Anders Olsenimit (Siumut) § 37-apeqqut tunngavigalugu 2025-mi decembarimi Sermitsiami saqqummiinerit arlallit kingorna borgmesteri Avaaraq Olsen kommunit akornanni aningaasaqarnikkut naligiinnginnerat pillugu oqallinnermi ersarinnerunissamik paasissutissanillu ujartuivoq.
Kommunit aningaasaqarnikkut naligiinnginnerat pillugu oqallinneq attuumassuteqarpoq pisariaqarlunilu. Aaqqiissutissavinnilli kinguneqassappat paasissutissanik eqqortunik assigiinngitsunillu tunngaveqarnissaa pisariaqarpoq. Kommunit aningaasaqarneri pillugit oqallinnermut atatillugu borgmesteri Avaaraq Olsen taamatut ersarissaavoq.
“Kommunit aningaasaqarnikkut naligiinnginnerat pillugu oqalliseqataarusuttorujussuuvunga. Oqallinnerulli tamakkiisumik takutitsinngitsumik pisariitsumik saqqummiinernik tunngaveqarani paasissutissanik eqqortunik assigiinngitsunillu tunngaveqarnissaa pisariaqarpoq,” borgmesteri Avaaraq Olsen oqarpoq.
Aningaasaqarnermut Naalakkersuisoqarfimmit soorlu oqaatigineqartoq, kommunini aningaasaqarnikkut naligiinnginneq assigiinngitsorpassuartigut naatsorsorneqarsinnaavoq. Ilaatigut sullissinerup qaffasissusaa, akileraarutinit iluanaarutit, aningaasartuutitigut pisariaqartitat, innuttaasut katitigaanerat imaluunniit naatsorsuutitigut inernerit aallaavigalugit. Ataasiinnarmik periuseqanngilaq naliliinermilu suut piumasaqaatit tunngavissatut toqqarneqarnersut apeqqutaalluinnarput.
“Kommunit aningaasaqarneri sanillersuutissagaanni kisitsisit piumasaqaatillu suut atorneqarnersut ersarissuunissaat pingaaruteqarluinnarpoq. Taamaattoqanngippat eqqortumik takutitsisunik inerniliussisoqarsinnaavoq,” borgmesteri oqarpoq.
Oqallinnermi ilaatigut erseqqissarneqarpoq, Kommuneqarfik Sermersooq ukiut tallimat ingerlanerini katillugit 1,9 mia. koruuninik ingerlatsinermi sinneqartoorsimasoq kiisalu kommuninit allaniit amerlanerusunit sanaartornermut aningaasartuuteqarnerusimasoq. Borgmesteri naapertorlugu kisitsisit taakku immikkut ittumik pisoqarneranik nassuiarneqarsinnaapput.
“Nikinganerit annertuut kommunip 2022-mi Nuuk City Developmentimik tigusineranut attuumassuteqarluinnarpoq. Tigusineq ingerlatsinermut sanaartornermullu ataasiartumik annertuumik sunniuteqarpoq, ilaatigut kommunimit atuarfik nutaaq, ulluunerani paaqqinniffiit illuutillu allat ingerlatseqatigiiffimmit pisiarineqartariaqarsimammata aningaasartuutillu taarsigassarsinikkut aningaasaliiffigineqartariaqarsimammata,” Avaaraq Olsen nassuiaavoq.
Tigusinermut tamatumunnga iluarseereernerup kingorna Kommuneqarfik Sermersuumi innuttaasumut ataatsimut sanaartornermut aningaasartuutigineqartut kommunit sinnerisulli – amerlanertigut annertunerunngitsumik – qaffasissuseqarput.
“Naatsorsuutini kisitsisit tamarmiusut kisiisa aallaavigalugit annertunerusumik inerniliineq eqqunngitsumik takutitsisinnaasoq tamatuma takutippaa,” Avaaraq Olsen oqarpoq.
Kommunit aningaasaqarnerittaaq atugassanik assigiinngitsunik sunnerneqartarput, matumani ilanngullugit najukkami politikkikkut pingaarnersiuinerit, aningaasaqarnermik aqutsineq, akileraarusiinermi procenti, innuttaasut katitigaanerat kiisalu tunngaviusumik isertitat nikerarallartarneri aamma pingaartumik ingerlatseqatigiiffiit akileraarutaat iluanaarutinillu akileraarutaat, ukiumiit ukiumut nikerangaatsiarsinnaasut.
Peqatigitillugu borgmesterip ullumikkut kommunit akornanni piviusumik aningaasaqarnikkut nalimmassaasoqarneq ajornera akerlilerpaa.
“Ullumikkut kommunit akornanni annertuumik nalimmassaasoqartarpoq – aaqqissuussinerli ajornakusoorpoq ajoraluartumillu ersarissuunani,” Avaaraq Olsen oqarpoq.
Ilaatigut Ataatsimoortumik tapiissutit aqqutigalugit Kommuneqarfik Sermersuumit kommunit sinnerinut ukiumut 90 mio. koruunit missaanniittut agguataarneqartarput. Kommune nunatsinni innuttaasut 43 procentiisa missaanniittunik innuttaqarpoq kisianni ataatsimoortumik tapiissutit 38 procentiinnai tiguneqartarput, innuttaasut katitigaaneri aamma pilersuisussaatitaanermut artukkerneqarnerup eqqarsaatigineqarneri pissutaallutik. Taakkua saniatigut nalimmassaanermik aaqqissuussaanikkut Sermersuumit inuit akileraarutaannit 113 mio. koruunit missaanniittut kommuninut allanut agguataarneqartarput.
Taamatuttaaq Kommuneqarfik Sermersuumi innuttaasut kommunini ataatsimoorussamik akileraarutitigut nalimmassaanermut 400 mio. koruuninut missiliorneqartunik akiliisarput taamaallaalli 80 mio. koruunit missaanniittut utertinneqartarput. Sinneri kommunit sinnerinut agguataarneqartarput.
“Tamanna ullumikkut annertuumik nalimmassaasoqartarneranut assersuutit ilagiinnarpaat,” borgmesteri oqarpoq.
Peqatigitillugu Kommuneqarfik Sermersuumit isumaqatigineqarpoq matumani aaqqissuussap paasiuminaannera aamma nalimmassaaneq aamma kommunit ataatsimut atugassaat pillugit ammanerusumik, paasissutissaqarnerusumik oqallinnissaq pisariaqartinneqartoq.
“Eqiterineq pillugu apeqqut kommunit kisimiillutik aaqqiissuteqarfigisinnaanngilaat. Suliffeqarfinnik, ilinniartitaanermut neqeroorutinik aamma inuiaqatigiinni suliffinnik pingaarutilinnik inissiinerit pillugit nuna tamakkerlugu politikkikkut pingaarnersiuinermut attuumassuteqarluinnarpoq”, Avaaraq Olsen oqarpoq.
Suliaq tamanna aallartinneqareerpoq. 2026-mut aningaasaqarnermut inatsimmi ilaatigut allassimavoq, kommuninik aaqqissuusseqqinnissaq assigiinnerusumik atugassaqarnissaq siunertaralugu kommunit akornanni aningaasaqarnikkut nalimmassaanerup nalilersorneqaqqinnissaanik imaqarnissaa naatsorsuutigineqartoq.
“Suliaavoq – peqataasunik tamanik pissarsiffiusumik oqaloqateqarnikkut aamma paasissutissartalimmik ersarissumillu tunngaveqartumik – peqataaffiginissaanut qilanaarisarput,” borgmesteri oqarpoq.
Kommunini aningaasaqarnikkut atugassarititaasut pillugit oqaloqatigiinneq ingerlateqqikkusullugu naggasiullugu ersarissarpaa.
“Paasissutissalli qaqinneqassapput. Kommuneqarfik Sermersuup kommunillu sinnerisa inissisimanerat pillugu tamakkiisumik takutitsinngitsumik pisariitsumik saqqummiinermik oqallinneq tunngaveqassanngilaq,” Avaaraq Olsen naggasiivoq.