Tasiilami inuusuttut kulturikkut illuanni Igdlomi inuusuttut ataatsimoorlutik inuusuttooqatigiissinnaapput. Tamaani illoqarfiup inuusuttai ukiuni tallimanngulersuni peqqinnartunik naleqartitaqarlutik ataatsimoorfeqarsinnaapput. Inuusuttut namminneq illup qanoq atorneqarnissaanik ilusilersueqataanissaat Kommuneqarfik Sermersuup kissaatigaa – qaanniorneruppat, qitinneruppat imaluunniit spillerneruppat.
Assimi takuneqarsinnaasutut illumi unnummi tassani nerisassiortoqarpoq, inuusuttorpaaluillu nereqataapput. Unnuup ingerlanerani isaasoqallattaarpoq. Ilaat kiinnamikkut tanipput, allat nerrivimmi arsaarartarfimmi pinnguarput ilaallu issiaarput oqaloqatigiittarlutik. Tamarmik inuusuttuupput – inuusuttooqatigiillutillu. Tamaani ataatsimoorsinnaapput, namminiullutillu peqqinnartumik ataatsimooqatigiillutik. Inuusuttut ataatsimooqatigiinniarlutik sumiiffinni allani naapeqatigiissinnaagaluarlutik illumi naapeqatigiittarput, amerlasuuttaaq peqqinnartumik ataatsimoorfeqarsinnaallutik. Illumiinnissamut tamanut tunngaviusoq tassaavoq imminut ajunngitsumik pinissaq, oqaloqatigiilluni akerleriissutinik aaqqiineq aamma inuuneq nuanniilligaangat tapersersoqatigiittariaqarneq. Kikkut tamarmik 14-it 30-llu akornanni ukiullit tikilluaqqusaapput. Illoqarfiup innuttaasa sisamararterutaat sinnilaarlugu peqataasinnaapput.
“Kommunitsinni inuusuttunut kulturikkut illorititarput Tasiilami inuusuttut ajunngitsumik ingerlanissaannut isumalerujussuuvoq. Inuusuttuunermiit inersimasunngorluni ikaarsaarneq Igdlomi peqqinnartumik tapersersoqatigiiffiuvoq – isersimaffigiuminartuullunilu,” Tasiilami nunap immikkoortuani pisortaq, Hjørdis Viberg oqarpoq.
Inuusuttut kajumissutsiminnik ikiuuttut allannguisut
Kajumissutsiminnik ikiuuttut illumi pingaaruteqarluinnartuupput. Taakkunani inuusuttut akisussaaffeqarusuttut nalunaartarput. Taakku illumi suliassanut ikiuuttarput aamma akerleriittoqalissappat aaqqiiniaqataassallutik.Unnummi tassani kajumissutsiminnik ikiuuttut ilaat unnukkorsiutinik igaqataapput. Kajumissutsiminnik ikiuuttut ilaat piginnaasaminnik misilittaapput, inuusuttullu allat inuusuttoqatiminnik akisussaaffimmik tigusisunik ikiuuttunillu nuannaartorisaqalerput. Unnuk taanna aamma kukkukooq kung pao-iliarineqarpoq.
“Kajumissutsiminnik sulisut annertuumik suliaqartarput. Tunngavileeqataalluartuupput, illullu inuusuttuuffiginissaanut nuannersuutitsillutik,” inuusuttut kulturikkut illuanni Igdlomi aqutsisoq, Hans Poul Andersen oqarpoq.
Sammisassarpassuusut
Igdlo inuusuttunut katersuuffiusinnaanermi saniatigut sammisassarpassuarnik neqerooruteqartarpoq. Illuaqqat marluk Igdlomut atassuteqarput, inuusuttullu pinngortitamiissagaangata atorneqartarlutik. Taassumattaaq saniatigut illu qimminik qimuttunik peqarpoq, inuusuttullu taakkunannga isumaginnittuupput. Illumi aamma allanik ilinniarneqarsinnaasorpassuarnik suliaqartoqartarpoq. Assersuutigalugu inuusuttut soqutigineqaqisumi Mountain Leaderimi pikkorissarlutik angallassisartunngorniarsinnaapput, inuusuttumiit inuusuttumut kinguaassiutinut tunngasunik ilinniartinneqarlutik aamma qajartornermik ilinniartinneqarlutik.
Inuusuttut kulturikkut illuat maanna Igdlotut ingerlalluni 2021-mili atulerpoq, tassungalu siunertamut atorneqartussatut sananeqarluni. Illoqarfimmi inuusuttut ataatsimiisinneqarneranni illutaarnissaq kissaatigineqarmat illu sananeqarpoq.
