Innuttaasut timikkut tarnikkulluunniit piginnaasakillisimasut – qanigisaallu – ataqatigiissaarisitsinissamut, ilitsersorneqarnissamut kommunimilu neqeroorutinut attaveqarnissamut ataasiinnarmut saaffiginnissinnaapput.
Kommuneqarfik Sermersuummi Inunnut innarluutilinnut tunngasunik sulianik ataqatigiissaarisoqarpoq, immikkoortorlu taanna innuttaasunut timikkut tarnikkullu innarluutilinnut taakkulu qanigisaannut siunnerfeqarpoq. Immikkoortoq innuttaasunut kommunimi inuit innarluutillit susassaqarfiini neqeroorutinik ingerlatsivinnillu sumunnarnissaminnut ikiorneqarnissaminnut pisariaqartitsisunut ataatsimoorussamik attaveqarfittut atuuppoq.
Inunnut innarluutilinnut tunngasunik sulianik ataqatigiissaarisut kommunimi ingerlatsivinni assigiinngitsuni tapersersuinissamut periarfissaasut pillugit innuttaasunik ataqatigiissaarinermut ilitsersuinermullu tunngatillugu tapersersuisarput. Innuttaasut immikkoortortaqarfiit assigiinngitsut akornanni namminneq ujartuinnginniassammata ingerlaatsit ataqatigiinnerunissaat paasiuminarnerunissaallu pillugu tapersersuinissaq siunertaavoq.
Innuttaasut arlallit eqqortumik ikiorneqarnissaminnut periarfissaminnillu paasiniaanissaminnut unamminartitsisartut misigineqartarmat ataqatigiissaarisartoqarnissaanut pisariaqartitsineq ersarippoq. Taamaattumik immikkoortortami innuttaasunut pisinnaatitaaffimminnik, tapersersortinnissamut imaluunniit kommunimi neqeroorutit pillugit nalornisunut siunnersuinissamik ilitsersuinissamillu neqeroorutigineqarput. Tamatuma saniatigut tapersersuinissamut periarfissat attuumassuteqartut kommunimi assigiinngitsut akornanni aallartinneqarnissaat ingerlatallu unittuunnginnissaat pillugu immikkoortortamit qulakkeerinninniarluni sulisoqartarpoq.
Inunnut innarluutilinnut tunngasunik sulianik ataqatigiissaarisunut aqutsisoq Nielsine Grønvold Petersen innuttaasut suliassaqarfimmi tassani tapersersorneqarnissaminnut pisariaqartitsisut saaffiginninnissaannut kajumissaarivoq. ”Innuttaasut timimikkut tarnikkulluunniit piginnaasakillisimasut qanigisaallu sumunnarnissaannut ikiussallugit piareersimavugut. Sumilluunniit siunnersorneqarnissaminnut, paasinninnissaminnut imaluunniit ataqatigiissaarinissamut ikiorneqarnissaminnut pisariaqartitsigaanni immikkoortortamut saaffiginninnissamut innuttaasut tikilluaqqusaapput. lnnuttaasut apeqqutissaqaraluarlutik kisimiinnginnissaat pingaarnerpaavoq.”
Innuttaasut Suliffeqarnermut Isumaginninnermullu Ingerlatsiviup saaffiginnittarfianut saaffiginnissinnaapput.
Tamatuma saniatigut Inunnut innarluutilinnut tunngasunik sulianik ataqatigiissaarisut attavigineqarsinnaapput oqarasuaatikkut 36 66 66 e-mailikkulluunniit khe@sermersooq.gl. Kommunip nittartagaani neqeroorut pillugu annertunerusumik atuagaqarsinnaavutit: https://sermersooq.gl/kl/inunnut-innarluutilinnut-tunngasunik-sulianik-ataqatigiissaarisut-ilitsersortinnissamut-ataqatigiissaarinissamullu-ikiortinneq/