Atuarfik Samuel Kleinschmidtip aamma Atuarfik Ukaliusap matuneqarnerini Nuummi meeqqat meeraaqqerivinniit meeqqerivinnut – aamma meeqqerivinniit atuareernerup kingorna ornittakkanut nuunnissaannut utaqqisut allattorsiaffiat unammillernartoqarpoq.
ASK-imi USK-imilu atuartut tamarmik atuartinneqarnissaat qulakkeerniarlugu, Meeqqanut Atuarfeqarnermullu Ingerlatsivimmit kommunimit Atuareernerup kingorna ornittakkani init arlallit atuarfinnit marluusunit atuartunut sunnerneqartunut atuartitsiviugallartussatut atorneqarput.
Taamatut aaqqiissuteqarneq atualertussanut ajornartorsiortitsivoq, taakkua massakkut pisarneq malillugu meeqqerivimmiit nuussinnaanngikkallarput.
“Kommunimit inissisimaffik iliuuseqarfiginiarneqarpoq, ilaatigut ukioqatigiinngiiaanut meeqqerivinni ininik matugallarneqarnikunik ammaaqqinnikkut, periarfissanilu inissaqartitsinermik iluarsiinikkut. Paasisinnaalluarparput, inissisimaffimmi angajoqqaarpassuit sunnerneqartut aamma sapinngisarput atorlugu aaqqiissutissarsiorpugut,” Rena Kriegel Mikkelsen, Meeqqanut Atuarfeqarnermullu Ingerlatsivimmi pisortaagallartoq taama ilisimatitsivoq.
Kommuneqarfik Sermersuumit ukioq manna aggustimi ukiup atuarfiusup aallartinnerani Atuarfik Inussuk ammarpat inissisimaffiup nalinginnaasunngornissaat qilanaarineqarpoq.
“Innuttaasunit amerlasuunit saaffiginnissutinik tigusaqartarpugut nalornissuteqartoqannginnissaalu kissaatigaarput. Taamaattumik imatut nalunaaruteqarnermi innuttaasunut massakkut inissisimaffik pillugu paasinninnerulersitsissasoq neriuutigaarput. Atugassarititaasut nalinginnaasunngorteqqinnissaata tungaanut sunnerneqartut kommunimit nalunaarutinik ingerlaavartumik malinnaaviginninnissaat kajumissaarutigaarput,” Rena Kriegel Mikkelsen oqarpoq.
Inissisimaffik Meeqqanut Atuarfeqarnermullu Ingerlatsivimmit malinnaavigineqaqqissaarpoq, tassani tamakkiisumik isiginninnissamik aaqqiissutissarsiornermillu ukkassisoqarpoq.