Borgmester Avaaraq Olsenimit oqaaseqaat:
Kalaallit Nunaat Kommuneqarfik Sermersoorlu piffissami matumani nunarsuaq tamakkerlugu malinnaaffigineqangaatsiarpoq, piffissami innuttaasutsinni annilaangaffiusumi nalorninartorsiorfiusumilu. Taamaattoqarnerani aalajangiussatit, quiasaarinitit periutsitillu quiananngillat. Kinguneqartarput. Inunnut piviusunut ilumoortunik kinguneqartarput.
Qanittumi assersuutit takuagut tassa tikeraat kikkut tamarmik orniguffigisinnaasaanni oqqassaarisut, politikkikkut ilisarnaatit atorlugit tupaallatsitsiniartut allallu meeqqanut sorsunneq, nakuuserneq tiguaanerlu pillugit apersuisut. Taamaaliorneq quiassuarnerunngilaq. Isumalimmik tusagassiornerunngilaq. Inuiaqatigiinni tarnikkut tatisimaneqareersunut soqqusaatsuliorneruvoq.
Innuttaasut amerlasuut ernumapput. Ilai annilaangapput. Pingaartumik meeqqat angerlarsimaffimmi, internetsikkut aqqusinermilu pisut pillugit tusakkanik paasiuminaatsitsipput. llaqutariit annilaangapput, sinnarlupput toqqissisimanngittuarlutillu. Ernummatit tamakkua takuneqarnissaq, isiginnaarneqarnerunissaq illarnartunillu takusassiiniarnermut ajornerulersinnerat sapiitsuliornerunanilu nutaaliornerunngilaq. Innuttaasunut toqqissisimanngereersunut nanertuineruliinnarpusi.
Meeqqat atortutut pineqanngisaannartussaapput. Ukiukitsunik angajoqqaanit akuersissuteqaqqaarani filmiliorneq, sakkutuut, toqu imaluunniit angerlarsimaffimmik annaasaqarsinnaaneq pillugit apersuineq akuersaarneqarsinnaanngilaq. Ulorianarpoq akisussaassuseqannginnerullunilu.
Illoqarfiit pingaarnersaanni kulturikkut illorsuatsinni sakkutooqarfiup pissaanilissuup sapaatit akunnerini arlalinni nunatsinnik sakkutuulersorluni tiguaaniarluni oqariartuuteqartup erfalasuanik amusiniarneq quiasaarnerunngilaq. Quiananngilaq. Akornusiingaatsiarsinnaavoq.
Maani tikeraajuvusi. Tamanna akisussaaffimmik nassataqarpoq. Kulturikkut assigiinngissutsimik quiasaarutiginninneq inunnik ersilersitsisoq toqqissisimanermillu misiginerannik tatisilersitsisoq utoqqatsissutissaanngilaq. Iliuuseqarniaraluarneq kingunerisassaanniit pingaaruteqarnerunngilaq.
Naalakkersuisut kommunilu kiffartuussiviit uippakajaarnermik annikillisaaniarlutik piffissamilu unammillernartumi innuttaasut tapersersorniarlugit ullut tamaasa suleqatigiipput. Tikeraat nuimaniaannarlutik iliuuseqartut sulinermut tassunga akornusersuititaassanngillat. Maani ilissi ernummateqannguarasi inunnut innarliisinnaanersi paasisariaqarparsi.
Taamaattumik filmiliulinnginninni eqqarsaqqaarit. “Quiasaarinnginninni” eqqarsaqqaarit. Apeqqutissat imaluunniit iliuuserisat nunarsuarmut paasissutissiissanersoq imaluunniit meeqqamik qiatitsissanersoq ilaqutariinnulluunniit namminneq nunaminni toqqissisimajunnaartitsissanersoq eqqarsaatigiuk.
Tikeraat ataqqinnittut tusagassiortullu akisussaaffillit tikilluaqquagut. Inuiaqatigiitsinnut ajoqusiiniarluni pissusilersornerit akuersaarnavianngilagut.