumillu akuersissuteqarnerup kingorna piaartumik atorneqalernissaat periarfissaalissaaq.