Kommunalbestyrelsip Paamiuniinnerani ullut imartupput, tassani pulaarnerit arlallit illoqarfimmilu ulluinnaat, neqeroorutit inuussutissarsiornerlu pillugit paasisaqarfiupput.
Pilersaarummi ilaatigut ilaapput Timersortarfimmut, atuarfimmut aamma nipilersornermik ilinniarfimmut pulaarnerit kiisalu angerlarsimaffeqanngitsunut unnuisarfimmi isumaginninnikkut neqeroorutini oqaloqateqarneq aamma suliffeqarfiusimasunik alakkaaneq. Kommunalbestyrelsimiittaaq ilinniartitaaneq suliffissaqartitsinerlu ukkataralugit Majoriaq imarsiornermillu ilinniarfik pulaarneqarpoq.
Angalanertaaq umiarsualivimmi qalulerivimmi, amutsivimmi tigooraavimmilu walk and talkernermik kiisalu Royal Greenlandip najukkami suliffissuanut pulaarnermik imaqarpoq.
Tikeraarnermi kommunalbestyrelse illoqarfik pillugu periusissiamut tunngatillugu saqqummiinermi peqataavoq, tassani ineriartornissamut siunnerfik, periarfissat najukkamilu eqqarsaatit ataatsimut oqaluuserineqarput. Aammattaaq siammarterineq aallartinneqareersoq aammalu najukkami akisussaaffik ineriartortoq pillugit tikeraarnermi oqaluuserineqarput.
Peqqinnissaqarfik, Politiit aammalu ilaqutariinnik sullissivik naapinneri atugarissaarneq, pinaveersaartitsineq aammalu suliassaqarfiit akimorlugit suleqatiginninnissaq pillugit pingaaruteqarluinnartumik oqaloqatiginninnissamut inissaqartitsivoq.
Nunap immikkoortuani pisortap, Heide Jeremiassen kommunalbestyrelsip tikeraarnera nuannaarutigaa: ”Uagutsinnut Paamiuniittunut pingaaruteqarluinnarpoq paasissutissinneqarluarsimasumik najukkamilu pissutsinut paasinnilluarnerit tunngavigalugit aalajangiinerit ingerlanneqartarnissaat. Paamiut ataatsimoorluarnermik, sulisunillu tunniusimasunik aammalu inuussutissarsiortunik ineriartorusussusilinnik imaqarpoq – kisianni aamma aalajangersimasumik pisariaqartitsivugut siunniuteqartunik aaqqiiffigisassanik. Taamaattumillu kommunalbestyrelse tamarmiulluni maani illoqarfiup ulluinnaanut najukkamilu isiginnittariaatsimik ataatsimoorlutik pissarsiaqarsimanerat pitsaalluinnarpoq. Illoqarfiullu ineriartorteqqinnissaa pillugu aalajangiussassanut tunngavilersuutinik nukittunerusumik tunisivoq.
Tikeraarneq pillugu borgmesteri Avaaraq Olsen oqarpoq: “Kommunalbestyrelsip innuttaasunut, sulisunut aammalu suleqatigisanut qanilaarnermi iluaqutaalluarnera misigaat. Paamiuniinnermi misigisat pitsaanerusumik aalajangiiffiusinnaasumik aammalu najukkami iliuuseqarluarnerusinnaaffiusumik siammarterinerup suliniutigineqarnerata tapersersorneqarnera nukittunerulersippaa. Aammattaaq tikeraarnerup takutippaa aalajangiinerit eqqortut ingerlanneqassappata qanimut oqaloqatigiinnissaq peqatigiinnissarlu qanoq pingaaruteqarluinnartigisut. Tunniusimaneq tikilluaqqusinerlu misigisarput suliniuteqaqqinnissatsinnut aammalu illoqarfiup nukittorsarnissaanut pisariaqartitaalu aallaavigalugit aaqqiissutinik pilersitsinissatsinnut tunngaviliilluarput.”