Sisamanngornermi februaarip 19-ani nal. 17 saqqummersitsineq ”Kusanartuliat” eqqumiitsuliortunik aqqanernik assassornermik kalaallisuunillu suliaqartunik aammalu Kittat-ni mersortartunik peqataaffigineqartoq Nuummi Eqqumiitsulianik Saqqummersitsivimmi ammaanersiorneqassaaq.
Saqqummersitsinermi kalaallit kusanartuliaat aammalu eqqumiitsuliornermut qanissusaat misissorneqarpoq. Eqqumiitsuliortut aqqaneq marluk mersortarfimmi Kittani mersortartut pingasut suliaat kusanartuliorneq tunngavigalugu suliaminnik saqqummersitsinermi takutitsissapput. Kusanartuliorneq Kalaallit Nunaanni kulturimut pingaarutilimmik inissisimasuuvoq ukiunilu makkunani uummaarissarneqaqqinnera malunnarluni. Ukiuni makkunani kusanartuliornerup soqutigineqarnera malunnarluarpoq, kusanartuliornermiillu eqqumiitsuliornermut namminnerlu kalaallisuuliornerminnut isumassarsiortartut amerlallutik.
Saqqummersitsinermi ilaatigut Kristine Spore Kreutzmannip marrarmik suliai takuneqarsinnaapput, Mike Lyngep matusartuaraliai, Lisa Kreutzmannip aamma Kim Kleist Eriksenip ilusilersugaat, Hanne Bruunip Nadja Kreutzmannillu pinnersaasiaat, aammalu Lisbeth Karline Poulsenip, Naja Rosing-Asvidip Ivalo Abelsenillu eqqumiitsulia takuneqarsinnaallutik. Kalaallisuunut qaninnerusunik suliat Liv Aurora Stenderip, Sofie Amondsenip aamma Kittat takutissavaat, aammalu Ulla Lorentzenip avittanik suliai takuneqarsinnaassallutik.
Saqqummersitsinermut atatillugu martsip tallimaani takornariartitsinissat marluk pilersaarutaapput. Takornariartitsinerit Nuummi kulturilerinermik suliaqartut arlallit suleqatigalugit pilersaarusiaapput, Kittat-nit aallarnerneqarsimasut. Arnat Ulluat martsip afineq-pingajuani pisussaq malunnartinniarlugu takornariartitsinerit ingerlanneqassapput.
Ammaanersiorneq sisamanngornermi februaarip 19-iani nal. 17-19 pissaaq, eqqumiitsuliortullu arlallit peqataassallutik. Ammaanersiornermut peqataaneq akeqanngilaq, soqutiginnittullu tamarmik tikilluaqusaallutik.
Saqqummersitsineq ”Kusanartuliat” Kristine Spore Kreutzmannimit pilersinneqarpoq, aammalu Bornholmimi, Sverigemi Savalimmiunilu 2025-ip ingerlanerani takutinneqarsimalluni. Nuummi Eqqumiitsulianik Saqqummersitsineq Aningaasaateqarfik Sermermit taperneqarpoq.
Eqqumiitsuliortut saqqummersitseqataasut:
– Hanne Bruun
– Ivalo Abelsen
– Mike Lynge
– Kim Kleist Eriksen
– Kristine Spore Kreutzmann
– Lisbeth Karline Poulsen
– Liv Aurora Stender
– Nadja Arnaaraq Kreutzmann
– Naja Rosing-Asvid
– Sofie Amondsen
– Lisa Kreutzmann
– Ulla Lorentzen
– Kittat