Sermiligaami meeqqat sulisullu Meeqqat Ornittagaata illutaanut sapaatip-akunnerata uuma siuliani isertersinnaanngorput. Tamanna pingaartorsiutigalugu meeqqanit, angajoqqaanit sulisuniillu malunnartinneqarpoq.
Sermiligaaq Meeqqat Ornittagaat illunut nutaanut nuuppoq. Tamanna pingaartorsiutigalugu meeqqanit, angajoqqaanit sulisuniillu malunnartinneqarpoq, saniatiguttaaq kaffeqarluni, teeqarluni kaageqartinneqarlunilu. Kingullertut taaneqartumut meeqqat ikiuussimapput.
“Ininut nutaanut meeqqat nuannaarinninnerat aamma periarfissarpassuit takullugit nuannaarnaqaaq,” Kommuneqarfik Sermersuumi angerlarsimaffimmi paarsisartunut tunngasunik suliassaqarfimmeersoq, Inngeeraq Aleqa Møller taama oqarpoq.
Nutaanik illutaarnermi aaqqiissutigineqartoq ilaatigut tikikkuminassusermut tunngavoq. Illutaa siulleq nunamiit portuallaarami meeqqat qamutaat majuunneqarsinnaaneq ajorput. Tamanna pissutigalugu meeqqat aatsaat marlulereeraangamik meeqqat ornittagaanni aallartissinnaasarsimapput.
Meeqqat ornittagaanni sulisut sisamaasut meeqqallu 14-it inini nutaaliaanerusuni ulluinnarni toqqissisimanartuni ilinniarfiulluarsinnaasunilu avatangiiseqalernissamut qilanaarput.
Illup nutaanngorneragut meeqqat ornittagaat tikikkuminarnerujussuanngorpoq. Kommunip sinnerani meeqqat arfineq-marlunnik qaammateqaleraangamik aallartissinnaanngortarnerat nalinginnaavoq, taamaalillunilu angajoqqaat erninermut atatillugu sulinngiffeqarunnaaraangamik suliffimminnut uternissaat ajornannginnerusarpoq.
