Nuuk Snow Festivalen sisamanngornermi ualikkut ammarlugu borgmesteri oqalugiarpoq, aallaqqaataaniilli takusaasut malinnaavigisinnaavaat apummik kipparissorsualianik ilusilersuillutik suliaqartut.
Ilusilersukkat sapaatiummat nal. 12 piareerneqarput, tamatumalu kingorna naliliisartunit tallimanit nalilersorneqareerlutik unamminermi ajugaasut toqqarneqarput. Takusaallutik takkussimasut aamma sms-ikkut toqqaasinnaatitaasimapput, ajugaasutut toqqarneqartut aamma isiginnaartunit toqqarneqartut tassaapput franskit holdiat, ilusilersuinermilu europamiut aamma inuit nunaanneersumik kiinaannik ilusilersuipput.
Nuuk Snow Festimi holdit peqataasut katillutik 12-iupput. Holdini peqataasut 4-t 8-llu akornanni amerlassuseqarput, aaqqissuussarlu iluatsissinnaaqqullugu nammineq kajumissutsiminnik ikiuuttut 20-t suleqataapput.
Festivali Nuummi ukiumoortumik ingerlanneqartarpoq, holdikkaarlutik apummik ilusilersuineq unammissutigisarpaat, holdit tamarmik immikkut apummik kipparissuliamik 2,4 x 2,4 x 2,4 meterisut angissusilimmik pisarput, ullualunnguillu ingerlanerini ilusilersortussaallugu. Apummilli kipparissuliat minnerulaarput aputissaaleqineq pissutigalugu. Ukioq manna qulequtaasoq tassaavoq Issittup allanngoriartornera, aaqqissuussaq ukiut apeqqutaatinnagit innuttaasunit kikkunnilluunniit akeqanngitsumik orninneqarsinnaavoq.
Ullut tamaasa ilusilersuinerit ingerlanneqarnerinik malinnaajartorlutik takkuttut amerlasarput, takuneqarsinnaasarluni apummik kipparissuliarsuit ilusinikkiartortinneqartut. Takusaasut sapaatip akunnera naallugu holdikkaat apummik kipparissuliamik suliaqarnerat malinnaavigisinnaavaat, ilusilersukkallumi meeqqaniit inersimasuniillu takusassallugit soqutigineqarput. “Meeqqat ilusilersukkanik takunnileraangamik kusaginnillutik nuannaajummertarnerat takullugu nuannertaqaaq,” Nuuk Snow Festimi suliniummik aqutsisoq, Jørgen Spring oqarpoq.
Festivalimut takusaasut aamma assigiinngitsunik sammisassaqartinneqartarput. Festivalip ingerlanerani ilaatigut silent discortitsisoqarpoq, orniguttut hovedtelefoneqarlutik qitissinnaallutik, ilaatigut DJ Hans Ole aamma DJ Leopatra appisimaartitsisoralugit.
Nuuk Snow Fest Kommuneqarfik Sermersuumiit aaqqissuunneqarpoq, Grønlandsbanken aamma Air Greenland suleqatigineqarlutik.
Ilusilersukkat sapaatip akunnera atatinneqassapput, taamaattumik takusarnissaanut nuannaarutiginissaanullu suli periarfissaqartoqarluni.