Kommuneqarfik Sermersuumi partiit isumaqatigiissuteqartut Nuummi inuussutissarsiornermik nukittorsaanissaq aamma attaveqaasersuutinik pitsanngorsaanissaq missingersuutit pillugit isumaqatigiissut 2025-2026-mi erseqqissumik anguniagaraat. Qeqertani ineriartortitsinissaq suliniuteqarnermi qitiuvoq, tassani naalagaaffik kommunilu pingaarutilimmik inissisimallutik.
Danskit naalagaaffiat piffissami aggersumi Qeqertani umiarsualivimmik alliliinermut peqataassaaq. Tassunga atasumik kommunalbestyrelsemit kissaatigineqarpoq tassunga tungaanut aqqusinniornissaq naalagaaffimmit isumagineqassasoq. Taamaaliornikkut suliniutip pitsaasumik ataqatigiissumillu piviusunngortinneqarnissaa qulakkeerneqassaaq, attaveqasersuutillu aamma inuussutissarsiuteqarnermik ineriartortitsineq ingerlaqatigiisinneqassallutik.
Imarsiornermik inuussutissarsiuteqarnermut sinaakkutit pitsaanerusut
Qeqertani sumiiffiup pineqartup eqqaaniittut sanaartorfigineqarnissaasa piareersarneqarnissaat Kommuneqarfik Sermersuup qulakkiissavaa. Tassunga ilanngullugu sumiiffimmi putup aaqqinneqarnissaa isumagineqassaaq, taamaalilluni sumiiffiit naleqqunnerusumik atorneqarsinnaalerniassammata.
Suliffeqarfinnut imarsiornermut tunngasunik sullissisunut sinaakkutissat pitsaanerusut pilersinneqarnissaat siunertaavoq. Suliffeqarfiit amerlanerusut peqataanissaminnut periarfissinneqarpata umiarsuarnik amerlanerusunik sullissisinnaanissaq annertusineqassaaq, maannalu inuussutissarsiornermik ingerlataqareersut aamma nutaat peqataalernissaannut nukittorsaasoqassaaq.
Qeqertani attaveqaasersuutit aamma inuussutissarsiornermut atortulersuutit ataatsimoorlutik kommunimi imarsiornermik inuussutissarsiummut aamma ineriartornissamut nutaanik periarfissanik nukittorsaassapput – inuussutissarsiornermut aamma aningaassaqarnermut iluaqutaasumik.
Angallannermi isumannaallisaanermik tikikkuminartuunissamillu ukkataqarneq
Angallannerup isumannaatsuunissaa tikikkuminassuserlu missingersuutinut isumaqatigiissummi ukkatarineqarpoq. Naalagaaffiup sakkutuunut umiarsualivimmik pilersitsinerata kinguneranik susoqarfiunerulernerata kingunerisaanik aqqusinikkut angallattoqarnerulernissaa naatsorsuutigineqarpoq.
Taamaammat Nuup Nuussuullu akornanni sullorsuup illugiinnik ingerlaarfiusinnaanngorlugu allilerneqarnissaanut naalagaaffik periarfissanik misissueqataassasoq kommunalbestyrelsemit qinnutigineqarpoq. Aqqut taanna ullumikkut naammanngereerpoq, aqqusinikkullu angallattut amerlanerulernerat tattorliuunnermik suli ajornerulersitsissaaq isumannaallisaanikkullu unammilligassanik annernik pilersitsissalluni.
Sullorsuarmik alliliilluni iliuuseriniagaq angallannermik eqaannerulersitsillunilu isumannaannerulersitsissammat pingaaruteqartinneqarpoq – biilertunut, cyklertunut pisuinnarnullu. Aammattaaq ajutoortoqaratarsinnaanernik tattorliuuffigineqartarneranillu annikillisitsissaaq.
Inuussutissarsiornermut attaveqaasersuutinullu tunngatillugu iliuusissanut ilaasoq
Qeqertani suliniutigineqartut Missingersuutit pillugit isumaqatigiissut 2025-2026-mi iliuuserisassatut ilaapput, tassani kommunalbestyrelsep inuussutissarsiornermik ineriartortitsinermik, attaveqaasersuutinik aamma angallannerup isumannaatsuunissaanik ataqatigiinnerusumik ineriartortitsinissaq kissaatigaa. Sanarfinermik, ingerlatsinermik aamma siunissami siuariartornissamik ataatsimut ukkataqarnikkut aningaasaliisuutit inuussutissarsiornermut patajaannerusumut unammillerluarsinnaanermullu tapertaassapput – ineriartornerullu innuttaasunut toqqissisimanartumik akisussaassuseqartumillu pinissaa qulakkeerneqarluni.