Aningaasaqarnermut Inuussutissarsiornermullu Ataatsimiititami februaarip ulluisa qulinganni Nuummi utaqqiisaasumik immikkoortukkuutaartuik atuarfiliortoqarnissaa eqqartorneqarpoq. Kisianni KNR-imi nutaarsiassamik ilanngussisoqarmat, oqaasertaani inaarutaasumik aalajangiisoqareersimasutut isikkoqartinneqarpoq.
Maannakkuugallartoq atuarfiliortoqarnissaa suli aalajangiunneqanngilaq. Immikkoortukkuutaartumik atuarfiliortoqarnissaanut periarfissat ingerlatsivimmit nangittumik misissuiffigineqarnissaat ataatsimiititamit Politikkikkut tapersersorneqaannarpoq.
Borgmesteri Avaaraq Olsen, nassuiaavoq: ”Uggornarpoq oqaatsit taakkua KNR-imit atorneqarmata, tassami suli sumilluunniit aalajangiisoqarnikuunngilaq. Maannakkut suliarineqartut ilagivaat, immikkoortukkuutaartumik atuarfiliornissamut periarfissanik misissuinerit ingerlanneqarnerat. Maannakkut kommune ’sanaartornianngilaq’ aammalu immikkoortukkuutaartumik sanaartornissaq ’pilersaarusiunngilarput’ ”`.
Aallaqqaammut misissuinermi inissiiffissatut periarfissaq
Sanarfinermut Avatangiisinullu Ingerlatsivimmit aallaqqaammut inissiiffissatut periarfissanik misissuisoqarpoq. Tassunga atatillugu Nuussuarmi arsaattarfiup eqqaani sanaartorfissaq inissiiffiusinnaasutut paasineqarpoq.
Misissuinerup ilaani tamakkiisumik annertussusissamik misissuisoqarpoq aammalu utaqqiisaasumik akitigut missiliuusiortoqarluni, qanoq annertutigisumik sanasoqarsinnaanera missiliorniarlugu, aammalu sanasoqassappat qanoq akeqarumaarnersoq.
Suliassamut tunngatillugu missingersuutinut aningaasaliissuteqartoqarnikuunngilaq. Naatsorsuinerit suliarineqaannarput ataatsimiititami aallaaviatigut tamakkiisumik politikkikkut eqqartuisoqarnissaanut atugassanngorlugit.
Aalajangiisoqanngilaq
Borgmesteri isumaqarpoq, pingaaruteqartoq erseqqissassallugu, suliaq taamaallaat ataatsimiititami eqqartorneqarmat. Aalajangiinermi politikkikkut taperserneqarnera imaanngilaq inaarutaasumik aalajangertoqartoq.
”Politikkikkut tapersiisoqarnera isumaqaannarpoq, ingerlatsivimmit suliaq suli erseqqissaassutigineqassasoq aammalu kingusinnerusukkut aalajangiinissamut tunngavissanik erseqqinnerusunik saqqummiussisoqassasoq. Suliassaq piviusunngortinneqassappat politikkikkut namminermit aalajangiisoqassaaq missingersuutinilu pingaarnersiuisoqarluni. Maannakkorpiaq saqqummiunneqartoq taamaallaat eqqartorneqarpoq,” borgmesteri Avaaraq Olsen naggasiivoq.