Nuup Saava – nuutoqqatut taaneqartarnikoq sulili taamatut ilisimaneqartoq – pillugu tamakkiisumik pilersaarutip suliaralugu aallartisarnissaanut siunnersuut kommunalbestyrelsimit akuersissutigineqarpoq.
Borgmesteri Avaaraq Olsen siunnersuuteqartuuvoq aamma innuttaasut kissaataat tunngavigalugu immikkoortup inerisarnissaanut suleqatigiinnit ataatsimoorunneqarpoq.
Innuttaasunik peqataatitsinertut ingerlatat marluk annertuut tunngavigalugit siunnersuut pilerpoq
Immikkoortoq siunissami qanoq takorloorneqarnersoq kommune 2023-mi annertuumik ingerlataqarpoq aamma Nuuk 2035-p tungaanut sulinermut atatillugu kissaatigineqartut nutaamik oqaloqatigiissutigineqarneratigut naqissuserneqaqqipput.
Ingerlatat marluusut sammisanut assigiinnut annertuumik sammitinneqarput:
- Immikkoortumi kulturimut sammisassaqartitsinermullu tunngasut ersarinnerussasut
- Niuertarfeeqqat aamma sannaviit nutaaliorfiusut
- Illoqannginnersani mingutsitsinngitsunut issittumullu tunngasut
- Immikkoortup kulturikkut oqaluttuarisaaneranik atorneqarnera
- Toqqissisimanarnerunissaa qullilersorluarsimanernissaalu
Innuttaasut oqariartuutaat erseqqarilluinnarpoq: Nuup Saava uummaarinnerussasoq, kulturimut oqaluttuarisaanermullu tunngasunik peqarnerussasoq – ukioq kaajallallugu anguneqarsinnaasunik toqqissisimaffiusunillu.
Holmit Illuannit Orsiiviup Nuunnguata tungaanut ataatsimut inerisaanissaq
Immikkoortup Holmit Illuanniit Orsiiviup Nuunnguata tungaanut tamaat ataatsimut inerisarneqarnissaa aallartinneqassasoq suleqatigiinniit kissaatigineqarpoq.
Siunnersuummi makku ilanngunneqarput:
- Holmit Illuanniit issittumi naatsiiviup pilerseqqinneqarnera
- Orsiiviup Nuunnguata tungaanut ataqatigiissakkamik qullilersuineq
- Immikkoortumi kommunip illuutaanik siunissami kulturikkut atuinissaq pillugu oqaloqatigiinneq
Siunnersuut kommunalbestyrelsimit akuersissutigineqarneratigut tamakkiisumik pilersaarummik suliaqarneq aallartinneqarsinnaanngorpoq.
Tamakkiisumik pilersaarut pingaarnersiuinissamut toqqammavittut
Innuttaasunik peqataatitsinertut ingerlatat marluusut tunngavigalugit tamakkiisumik pilersaarutip kulturikkut kingornussanik, illoqarfimmi inuunermik, toqqissisimanermik, pinngortitamik sammisassanillu ataatsimut takorluukkatut ataqatigiilersitsisussamik suliaqartoqarnissaa suleqatigiinnit kissaatigineqarpoq.
Ukiumi missingersuusiorfiusussami immikkoortumi pingaarnersiuinissamut tamakkiisumik pilersaarut toqqammaviliissaaq aamma aningaasaliinissaq missingersuusiornissami tulliuttumi ilaatinneqassaaq.