Ilisimasassarsiortut umiarsuat ilulissat akornisigut Tasiilap avataatigut ingerlaaleraangata Jaakusaaq qungujulalluni qaqqat innaaqqissut tikkuartortarpai angerlarsimaffimmisut taasani. Jaakusaap angerlarsimaffimminik eqqaanillu tulluusimaarluni nittarsaasarnera suliffiuinnanngilaq.
Jaakusaaq Sørensen Tasiilameersoq ukiut kingulliit pingasut umiarsuit ilisimasassarsiortut Tunumi Kitaanilu angalagaangata sumiiffimmik nassuiaassisartuuvvoq. 2022-miit nunanit tamalaanit tikeraartorpassuit Kalaallit Nunaata pinngortitaa, kulturia aamma ulluinnaat pillugit immikkuullareqqissaartumik ilisarititsisarpoq, Zodiac-imik angalanerit Tasiilap Ittoqqortoormiillu avataanni iluliarsuit akornanni.
Najukkami ataqatigiissaakkamik Kommuneqarfik Sermersuumi takornariaqarnermut immikkoortortaqarfiata aamma umiarsuaatillit Ponant akornanni suleqatigiinneq aqqutigalugu Jaakusaaq siullermeerluni ikivoq tassani siunertarineqarluni sumiiffimmik ilisimasanik tunniussaqarnissaa aamma tikeraat misigisassaannik pitsanngorsaanissaq. “Tasiilamut angalanerit pingasut kisiisa ilaaffigisussaagaluarpakka,” oqaluttuarpoq. “Kaptajnilli suleqatimmalu suliara nuannarimmassuk isumaqatigiissut sivitsorneqarpoq. Tamannalu sulilerninnut aallarniutaavoq.”
Umiarsuarmi kalaallip nipaa
Umiarsuarmi Jaakusaaq kulturimik paasisitsiniaasutullu pinngortitamik nittarsaassisarlunilu nannunik alaatsinaatsutut sulisarpoq. Qallunaatut, tuluttut, tunumiusut kitaamiusullu oqaluttarpoq aamma allaat franskisut immannguaq ilikkarsimavoq franskit tikeerarpassuit atassuteqarfigisinnaajumallugit.
“Ulluinnakka paasisitsiniaanermik aamma sillimaniarnermik akuleriiupput,” nassuiaavoq. “Tikeraat ilaannikkut qaqqatigut angalaaruttarpakka pinngortitamik oqaluttuarisaanermillu oqaluttuuttarlugit. Ilaannikkut nannunut nasiffimmi nasittarpunga.”
Tikeraat amerlanerit Kalaallit Nunaanni inuuneq pillugu apeqquteqartarput, aamma ilaannikkut siumut isummiussereersimasunik naapitsisarpoq. “Suli ilaqarput aperisartunik “sermini illoqarnersugut,” qungujulluni oqarpoq. “Taava nassuiaassisarpunga “illu” “igloo”-lu tassaaginnartut qangali paatsoorneqarsimasuusut. Amerlasuutigut tamanna oqaatsinut kulturimullu ataqqinninnerulernermik kinguneqartarpoq”
Najukkami tatiginninneq tulluusimaarnerlu
Umiarsuit Tunumut tikikkaangata tamatigut tikilluaqquneqartarput. Pingaartumik Ittoqqortoormiormiinut pingaaruteqarpoq umiarsuarmi kalaallimik angallassisoqarnera. “Piniartut arlallit oqarfigivaannga nalunngikkaangamikku ilaasunga toqqissisimanarnerutittarlugu,” Jaakusaaq oqaluttuarpoq. “Siusinnerusukkut ernumassutigisarsimavaat malittarisassat malinneqartarnersut, massakkulli nalunngilaat arlaannik ajortoqarpat qisuariarsinnaasunga.”
Nannunik nasittussatut sulilerumalluni Jakusaaq piniarnermut allagartartaarsimavoq, isumannaatsumik aallaasinik atuisinnaaniassagami. “Kalaallit Nunaanni amerlasuutigut alliartornitsinni ilinniartarparput,” oqarpoq. “Umiarsuaatillilli pappiaraqarnissaq piumasarivaat, taamaattumik pisaarpunga.”
Killingusaat nutaat
Ullumikkut Jakuusaaq Stockholmimi najugaqarpoq, tassani universitetimi biologitut ilinniagaqarluni. Svenskimit ilisimatusartumit isumassarsisinneqarsimavoq, umiarsuarmi naapissimasaminit. Ilinniarneq piffissamik tigusigaluartoq neriuppoq aasaanerani angallassisartutut uteqqissinnaalluni. “Ilinniaatigalugu allamik taama pitsaatigisumik suliffissaqanngilaq,” oqarpoq. “Nunaga nittarsaatissallugu periarfissaqarpunga peqatigitillugulu qulakkeerlugu paasineqarnissaq ataqqineqarnissarlu.”
